Read Nyishi IJIKEL 22 Bible Online

IJIKEL 22 - Nyishi bible

IJIKEL 22

¹At Swg gomcwrv ngam haanum, hoo begamv,

²“Hoo no, nyia ko tuup, no pw-hwwtayin yv, no pw-hwwtayin yv ywlw bopam mam? Ho mwnwg bulum-kac dvb nyinam mwlwngam bibwqto.

³‍No beto, soq sib Pwnbo At Sw bedo: Mwnwg bopam pengko ho ywlw-twwnum, ho mwnwg moodv haakam yin pv, hoo mwn atam kacdvb murty mvkam yin pv!

⁴‍Noqg ywlw-twwgam gab nyixiaq paku, hoo noqg murty mvnamv nam kacdvb mvpa ku, hoo noqg aalam no ogum dvb haam paku, nam xirwl xip jinam vnywngv hvvc paku. Hoqgab nyob tulungv nam bejab-biyiq mvdwb, ngo mvpa kun hoo gvda mwlwg bej-beparnam ak gob nyitayin.

⁵‍Noqg ogum gvkam hoo aado gvkam nam bej-bepar tayin; noqg eminam kacdvb mvtayin; naleqgo nam hur-marabl bicu-beya tayin.

⁶“Kaato, noqg uraho doonbo Israelwg lvpw at ko tuup tulungv, nyiicwr-cwrxiv mwwg huqlw hoqgv ywlw-twwdwb nyidul doodo.

⁷‍Noqg hoobum ho no abam la annam modu kuma; noqg hoobum ho nyoyw wnboam noqg pengko ho naalil naareqtvl hentwr mvdo; noqg hoobum ho ab dooma boam la xwwmy tulungam nyijab-nyiyiqdo.

⁸‍No ngoqg dvrwqbo dupum-dvrab pam xikma hoo ngoqg Doonu aalam kacdvb mvpa ku.

⁹‍Noqg uraho ywlw twwnbo nyiilungv doodo, hoo noqg uraho ui panam vdinam dvdo; noqg pengko ho kaabil kacib nyido.

¹⁰‍Noqg uraho nyi tulungv bulug ab tulungam talo dvb mvko do; noqg hoobum ho bulv nyem tulungam namc yidu mvtwl yubg do.

¹¹‍Mwwg door-doopw nywxw lvgab bulum-kac dvb nyido; tuugin mwwg nyeexwngam kacdvb nyido; tuugin mwwg any-bwrm mam, mwwg abwg nyem koam kacdvb nyido.

¹²‍Noqg hoobum ho bulv ywlw-twwdwb kam naado; no leqbaql la laaleq dvb hoo noqg door-doopw hoqgv naareqdo; hvbmabde ngam no mwwpa kuma, Pwnbo At Sw bibwqdo.

¹³“Kaato, noqg surub nyil nookumnam mam la noqg pengko ho ywlw-twwn boam ngoqg alaqkv jwwtab tayin.

¹⁴‍Hwdlo aalam ngo nam laqm- baqm dvb nyiyikam, noqg haakamv komyu tan yv, ho noqg alaqkv laqtor tan yv, ngo At Sw agam goopa kun, hoo ngo ham nyitayin.

¹⁵‍Ngo nam nyob tulug pengko ho cwrsaq twqb mvtayin hoo gvda mwlwho nam wpin-wra dvb mvtayin, hoo ngo noqg dvrwq maanam mam twrtayin.

¹⁶‍Hoo nyob tulug kaagaho noqg atwg nyinamv nam kacdvb mvtayin, hoo ngo At Swv hvl no cengtayin.”

¹⁷‍At Swg gomcwrv ngam haanum:

¹⁸“Nyia ko tuup, Israelwg nombungv ngoqgab hog hvvtw kuma; bul mwlwngv pitol hoo tina hoo dvvcw hoo tama wm jiqxornam hvb nyidwn; bulv rup jiqxortvl niqtuq dooma bo hvb nyidwn.

¹⁹‍Hoqgab soq sib Pwnbo At Sw bedo: Hoggab nulv jiqxorl jiqro hvb nyidkun, hoqgab, kaato, ngo nulam Jerusalemwg pengko ho bookum tayin.

²⁰‍Nyi akv hoggub rup hoo pitol hoo dvvcw hoo tamangam wm jiqxor dvb nookum dvn, hoqho wm pvrlwqtvl hoqham jiqm dvb mvtayin, hvbkalam ngo nulam ngoqg haaxaqnamv la hang lengnam lvgab bookum tayin, hoo ngo nulam hoqho vlwqtvl hoo nulam jiqm tayin.

²¹‍Ngo nulam bookum tayin hoo ngoqg hang lingtwrnamv wm lvgab nulug aoho tolwq tayin, hoo nulv hoq pengko ho jiqtayin.

²²‍Rupam hoggub wmv xvwr jwr-jwrl jiqm dvn, hoqhvb kalam nulam hoq pengko ho jiqm tayin, hoo ngo At Swv hvl nulv cengtayin; Ngo nulug aoho ngoqg hang lingtwrnam mam huqpup pakun.”

²³‍Hoo At Swg gomcwrv ngam haanum:

²⁴“Nyia ko tuup, mwnwn beto, no dvrwq maanbo gvda akv ho hang lengnamv nyodo honam hvb honum.

²⁵‍Mwnwg nyiqry benbo tulungv mwnwg pengko ho hima bwwl hwwsnamv dugum bo sony nyot dorg dvs cexnam mam swrmwqnam hvb nyido; bulv nyia ko tulungam mengnum; bulv gumnam la xinam dupum-dvrab pam naapa ku; mwnwg pengko ho bulv xwwmiv naleqgo dvb mvpa ku.

²⁶‍Mwnwg nyub tulungv ngoqg pvvbam juqbo paku hoo ngoqg dvrwqbo dupum-dvrab pam kacdvb mvpa ku. Bulv dvrwq bvla gooiyab nyinam-wnam mam mwbwq kuma, ho bulv dvrwqkam la dvrwq maanam tomswr swrnyi kuma, hoo bulv ngoqg Doonu aalam xima dukun, hoqgab ngam bulug pengko ho kacdvb mvpa kun.

²⁷‍Mwnwg lvpw atwg ko tuup tulungv mwnwg pengko ho svca cvvtwgv dvsam ywlw-twwl cimwqnam hvb nyido, surub nyil swwtws mwwl nyi mengkar do.

²⁸‍Hoo mwnwg nyiqry benbo tulungv bulam puulu bov niilup paku, bul gab xaalyo bo nyiqry kaal hoo vm mvvl jerbiq tuul, begamv, ‘Soq sib Pwnbo At Sw bedo,’ At Sw gooma sujaqkam.

²⁹‍Gvdag nyiilungv bos belaml hoo naalil naanam mam nyidul doodo. Bulv jwwgw boam la pwwma-cimaboam nyijab-nyiyiqdo, hoo nyoodo nyiilungam jvqtw maab bos belaml naareqdo.

³⁰‍Hoo ngo nyi ak bulug pengko ho meegaqnum hiyv bvliam nwqdwr tvl hoo gvda gab ngoqg pengko ho daqdy boam, ho ngo hoqham twrdwb nyiram, hvbmabde ngo akjijaqkam kaapa maanum.

³¹‍Hoqgab ngoqg hang lengnam mam bulug aoho ngo huqpup pakun. Ngoqg hang lingtwrnam wm hoqgv ngo bulam guiyum pakun. Ngo bulug nyinam-wnam mam bulug dumpo ho hookur mvpa kun, Pwnbo At Sw bibwqdo.”