Read Nyishi IJIKEL 21 Bible Online

IJIKEL 21 - Nyishi bible

IJIKEL 21

¹At Swg gomcwrv ngam haanum:

²“Nyia ko tuup, noqg nyuqm mam Jerusalem daiyab nywbo gvdwl hoo dvrwq namlongam ceekol tomswrto. Israelwg gvdangam ceekol nyiqry beto

³‍hoo Israelwg gvdangam beto, soq sib At Sw bedo: Kaato, ngo nam ceeko dvn hoo ngoqg lyoqr orioqkam buqxa hoqgv seqlin tayin hoo lootw boam la nyic-nyiabo vnyi-vnyiam nunyiam papaqtayin.

⁴‍Hoggab ngo lootw boam la nyic-nyiabo vnyi-vnyiam nunyiam papaqtayin, hoqgab ngoqg lyoqr orioqkam buqxa hoqgv nyoodum-nyooko swwl doonbo mwlwngam ceeko dvb seqlin tayin.

⁵‍Hoo swwl doonbo mwlwngv ngo At Swv hvl cengtayin. Ngoqg lyoqr orioqkam ngo buqxa hoqgv seqlin pakun; hoqham buqxa ho xwqkur kuram.

⁶“Noqgab nyiloqkam, nyia ko tuup, noqg hangv vcjaqb mwwdwq ko-gab bvriq tadwn hvb nyil sigin ginto, bulug vnyiq kaagaho sig ginto.

⁷‍Hoo hwdlo bulv nam beikam, ‘Hoggub no sig gin dvn?’ no betayin, ‘Puiyv hoodu ko-gab. Nyiicwr-cwrxig hangv hopaq tayin, hoo mwlwg alaqkv ator dookram, hoo vxig yalv swnyiq-svnyiaq tayin, hoo mwlwg lwbwngv tvmdwr tayin. Kaato, hoqhv hoodu do, hoo hoqhv niqtuq nyilin tayin,’” Pwnbo At Sw bibwqdo.

⁸‍Hoo At Swg gomcwrv ngam haanum:

⁹“Nyia ko tuup, nyiqry kaato hoo beto, soq sib At Sw bedo; Begamv: “Lyoqr orioq daag, lyoqr orioq daag pwreq paku hoo ham neexaq paku,

¹⁰patab naadwb pwreq paku, kwlwq-kvlaql horm dvb neexaq paku! (Ho ngulv hwnyir-hvmar bviyv? Ngoqg ko tulug, nulv dvvcw lvgab la svvda lvgab gwrnyiaqnam mam haqpaq paku.)

¹¹‍Hoqgab lyoqr orioqkam neexaq mvdwb jipa ku, ho hoqham alaqho rubrub jaqb gvbw yin pv. Hoqham pwreql hoo neexaq tvl patab deenbo alaqho jilwq pakun.

¹²‍Nyia ko tuup, sogoql xabto, hoggab hoqhv ngoqg nyiilungam ceeko do. Hoqhv Israelwg lvpw at ko tuup tulungam ceeko do. Ngoqg nyiilungam bulam lyoqr orioq niqtuqho lvgab jilwq tayin. Hoqgab noqg xarpongam pidin suto.

¹³‍Hoggab hoqhv pooka-yirka ram—hoggv nyikin dvn no dvvcwngam haqpaq baloqkam?” Pwnbo At Sw bibwqdo.

¹⁴“Noqgab nyiloqkam, nyia ko tuup, no nyiqry beto. Noqg alaq lvqnyiv cupupto hoo lyoqr orioqkam lwnyi go lwwl to, vv, patab deenam aoho lyoqr orioqkam luum go lwwl to. Hoqho koijaqb lyoqr orioq lvgab patab deenbov bulam hwwiyum do,

¹⁵‍ho bulug hangv hopaqyin pv, hoo naleqgo dwqtub tayin. Bulug toggoq mwlwngam ngo kwlwq-kvlaqbo lyoqr orioqkam jipa kun, Oa, hoqham kwlwq-kvlaqbo huto hvb mvpa kun; hoqham patab dukub naag nukun.

¹⁶‍Hogloq bvxeq noqg nyuqmv nywwtayin, no atv laqc-lvqbwqb pato.

