Read Nyishi IJIKEL 19 Bible Online

IJIKEL 19 - Nyishi bible

IJIKEL 19

¹Hoo no, Israelwg lvpw tuup tulu gab nyix-riirabto,

²hoo beto: Hog nvknv noqg annv? Sony nyot nyem! Sony nyot tulug pengko ho mwn bumpnum; sony nyot nyopa tulug pengko ho mwn mwnwg kongam sonum.

³Hoo mwn mwnwg ko akwn sorabnum; mwv sony nyot nyopa akwb nyiknum, hoo mwv soogam gamdwb cengnum; mwv nyiam duiyumnum.

⁴Nyob tulungv mwam tapanum; mwam bulug suggumho nootunum, hoo Ijipt gvdaho bulv mwam tookiv haqgab tvl boanum.

⁵Hwdlo mwn kaanamv mwn kaaya yaas yukun, mwnwg mwwgwngv dook maanum, mwn akta mwnwg ko tulungam naanum hoo mwam sony nyot nyopa akwb mvknum.

⁶Mwv sony nyot nyopa tulug pengko ho ngaml yvnum; mwv sony nyot nyopa akwb nyiknum, hoo mwv soogam gamdwb cengknum; mwv nyiam duiyumnum,

⁷hoo bulug xwwmy tulungam booreqnum. Mwv bulug bopam tulungam dooxa-xaaram dvb mvnum hoo mwwg dugum gumnam hoqgv gvdangam la hoqho doonbo mwlwngam tvmdwrl bosdvb mvnum.

⁸Ho taqg-loosaq gvdaho doonbo nyob tulungv mwam ceeko dvb nyinum; bulv bulug wswqkam mwwg aoho hurlup kunum; mwam bulug suggumv nootu kunum.

⁹Mwam bulv tooky tulu hoqgv haqgab tvl pvtwq urab siilwqnum hoo mwam Bebilonwg lvpw at agaho boanum, bulv mwam bulug pvvb uraho boanum Israelwg puutu tulug aoho mwwg dugumnam mam lokkam tapa mvkmabv.

¹⁰Nulug annv iss bviywrho liinum roo boolug roo ann hvb nyinum, mood jaqkam issiv naleq ko-gab aaxiv la haqbv naleqnum.

¹¹Hoqg atorbo rwppongv hv pvvb bwwl doogbo tulug beqnyiab nyinum; hoqhv tamnbo pengko hoqgv soja ao jaqn bo ho tamcanum; hoqhv hoqhvb ao ko-gab hoo haqbv naleq ko-gab kaapanum.

¹²Hvbmabde hang lenggam gab annam puriqnum, hoo deelaho joopaqnum; dou-cagag dooiyv hoqg aaxiam huudwb yipkunum; bulam diibin tvl hoo sengnum. Hoqg atorbo rwppongam, wmv guiyum kunum.

¹³Sija hoqham deexa-rara, bvla huutwr-twrxa ko gvdaho liiknum.

¹⁴Hoo wmv rwppo hoqgv niqtuq jurlinam gob gugnukun, hoo hoqg aaxiam guiyum kunum, hoqgab hoqho atorbo rwppo doom kuma dvb, pvvb bwwl doogbo tulu gab beqnyia doom maadwb. Soq si nyix-riinamv hoo si nyix-riinam gob nyipa ku.