Read Nyishi IJIKEL 20 Bible Online

IJIKEL 20 - Nyishi bible

IJIKEL 20

¹Camleq nywkvn vnywg pool bargwg looiyw aalho Israelwg nyiixa tulungv At Swn tox-tataq dvb ngoqg agaho haal doonum.

³“Nyia ko tuup, Israelwg nyiixa tulungam agam gool, hoo bulam beto, soq sib Pwnbo At Sw bedo, Nulv ngam tox-tataq dvb haad nvi yv? Ngo swwd deedib, Pwnbo At Sw bibwqdo, ngo nulam tox-tataq kudwb mood jiram.

⁴‍No bulam pw-hwwb yv, nyia ko tuup, no bulam pw-hwwb yv? Bulug ab tulug bulum-kac dvb nyinam tulungam bulam cengm to,

⁵‍hoo bulam beto, soq sib Pwnbo At Sw bedo: Hwdlo aalho ngo Israelam daalin yikho, ngo Jakub hosiqkam dingrwl Ijipt gvdaho bulam ngam cengm dvb jinum; ngo bulam dingrwl benum, ngo nulug Pwnbo At Swv.

⁶‍Hoq aalho ngo bulam dingrnum ngo bulam Ijipt gvda hoqgv boolin layil ngo bul gab gvda ak meegaq jitayin, wtw lywminko hoo ngola biqminko gvdangam, gvda mwlwngam yuubin yaanam gvdangv.

⁷‍Hoo ngo bulam benum, nul nyiicwr-cwrxiv, nulug vnyiq kaabynam kacbo tulu ham hurpaqto, hoo Ijipt murty lvgab nulv atv kacdvb atam mvs maabv; ngo nulug Pwnbo At Swv.

⁸‍Hvbmabde bulv ngam taleql ceekonum hoo ngam tvnw maanum. Bulug vnyiq kaabynam kacbo tulu ham bulv akjijaqkam hurpaq kuma, ho Ijipt gv murty tulu hamkam apaq kuma. “Ho ngo benum ngoqg hang lingtwrnam mam bulug aoho huqpup tayin hoo ngoqg bulam haaxaqnam mam Ijipt gv gvda pengko ho ceekol doom tayin.

⁹‍Hvbmabde bulug nyob tulug dook pengko ho, ngo ngoqg emin gab soq sam kacdvb mvram, hiyvg kaagaho ngo atv bulam Ijipt gvda hoqgv boolin kunam mam cengtayin.

¹⁰‍Hoqgab ngo bulam Ijipt hoqgv boolin layil deexa-rara urab boolwqnum.

¹¹‍Ngo bulam ngoqg gamlam la ngoqg pvvb tulungam cengm dvb jinum, hoqham nyi ak nyib nyiloqkam, mwv swwtayin.

¹²‍Hoq aoho, ngo bulam ngoqg Doonu de aalam jinum, bul gvla ngoqg pengko ho muxnam akgob nyitayin, ho soq tulu sam darxaqbov, ngo At Swv hvl bulv cengtayin.

¹³‍Hvbmabde Israelwg nombungv ngam deexa-rara ho taleql ceekonum. Bulv ngoqg gaml bepkob wmanum hvbmabde ngoqg pvvb tulungam haqpaqnum, hogloq ham nyiingv nyib nyiloqkam, mwv swwl dooiyinam; hoo ngoqg Doonunam aalam bulv vcjaqb kacdvb mvnum. “Ho ngo benum deexa-rara alo ngoqg hang lingtwrnam mam bulug aoho huqpup tayin; bulam twryum dukub.

¹⁴‍Hvbmabde bulug nyob tulug dook pengko ho, ngo ngoqg emin gab soq sam kacdvb mvram, hiyvg kaaga hoqgv ngo bulam boolin kunum.

¹⁵‍Hoq aoho, ngo bulam deexa-rara ho dingrnum ngo bulam jitanam gvdaho boolwq kuram, wtw lywminko hoo ngola biqminko gvdangam, gvda mwlwngam yuubin yaanam gvdangv,

¹⁶‍hoggab bulv ngoqg pvvb tulungam haqpaqnum hoo ngoqg gaml bepkob wmanum, hoo ngoqg Doonu aalam kacdvb mvnum; hoggab bulug hangv murty kokwb wmin gvnum.