¹⁷‍Ngo kam ngoqg alaq lvqnyiv cupup tayin, hoo ngoqg hang lengnam mam ngo xumtayin; ngo At Sw agam goopa kun.”

¹⁸‍At Swg gomcwrv ngam lokta haanum:

¹⁹“Noqgab nyiloqkam, nyia ko tuup, Bebilonwg lvpw atwg lyoqr orioq gab haady boam lamta bvvnyi gob muxto. Vnyi-vnyiv gvda akin hoqgv haatayin. Hoo muxnam loq ak tengp to; hoqham bopam haata ko lamtaho tengpwl apto.

²⁰‍Lyoqr orioqkam Ammon nyi tulug Rabba namgub hoo gurum nwqtumnam mam Jerusalem urag Juda namgub haam dvb lamtangam muxul apto.

²¹‍Hoggab Bebilonwg lvpw atv lamta bvvnyig pvvbwqho daqtwl, jerbiq tuuka to. Mwv uppuq tulungam hwqdin dvn; mwv gwwn-nyiqry tulungam tox-tataq dvn; mwv roqsin kaado.

²²‍Mwwg lvqbwq alaqkv Jerusalem gab jerbiq tuudo, yaap tvmwram anya kaapa dvb seekar dvn, mengtanam mam agam goom dvb, vc alwb sogoq goql, bimp tvmwram anya kaapa dvb toggoq tulungam ceeko mvdwb, deeb yiqtum do, naareqtvl sulu nwqtumnam.

²³‍Hvbmabde bulug jerbiqkv xaalyo bo hvb nyitayin. Bulv piwr jwr-jwr dvb dingr sunam, hvbmabde mwv bulug nyixiaqnam mam mwwpa mvdo, hoo bulam nyuum bookam yin pv.

²⁴“Hoqgab soq sib Pwnbo At Sw bedo: Hoggab nulv nulug nyixiaqkam mwwpa mvdwb mvnum, hoqho nulug nyimurnam mam pukonum, ho nulug nyic nyinam mwlwngv kvvbw cwkwnum—hoggab nulv mwwpa kudwb haapa ku, nulam alaqho naatayin.

²⁵‍Hoo Israelwg lvpw at ko tuup, kacib nyicbo ak, nulgab laqm bvqtwr baqnya de aalv la moodv haapa ku,

²⁶‍soq sib Pwnbo At Sw bedo: Bopyangam la ywr dumtup pam pipaqto. Dupum-dvrabpv hoggub doonam hvb dookram. Anyo boam koi dvb mvca to, koi boam anyo dvb mvlto.

²⁷‍Yuupaqbo ak, yuupaq, yuupaq dvb ngo ham mvtayin. Soq siikam hog nyiram, mwv haama deedib, pw-hwwnamv mwwg gvsu, hoo ngo hoqham mwam jitayin.

²⁸“Hoo no, nyia ko tuup, nyiqry kaal hoo beto, soq sib Pwnbo At Sw Ammon nyi tulug pagoq gab la bulam bej-bepar tanam mam bedo; beto, lyoqr orioq daag, lyoqr orioq daag patab dvb seqlin paku. Hoqham mengn dukub neexaql kwlwq-kvlaql dvb horm paku—

²⁹‍bulv nulgab xaalyo nyiqriam kaaikam, bulv nulgab xaalyo jerbiqkam tuuikam—nulam kacib nyic nyinbo lwwpo hv ap dvb, bulam laqm bvqtwr baqnya baqmdv aalv la moodv haapa ku.

³⁰‍Hoqg buqxa urab xwqkur tuku. Nam hogloqkv pwlin ko nyook, noqg dwrbuqk gvdaho, ngo nam pw-hwwtayin.

³¹‍Hoo ngo noqg aoho ngoqg haaxaqnam mam huqpup tayin; noqg aoho ngoqg hang lingtwrnam mam wm mam tolwq tayin, hoo ngo nam anya-kaasar dvb mvnbo alaqho jilwqtayin, hiyv twryum dvb hingky jaqb cengdwn.

³²‍No wm gab wswb nyitayin. Noqg hijumv gvdag pengko ho biqtayin. Nam lokkam mwwpa kuram, hoggab ngo At Sw agam goopa kun.”