Read Nyishi IJIKEL 24 Bible Online

IJIKEL 24 - Nyishi bible

IJIKEL 24

¹Vnyw kiyag pool bvrywg looyw deen aalho, At Swg gomcwrv ngam haanum:

²“Nyia ko tuup, soq aal jaqso, soq aal soqg eminam xeqp to. Soq aal so Bebilonwg lvpw atv Jerusalem mam naareq paku.

³‍Hoo taleqbo nombungam bulam doocil beto, soq sib Pwnbo At Sw bedo: “Pwcwngam haca to, ham haca to; iss loqkam toolwqto;

⁴hoqho vdin lo cinyi-cwrumgo, mwlwngam alyanbo, vlw axar vdin lo; alo dvngam booloq vlwqto.

⁵Mwlwngam jwwtw yaanbo sviyangam daalinto; hoqham wsw nvvlwq gvdwl; aljaqb xwwnu to; hoqg alo tulungam kam aljaqb xwwniaq to.

⁶“Hoqgab soq sib Pwnbo At Sw bedo: Ywlw twwnbo bopam mam mwwdwq mvto, hoqho pwcw kacbov doodwn, hoo hoq hoqgv kacbov wleq maata! Hoq hoqgv xuqma jaqb, cikin-cikin gob agab naalin dvn.

⁷‍Hoggab mwnwg ywlw twwnamv mwnwg pengko ho doodku; mwn hoqham bvbin bo wlw aoho tvp paku; mwn hoqham ked deela ho toop tvl diimwr hoqgv mwrlupnum.

⁸‍Ngoqg hang lingtwrnam mam koi yaiya dvb, ree daqdwb, ngo mwnwg ywlw twwnam mam bvbin bo wlw aoho tvl ap pakun, ho hoqham kvs nyokram.

⁹‍Hoqgab soq sib Pwnbo At Sw bedo: Ywlw twwnbo bopam mam mwwdwq mvto! Ngo kam paal apnam mam koi dvb mvtayin.

¹⁰‍Svvpo paal apnam mam, wm tolwqto, vdinam hindy jaqb xwwnu to, duiyup-twwgapam hingky jaqb mviyo to, hoo alo tulungam gumto.

¹¹‍Ho hoqham asar dvb mopio aoho twlwqto, ho hoqhv og kamyi nvpv, hoo hoqg pitolam gukam yinpv, ho hoqg kacbov hoqho jiqpaq kamyi nvpv, hoqg kacboam guxianum.

¹²‍Mwn atv bon nyinam hoqgv nyelinum; hoqg naleqgo kacbov lengpaq kuma. Hoqg kacbov wmmwm haaknum!

¹³‍Noqg kacdvb yocu-yabio nyigam gab, ngo nam dvrwq dvb mvkam yinpv hoo noqg kacnam hoqgv no dvrwq maanum, ngoqg haaxaqnam mam noqg aoho xumt maady deedib ngo nam lokkam dvrwq dvb mvkram.

¹⁴‍Ngo At Swv. Ngo agam goopa kun; hoqhv nyitayin; ngo ham nyitayin. Ngo wkur kuram; ngo ham kvvmw ram; ngo mwwkurl apaqram; noqg lamta hvbla noqg bon nyinam tulu hoqgv nam pw-hwwtayin, Pwnbo At Sw bibwqdo.”

¹⁵‍At Swg gomcwrv ngam haanum:

¹⁶“Nyia ko tuup, kaato, ngo noqg vnyiq kvvlwqnam mam lvkin ciqnyi ho naapaq tayin; hvbsujaqkam no nyix-riil ho xamabv, ho no nyiqs gokam dimabv.

¹⁷‍Svqngwq suto, hvbmabde tapa dvb xamabv; sinbo gab nyix-riimabv. Noqg dumpongam dump to, hoo noqg luxuqkam noqg lupup ho pilwqto; noqg naboram mutum maabv, ho nyi tulug dvsam dvmabv.”

¹⁸‍Ho arho ngo nyiilungam agam goonum, hoo ariyumho ngoqg nywxwngv siknum. Hoo ar rogwn so ngam gaml jik jaqb ngo nyinum.

¹⁹‍Hoo nyiilungv ngam benum, “Noqg nyidu gvdwn ham, ngul gab hognvkv hoq pagoqkam no ngulam betam ramyv?”

²⁰‍Ho ngo bulam benum, At Swg gomcwrv ngam haanum:

²¹‘Israelwg nombungam beto, soq sib Pwnbo At Sw bedo: Kaato, nulug huqlw ator largam gab, nulug vnyiq kvvlwqnam gab, hoo nulug yvjwg mwwbynam gab, ngo ngoqg dvrwq namlongam kacdvb mvtayin, hoo nulug apaq pel wleqnam ko tulungv lyoqr orioq niqtuqho haatayin.

²²‍Hoo ngo hoggub nyipa kun hvb nulv nyitayin; nulv nulug naboram mutumram, ho nyi tulug dvsam dvram.

²³‍Nulug dumpv nulug dumpo aoho dootayin hoo nulug luxuqkv nulug lupupho dootayin; nulv nyix-riil xabram, hvbmabde nulv nulug nyixiaqnam tuluho yaapaq tayin hoo akwn-akwn aoho sigin gintayin.

²⁴‍Hoqgab Ijikel nulug muxnam akgob nyitayin; mwv hoggv xeq nyipa kun ham nulv nyitayin. Hwdlo soq si haaikam ngo At Swv hvl nulv cengtayin.’

²⁵“Noqgab nyiloqkam, Nyia ko tuup, hoggub nyilakam hwdlo ngo bulug cwwgwnan tulungam, bulug hwnyir-hvmaram la yuunam mam, bulug vnyiq kvvlwqnam mam la bulug yvjwg mwwbynam mam, hoo bulug ko tulungam naapaq de aalho,

²⁶‍hoq aalam keleqbo ak nam haal puiyam betayin.

²⁷‍Hoq aalam noqg agamv keleqbo akwg aoho gamkoq tayin, hoo no agam gootayin hoo cooikab dookram. Ho no bul gab muxnam gob nyitayin, hoo ngo At Swv hvl bulv cengtayin.”