¹⁷‍Hvbsujaqkam, ngoqg vnyiqkv bulam kvvmwnum, hoo ngo bulam twrmanum, ho bulam deexa-rara ho twryum maanum.

¹⁸“Hoo ngo bulug ko tulungam deexa-rara ho benum, nulug ab tulug gaml bekwb wmabv, ho bulug pvvb tulungam pvvmabv, ho bulug murty lvgab nulv atam kacdvb mvmabv.

¹⁹‍Ngo nulug Pwnbo At Swv; ngoqg gaml bepkob wto, hoo hengab jinjin gvdwl ngoqg pvvb tulungam tvjw to,

²⁰‍hoo ngoqg Doonu aalam dvrwqb pvvto hoqhv ngoqg gvla noqg pengko ho muxnam akgob nyitayin, ho ngo Pwnbo At Swv hvl nulv cengkam yin pv.

²¹‍Hvbmabde ko tulungv ngam taleql ceekonum. Bulv ngoqg gaml bepkob wmanum hoo hengab jaqb ngoqg pvvb tulungam tvjw maanam, hogloq ham nyiv nyib nyiloqkam, mwv swwl dooiyin dvn; bulv ngoqg Doonu aalam kacdvb mvnum. “Ho ngo benum deexa-rara alo ngoqg hang lingtwrnam mam bulug aoho huqpup tayin.

²²‍Hvbmabde ngoqg alaqkam nootul ngo apsunum hoo ngoqg emin gab ngo soq sam nyinum, ho hoqham nyob tulug kaagaho kacdvb mvmanum, hiyvg kaaga hoqgv ngo bulam boolin kunum.

²³‍Hoq aoho, ngo bulam nyob tulu gvla gvda mwlwho cwrsaq twqb bulam mvdwb, ngo bulam deexa-rara ho dingrnum,

²⁴‍hoggab bulv ngoqg pvvb tulungam tamanum, hvbmabde ngoqg gamlam haqpaqnum hoo ngoqg Doonu aalam kacdvb mvnum, hoo bulug vnyiqkam bulug ab tulug murty tuluho tuugabnum.

²⁵‍Hoq aoho, swwg dooma bo almanbo gamlam la pvvb tulungam ngo bulam jinum,

²⁶‍hoo ngo bulam bulug ko bwwconam aky jinam ho kacdvb mvnum, ho ngo bulam twryum kamyi nvpv. Soq sam ngo nyinamsi hvbnyiloqkam ngo At Swv hvl bulam cengm tayin.

²⁷“Hoqgab, nyia ko tuup, Israelwg nombungam agam gooto hoo bulam beto, soq sib Pwnbo At Sw bedo: Soq samkam nulug ab tulungv ngam benyi-beyanum, ho ngoqg lvgab bulv surjaqb nyinyi-nyiyanum.

²⁸‍Hoggab hwdlo ngo bulam jidwb dingrnam gvdaho bulam boa yukho, ho bulv gvda puutu aobo yornam ho nwmw rooxo bo svvn tulungam kaatwl, bulv bulug pwram jinum hoo bulv hoqho bulug ngam nyiluqnam akiam jinum; hoqho bulv bulug sungam bo sulum mam jilwqnum, hoo hoqho bulv bulug twwnam akiam toolwqnum.

²⁹(Ngo bulam benum, nulug puutu aob caag dvnv hoggv? Hoqg eminam soolo godab Bama hvdwn.)

³⁰“Hoqgab Israelwg nombungam beto, soq sib Pwnbo At Sw bedo: Nulv atv nulug ab tulug kacdvb nyinam hvb nyil wb yv hoo miqjol bulug kac bo kokwb wb yv?

³¹‍Hwdlo nulv nulug akiam jiyikam hoo nulug ko tulungam wmho joolwq yukam, nulv atv atam kacdvb murty lvgab soolo nagub mvdo. Hoo ngo nulug tox-tataq dvb nyid yv, Israelwg nombunga? Ngo swwd deedib, Pwnbo At Sw bibwqdo, ngo nulgab tox-tataq dvb nyikram.

³²“Hoggv nulv mwwdwn hv nywywngam nyiram—mwwdwn, ‘Kuj ngulv nyob tulu sib nyituj, gvda tulug nyi nyob dvpar hvb nyituj, hoo wlw-wswngam xumtuj.’

