Read Nyishi IJIKEL 26 Bible Online

IJIKEL 26 - Nyishi bible

IJIKEL 26

¹Camleq nywkin deen vnywg otuq aalwg poolho, At Swg gomcwrv ngam haanum:

²“Nyia ko tuup, hoggab Taiyarv Jerusalemwg pagoqkam benum, ‘Koxee, nyiilug tulug toggoqkv yaqpia paku; hoqhv ngam ciqko jinum. Sija mwn dooxa-xaaram duku, ngo ham mvdar tayin,’

³‍hoqgab soq sib Pwnbo At Sw bedo: Kaato, Taiyar nga, ngo nam ceeko dvn, hoo sa-svlog suduqkv hoggub duqcal ceekonam hvb, nyob tulungv naleqgo nam ceeko mvdwb boatayin.

⁴‍Bulv Taiyarg bvliam twryum tayin hoo mwnwg soja tulungam mvpia lotayin, hoo ngo mwnwg hoqgv ked diibuqkam naaxa tayin hoo mwnwn wlw lwwtaq dvb mvtayin.

⁵‍Mwn sa-svlog pengko ho wswq torkum koob nyitayin, hoggab ngo agam goopa kun, Pwnbo At Sw bibwqdo. Hoo mwn nyob tulug naareqnam gob nyitayin,

⁶‍hoo mwnwg nyem ko tulungam gvda rvviyw ho lyoqr orioqkv mengtayin. Ho ngo At Swv hvl bulv cengtayin.

⁷“Hoggab soq sib Pwnbo At Sw bedo: Kaato, nyoodum hoqgv Bebilonwg lvpw at Nebukadnejjar, lvpw at hoqgv lvpw atam, svpur la ceriot tulu lvgab, hoo svpur xarg bo nyiilungam la naleqgo sipai tulungam Taiyaram ceeko mvdwb ngo boatayin.

⁸‍Mwv noqg nyem ko tulungam gvda rvviyw ho lyoqr orioq hoqgv mengtayin. Mwv nam bvly nwqtum tayin hoo nam ceekol deeb ak yiqtum tayin, hoo nam ceekonan svtam mam paacal aptayin.

⁹‍Mwv yaap tvmwr tulungam jwwduq tvl noqg bvliam xaatab mvtayin, hoo mwwg vxy lvgab mwv noqg soja tulungam kwrtab tayin.

¹⁰‍Mwwg svpurngv naleqgo cuml wggam gab nam diimwrv joolup tayin. Svpur xarnbo nyi tulu ngvla gaari seenbo hoo ceriot tulug goqr ko-gab noqg bvliv hwqdin tayin, ho hwdlo mwv noqg toggoq tuluho haaikam bopam yaqpia bo toggoqho nyi haanam hvb haatayin.

¹¹‍mwwg svpur tulungv noqg lamta mwlwngam sojab tayin. Mwv noqg nyiilungam lyoqr orioq hoqgv mengtayin, hoo noqg swwrw rwwda tulungv deela ho taptayin.

¹²‍Bulv noqg nyetam la pudu ruugwngam naareq tayin. Bulv noqg bvliam mvpia tayin hoo noqg xinam nam tulungam twryum tayin. Noqg wlwngam la svvtaqkam hoo kediam bulv iss svra pengko ho joolwq tayin.

¹³‍Hoo ngo noqg guuly gunggangam mutum tayin, hoo noqg rwwxw-gungga yalam lokkam tapa kuram.

¹⁴‍Ngo nam wlw lwwtaqb mvtayin. No wswq torkum koob nyitayin. Nam nywywngam mvdar kuram, hoggab ngam At Sw; ngo agam goopa kun, Pwnbo At Sw bibwqdo.

¹⁵“Soq sib Pwnbo At Sw Taiyaram bedo: Hwdlo un baqnbov sig gin yukam, hwdlo noqg pengko ho mengnamv dooikam, hoo noqg tabtonam yalam soiyoq gvda tulungv tapa tvl tvmdwr ramyv?

¹⁶‍Ho sa-svlo hoqg lvpw atwg ko tuup tulungv bulug pvlw hoqgv ipoqtayin hoo bulug kamt vjam la anya jaqb vj hamnam mam pipaq tayin. Bulv atv tvmdwr dwrl vj kootayin; bulv deelaho dootayin hoo mood lwxiam tvmdwrl hoo nam bos sotayin.

¹⁷‍Hoo bulv noqg aoho nyix-riirab tayin ho nam betayin, “‘Sa-svlo ho doon bov, hoggub no yuupaq pakun, Yuunam bopama, sa-svlo ho koiboa; mwn la mwnwg ho doonbo tulungam bulug bosnam mam mwnwg ho doogw bo mwlwg aoho doom paku!

¹⁸Sija soiyoq gvdangv tvmdwr do noqg yoql dv aalho, hoo sa-svlog soiyoq gvda tulungv noqg nyil-wl doonam mam mwwdwqdo.’

¹⁹“Hoggab soq sib Pwnbo At Sw bedo: Nyi dooma bo bopam tulu hvb hwdlo nam ngo dooxa dvb mvikam, ho hwdlo noqg aoho sa-hindungam hinglup mvdwb, hoo koibo issam nam tolup mvdwb ngo boatayin,

²⁰‍ho ngo nam kolwg nyi tulungv holwqko ungngwb nam holwq mvtayin, hoo ngo nam swcw nvg niikum ho kolwg ocu-aiyabo swcw nvg niikumho doom dvb mvtayin, ho noqg ho nyi doogw kuram; hvbmabde swwl doonbo gvdangam ngo kangam dvb mvtayin.

²¹‍Ngo nam bos looda dvb twryum koob boolwqtayin, hoo no lokkam dookram. No meegaq sujaqkam, no nywywngam lokta meepa ram, Pwnbo At Sw bibwqdo.”