Read Nyishi IJIKEL 2 Bible Online

IJIKEL 2 - Nyishi bible

IJIKEL 2

¹Hoo mwv ngam benum, “Nyia ko tuup, noqg lvpiaho daqto, hoo ngo noqg lvgab gootayin.”

²‍Hoo mwv ngam agam gooyikho, Yalv ngoqg urab haanum hoo ngam ngoqg lvpiaho daqmnum, hoo ngam mwwg goonam mam ngo tapanum.

³‍Hoo mwv ngam benum, “Nyia ko tuup, hiyv ngam ceekol taleqbo, hoo ceeko bo nyub tulug pengkog, Israelwg nyiilug dookub ngo nam kanam gviywn. Bulv la bulug ab tulungv soq aal namgub ngam ceekol nyimur nyipa kun.

⁴‍Hotam tulungv kam modu kama hoo tamy do: Ngo nam bulug dookub kanam gviywn, hoo no bulam betayin, ‘Soq sib At Sw bedo.’

⁵‍Hoo bulv tag ge ho tama ge (hoggab bulv taleqbo nombungv) bulug pengko ho nyiqry benbo ak doodwn hvl bulv cengtayin.

⁶‍Hoo nyia ko tuup no, no taa-haataq hoola pooxu-yvs pengko ho doosjaqkam bulam bos maabv, ho bulug gomcwram bos maabv. Bulug gomcwram bos maabv, ho bulug kaanam hoqgv hang homabv, hoggab bulv taleqbo nombungv.

⁷‍Hoo no ngoqg gomcwram bulam betayin, bulv tag ge ho tama ge, hoggab bulv taleqbo nombungv.

⁸“Hvbmabde nyia ko tuup, no, tato ngo hoqgv nam goodwn. Taleqbo nombu hvb taleq maabv; noqg agam mam gamkoqto hoo hoggv ngo nam jidwn ham no dvto.”

⁹‍Hoo hwdlo ngo rogabnum, kaato, alaq laqg ngam ijin jinum, hoo kaato, vtiqnam kitap taqg hoqho doonum.

¹⁰‍Hoo mwv ngoqg agaho ham taapurnum. Hoo hoqho taqg-loosaqb lvr xeqnamv doonum, hoo hoqho nyix-riinam mamla xabl riil hoo mwwdwqnam mam lvr xeqpnum.