Read Nyishi IJIKEL 23 Bible Online

IJIKEL 23 - Nyishi bible

IJIKEL 23

²“Nyia ko tuup, lok golo nyem dvn vnyi go doonum, vnyiv ann akinwg nyem kov.

³‍Bulv Ijiptho meqjo bob nyinum; bulv bulug tuudy-yaamy yikho meqjo bob nyinum; bulug kuru haabongam aminb bwwmin mvnum hoo bulug mvvngam haabongam soomin mvnum.

⁴‍Any hoqg eminv Ohola hoo mwnwg bwrm eminv Oholiba. Bulv ngoqgab dooknum, hoo bulv nyega kov la nyem kov doonum. Bulug eminv hvbnyiloqkam, Ohola si Samariyangv, hoo Oholiba si Jerusalemv.

⁵“Ohola ngoqgv su hvbjaqkam mwn meqjo bob nyinum, hoo mwn mwnwg kaabil abynam nyob palaqbo Assiriya nyi tulug

⁶‍gvt radam la gaml jinbo tulungam, hoo svpur xarn bo tulungam lwwsa-lwwma bo vjam kootwl, bul mwlwngv kaabynam yaapa gob nyinum.

⁷‍Assiriyag nyega kangam bo tulug aoho mwnwg meqjo nwwnam mam mwn jilwqnum, hoo mwnwg kaabynam nyiicwr-cwrxig murty mwlwg lvgab mwn atv atam kacdvb mvnum.

⁸‍Mwn Ijipt hoqgv meqjonam mam nyirab kunam mam apaq kuma; hoggab mwnwg nyijwr yukho yaapangv mwnwg mvvngam mam mucu-mviyal soomin kunum hoo bulug kaabil yocu-yabio nyinwnam mam mwnwg aoho nyin kunum.

⁹‍Hoqgab ngo mwnnvn aby bo alaqho mwnwn jilwqnum, mwnwg kaabynam Assiriya nyi tulug alaqho jilwqnum.

¹⁰‍Hiyv mwnwn talo dvb mvnbov; bulv mwnwg nyega koam la nyem koam naareqnum; hoo mwn gab nyiloqkam, mwnwn bulv lyoqr orioq hoqgv mengnum; hoo mwnwn pw-hwwl laqm-baqm yikho, mwn dvn tulug pengko ho bulug gomcu dvga gob nyiknum.

¹¹“Mwnwg bwrm Oholiba sam kaanum, hoo Oholiba mwnwg any ham ya laabo yaab mwnwg kaabynam kac-tanyiaqkam la meqjonam mam nyinum, hoqhv mwnwg any akam looba yaab nyinum.

¹²‍Assiriya nyi tulungam, gvt rad tulungam hoo gaml jinbo tulungam, nyob panbo svtam-soruq gvtwl palaqbo tulungam, svpur xarnbo tulungam mwn kaabynum, bul mwlwngv kaabynam yaapa gob nyinum.

¹³‍Hoo ngo mwnwn kacdvb mvnam mam kaapanum; bunyi vnyiv lamta baakinb wnum.

¹⁴‍Hvbmabde mwnwg meqjonam mam hvraqb vi yaiya go nyigwqnum. Cwqc golo Kaldiya nyi tulungam lwwcw kurum dvb guss sam mvpnam mam mwn kaapanum,

¹⁵‍bulug hwwpo lo soruqkam cvciqnum, bulug dumpongam puucw mvnum, hoq mwlw hv saab tulu hvb kvvbw cwrwnum, Kaldiya gvdag nyiidu nyiv Bebilonwg nyi tulug hvb nyinum.

¹⁶‍Hwdlo mwn bulam kaapa yin, mwnwg bulam kaabynum, mwn Kaldiya gvdaho pui baqn boam kanam nvmlwqnum.

¹⁷‍Hoo Bebilon nyi tulungv mwnwn abil yubk cwrw ho haanum, hoo bulv mwnnvn bulug kaabynam hoqgv yocu-yabio nyinum. Hoo mwnwn bulv kacdvb nyixo kokw so, mwn bulug hoqgv hvnywl wkur kunum.