³³“Ngo swwd deedib, Pwnbo At Sw bibwqdo, hoggub nyilakam ngoqg laqtorbo alaq kvla yvmjinbo laqpongv hoo ngoqg hang lingtwrnam mam ngo nulug aoho lvpw at gob pvvb bwwl doog mvtayin.

³⁴‍Ngo nulam nyiilug pengko hoqgv boolin tayin hoo nulam cwrsaq twqb mvk gvda hoqgv bookum tayin, ngoqg laqtorbo alaq kvla yvmjinbo laqpongv hoo hang lingtwrnam mam huqpup tayin.

³⁵‍Hoo ngo nulam deexa-rara nyiilug urab boatayin, hoo ngo alo nulam nyuqmv nywwtv minsul pw-hwwtayin.

³⁶‍Ngo hoggub nulug ab tulungam Ijipt gvdag deexa-rara ho pw-hwwnam, hoqhvb kalam nulug lvgab pw-hwwtayin, Pwnbo At Sw bibwqdo.

³⁷‍Ngo nulam dvvcw hoqgv gwrnyiaq tayin, hoo ngo nulam ngoqg birnam uraho doom tayin.

³⁸‍Ngo nulug pengko hoqgv taleqbo tulungam, la ngam ceekol nyimur boam naapaq tayin. Ngo bulam bulug nyiogy ginu ko gvda hoqgv boolin tayin, hvbmabde bulv Israelwg gvdaho haanyiram. Ho ngo At Swv hvl nulv cengtayin.

³⁹“Nul gab nyiloqkam, Israelwg nombunga, soq sib Pwnbo At Sw bedo: Nulv ngam taram nyiloqkam, sijangv kokw namgub vcw-atv atwg murtiam wgdvl xumta; hvbmabde nulug murtiv la akiv ngoqg dvrwqbo eminam lokkam kacdvb muk maabv.

⁴⁰“Ngoqg dvrwqbo puutu ho, Israelwg puutu ao, Pwnbo At Sw bibwqdo, Israelwg nombungv, bul mwlwngv ngam gvda so xumtayin. Ho alo ngo bulam loorwq tayin, hoo alo ngo nulug jikumnam mam hoo nulug mwlwg alyanbo daalinam aky lvgab dvrwq dvb aky jinam mam naadwb nyitayin.

⁴¹‍Hwdlo ngo nulam nyiilug pengko hoqgv boolin yukam, hoo nulam hogloq bvxeq cwrsaq twqb mvknam gvda hoqgv bookum yukam, ngo sungam albo suunam gob nulam loorwq tayin. Hoo ngoqg nulug pengko ho dvrwq kwrwqkam ngo nyob tulug kaagaho kaakin tayin.

⁴²‍Hoo ngo nulug ab tulungam dingrnam gvdaho ngo nulam Israelwg gvdaho boolwq yukam, ngo At Swv hvl nulv cengtayin.

⁴³‍Hoo alo nulv nulug atwg nyinam-mvnam lamta tulungam hoo nulv atv atam kacdvb nyinam mam mwwpa tayin, hoo nulv nulug atv almab nyinam tulungam oyum tayin.

⁴⁴‍Hoo hwdlo ngo ngoqg atwg emin gab bon nyiyikam, ngo At Swv hvl nulv cengtayin, hoo nulug alman lamta nyik jaqb ma, nulug nyiwq-nyito nyik bvkam ma, Israelwg nombunga, Pwnbo At Sw bibwqdo.”

⁴⁵‍Hoo At Sw gomcwrv ngam haanum:

⁴⁶“Nyia ko tuup, noqg nyuqm mam nyooko daiyab nywwto; nyooko daiyangam ceekol tomswrto, hoo Negeb nyoro gvdangam ceekol nyiqry kaal beto.

⁴⁷‍Negeb nyorongam beto, At Swg gomcwram tato: Soq sib Pwnbo At Sw bedo, Kaato, ngo nulam wm ak rwlwq tayin, hoo hoqhv nulug svvn leelaq boam la sengn boam guiyum tayin. Wm moiliam mwmiq nyoram, hoo nyoodum nyooko mwlwngam hoqhv guiyum tayin.

⁴⁸‍Ho swwnbo mwlwngv kaapa tayin hoqham rwlwq bov At Sw ngo; hoqham mwmiq nyokram.”

⁴⁹‍Ho ngo benum, “Oa, Pwnbo At Swa! Bulv ngam begamv, ‘Mwv doocam mvlinbo ak hvvma yv?’”