Read Nyishi IJIKEL 25 Bible Online

IJIKEL 25 - Nyishi bible

IJIKEL 25

¹At Swg gomcwrv ngam haanum:

²“Nyia ko tuup, noqg nyuqm mam Ammon nyi tulu daiyab nywwto hoo bulam ceekol nyiqry beto.

³‍Ammon nyi tulungam beto, Pwnbo At Swg gomcwram tato: Soq sib Pwnbo At Sw bedo, hoggab no benum, ‘Oa!’ ngoqg dvrwq namlongam hwdlo yu hoqham kacdvb mvnum, hoo Israelwg gvdangam hwdlo yu hoqham dooxa dvb mvnum, hoo Judag nombungam hwdlo yu bulv nyumwb wknum,

⁴‍hoqgab kaato, Dou-cagag nyiilungam nam gumn gob bwwm dvb ngo gvqlwq gvikun, hoo bulv bulug svmcwngam noqg pengko ho mvl aptayin hoo bulug doogwngam noqg pengko ho mvptayin. Bulv noqg aaxiam dvtayin, hoo bulv noqg gwwiyam twwtayin.

⁵‍Ngo Rabbangam Svjin tulug nwmw dukum koob hoo Ammonam sviya tulu gab mvtayin. Ho ngo At Swv hvl nulv cengtayin.

⁶‍Hoggab soq sib Pwnbo At Sw bedo: Hoggab no noqg alaqkam cupupl hoo noqg lupupam dudinl hoo oyumnam lvgab noqg yvjv Israelwg gvdangam ceekonum,

⁷‍hoqgab, kaato, ngo ngoqg alaqkam nam ceeko dvb yvmjin pakun, hoo nyob tulungam naareq mvdwb gvqlwq tayin. Hoo ngo nam nyiilu hoqgv mvpaqtayin hoo nam gvdaho yuupaq dvb mvtayin; ngo nam twrtayin. Ho ngo At Swv hvl no cengtayin.

⁸“Soq sib Pwnbo At Sw bedo: Hoggab Moab la Seirv benum, ‘Kaato, Judag nombungv asaq nyob mwlw hvb nyido,’

⁹‍hoqgab ngo Moab bopam hoqg bviywr-bvcaram, hoqg bopam tulungam hoqg door-doopwngam, yuunam gvdangam, Bet-jesimot, Baal-meon, hoo Kir-iataim mam mvko tayin.

¹⁰‍Dou-cagag nyiilungam gumn gob bwwm dvb hoq lvgab Ammon nyi tulungam ngo jitayin, ho Ammon nyi tulungam nyob tulug pengko ho lokkam mwwpa kuram,

¹¹‍hoo ngo Moab aoho pw-hwwl laqm-baqm tayin. Ho ngo At Swv hvl bulv cengtayin.

¹²“Soq sib Pwnbo At Sw bedo: Hoggab Idomv Juda nombungam ree daql ceeko kolonum hoo bulam vc loodab ree daqnv nyicib nyinum,

¹³‍hoqgab soq sib Pwnbo At Sw bedo, Idom mam ceekol ngo ngoqg alaqkv yvmjin tayin hoo nyia koam la svdinam mvpaq tayin. Hoo ngo hoqham dooxa dvb mvtayin; Teman hoqgv Dedan jijaq gob bulv lyoqr orioq niqtuqho haatayin.

¹⁴‍Hoo ngo ngoqg Israelwg nyiilungam Idom mam ree daqm dvb mvtayin, hoo bulv ngoqg haaxaqnam hvbla ngoqg hang lingtwrnam hvbjaq Idom mam mvtayin, hoo ngoqg ree daqnam mam bulv cengtayin, Pwnbo At Sw bibwqdo.

¹⁵“Soq sib Pwnbo At Sw bedo: Hoggab Palistan nyi tulungv ree-ngam vcjaqb dvqlwqnum hoo nywywngam twrma bo ceebiongam oyuml yvj lvgab ree daqdwb naanum,

¹⁶‍hoqgab soq sib Pwnbo At Sw bedo, Kaato, Palistan nyi tulungam ceeko dvb ngo ngoqg alaqkam yvmjin tayin, hoo ngo Keret nyi tulungam la sa-svlog soiyoq ho doon boam twryum tayin.

¹⁷‍Hang lingtwr yolu ruqnam hoqgv ngo bulam ree daql vcjaqb laqm-baqm tayin. Ho hwdlo ngoqg ree daqnam alaqkv bulug aoho laqdaq yukam, ngo At Swv hvl bulv cengtayin.”