¹⁸‍Hwdlo mwn mwnwg meqjonam mam la mwnwg talonam mam mwlwngv cwmpw dvb nyiyi kun, ngo mwnwg any ak hoqgv hvnywl hoggub wkur kunam hvb, ngo mwnwg hoqgv hvnywl wkur kunum.

¹⁹‍Hvbsujaqkam mwn mwnwg meqjonam mam nyigwq yaiyanum, mwnwg nyijwr swwca yikho, mwn Ijipt gvdaho meqjonam mam mwwpanum

²⁰‍hoo mwnwn kaabil yocu-yabio nyinwnamv, svdam mvla svpur acamv miqnwnam hvb nyinum.

²¹‍Hoqgab no noqg nyijwr swwca yikho yocu-yabiongam nyinum, hwdlo Ijipt nyi tulungv noqg kuru haabongam soominl hoo nam bwwminum.”

²²‍Hoqgab, Oholibanga, soq sib Pwnbo At Sw bedo: “Kaato, nam aby bo tulu hoqgv nam ceekol nwqduq tayin hiyv galoqkv no hvnywl wkurnum, hoo ngo bulam noqg taqg-loosaqb ceeko mvdwb boatayin:

²³‍Bebilon nyi tulungv la Kaldiya nyi tulungv, Pekod la Soa hoo Koa, hoo bulug lvgab Assiriya nyi tulungv doonum, gvt radv la gaml jinbo tulu mwlwngv, saab tulungv la yuunam nyi tulungv, svpur xarn bo mwlwngv, kaabynam yaapa gob nyinum.

²⁴‍Hoo nyoodum hoqgv ceriot la svpur gaari ngvla nyiilu lvgab bulv nam ceeko tayin. Bulv atv nam ceeko dvb taqg-loosaqb soruq korcupdo, svtam koodo hoo saco dimbio do; hoo ngo bulam pw-hwwm dvb gvqlwq tayin, hoo bulv nam bulug pw-hwwk jaqb hwwtayin.

²⁵‍Hoo ngoqg kaaneqnam nam ceeko mvdwb jitayin, ho hoq tuluhv nam moily bioqnam hvb bioqkam yin pv. Hoq tuluhv noqg nyupum-nyurungam papaq tayin, hoo noqg mingumnam nyi tulungv lyoqr orioqb haatayin. Hoq tuluhv noqg ko tuupam la nyem koam naareq tayin, hoo noqg mingumnam tulungam wmv guiyum tayin.

²⁶‍Hoq tuluhv noqg vj tulungam kam twqbin tayin hoo noqg kangam bo gujam naareq tayin.

²⁷‍Hoqgab noqg yocu-yabio nyinam mam la meqjo dvb Ijipt gvda hoqgv nyirab kunam mam ngo twrm taikun, hoqgab no noqg vnyiqkv bulam piorabl kaakram ho Ijiptam lokkam mwwpa kuram.

²⁸“Hoqgab soq sib Pwnbo At Sw bedo: Kaato, hiyam no oyum dvn hoq alaqho nam ngo jilwq tayin, hiyam no oyuml wkurnum hoq alaq uraho jilwq tayin,

²⁹‍hoo bulv nam oyuml nam nyitayin hoo noqg bon nyijonam mwlwngam naal wgtayin hoo nam talo dvb la asar dvb apaqtayin, hoo noqg talo tvl meqjonam mam huqbin tayin. Noqg yocu-yabionamv la noqg meqjonamv

³⁰‍noqg aoho soq sib baqa paku, hoggab no nyob tulu lvgab meqjonam mam nyil no atv atam bulug murty lvgab kacdvb mvs paku.

³¹‍No noqg any lamta wkwb wpa ku; hoqgab ngo mwnwg pvtaqkam noqg alaqho gvqlwq tayin.

³²‍Soq sib Pwnbo At Sw bedo: “No noqg anyig pvtaqho twwtayin hoqhv ura gvi hoo koi dvn; nam nyirj tayin hoo bej-bepar tayin, hoggab hoqhv vigo haadwn;

³³no twwxum tvl mwwdwq opum gob dootayin. Noqg any Samariyag pvtaqhv; Koor-karaq hoo dooxa-xaaram bo pvtaqkv,

³⁴no hoqho twwtayin hoo hoqgv toxab tayin, hoo hoqg twwkiq-twwmaqkam nyamtayin, hoo noqg occam un mvgtayin; hoggab ngo goopa kun, Pwnbo At Sw bibwqdo.

³⁵‍Hoqgab soq sib Pwnbo At Sw bedo: Hoggab no ngam mwwpa kuma hoo ngam noqg langkwb joopaq paku, hoo no atv noqg yocu-yabio bvla meqjo dvb nyijongam baqtayin.”

³⁶‍At Sw ngam benum: “Nyia ko tuup, no Ohola nvla Oholibanvn pw-hwwtayin yv? Bunyig bulum-kac dvb nyinam bibwqto.

³⁷‍Hoggab bunyiv bwwxin paku, hoo bulug alaqkv lvqlw paku. Bulug murty tulu hoqgv bunyiv bwwxin paku, hoo bunyiv ngoqgab dwrbuqnam ko tulungam jijaqkam murty tulug dvs gob aky jipa ku.

³⁸‍Hoq aoho, bunyiv soq sam ngam nyipa ku: bunyiv ngoqg dvrwq namlongam la ngoqg Doonu aalam aal lookin ho kacdvb mvpa ku.

³⁹‍Hoggab bunyiv bunyig ko tulungam mengtwl bunyig murtiam pwr aky jinum, ho hoq aal lookin ho bunyiv ngoqg dvrwq namlo ho kacdvb mvnum. Hoo kaato, soq sib bunyiv ngoqg namlongam mvpku.

⁴⁰‍Bunyiv pui baqnbo nyiam jijaqkam kanam tvl, aado hoqgv nyi goqa mvnum; hoo kaato, bunyiv haanum. Hoggab bunyi gab no atv hurs tvl, noqg nyuqtuq-mooram kangam dvb mvtwl, hoo no atv kangam dvb guj gvnum.

⁴¹‍No kangam bo kartam nan aoho doodo, ho hoq agaho tebolam joop tvl no ngoqg sulum mam la kutiam tvl apnum.

⁴²‍Nyiitw mvqlwg hempwl goqr ronamv mwnwg lvgab doonum; hoo twwxum bo hvb nyinbo nyi acam go deexa-rara hoqgv boanum; hoo bulv nyem dvn tulug alaqho kooj pilwqnum, hoo bulug dumpo ho kangam bo ywr dumtup pam tulwqnum.

⁴³“Ho hiyam bwwxin xitwrtvl apaqkunam mam ngo mwnwn benum, sija bulv mwnwn meqjo jooky bo gob mvtayin, mwn jijaqkam nyitayin

⁴⁴‍Hoggab nyega gv meqjo bo dookub wnam hvbkalam, bulv mwnwg dookub wpa ku. Hoqgab yocu-yabio nyinbo Ohola la Oholiba dookub bulv wnum!

⁴⁵‍Hvbmabde bulug bwwxin ko-gab lootw bo nyi tulungv bulam pw-hwwl laqm-baqm tayin, hoo lvqlw bo nyem tulungam laqm-baqm tayin, hoggab bulv bwwxinamv la ywlw-twwnamv bulug alaqho doodo.”

⁴⁶‍Hoggab soq sib Pwnbo At Sw bedo: “Bunyiam ceeko mvdwb nyi loq mvqlw go boato, hoo bunyiam bos dvb la naareq dvb mvto.

⁴⁷‍Hoo nyi mvqlwngv bunyiam wlw hurx tayin hoo bunyiam bulug lyoqr orioq hoqgv patab tayin. Bulv bunyig nyem nyega ko tulungam mengtayin, hoo bunyig nammam wm rwpaq tayin.

⁴⁸‍Ho ngo gvdag yocu-yabio mwlwngam twryum tayin, ho soq si mwlw dvnam beo-belam namgub nyimto, hoo bunyig yocu-yabio nyinam hvb nyim kuma dvb.

⁴⁹‍Hoo bulv bunyig yocu-yabio nyinam mam bunyig aoho jikur tayin, hoo nunyiv nunyig murty xuml nyic nyijongam naatayin, hoo ngo Pwnbo At Swv hvl nunyiv cengtayin.”