Read Nyishi IJIKEL 27 Bible Online

IJIKEL 27 - Nyishi bible

IJIKEL 27

¹At Swg gomcwrv ngam haanum:

²“Sija no, Nyia ko tuup, Taiyar aoho nyix-riirabto,

³‍hoo Taiyaram beto, hiyv sa-svlog haaga tuluho doodwn, ho soiyoq gvdag nyiilungam naleqgo pudu ruug boam, soq sib Pwnbo At Sw bedo: “Taiyar nga, no agam goopa ku, ‘Ngoqg kangamv kvtaq looda dvn.’

⁴Noqg vrrv sa-svlog hoobum uralo doodwn; nam mvnbov noqg kangam mam kvtaq looda dvb mvnum.

⁵Bulv Senir vm-rvsabo svvn svvtaq hoqgv nam mvnum; bulv Lebanon hoqgv sidar svvnam naalayil noqgab rwwda diidwb.

⁶Basanwg kora svvn hoqgv bulv noqg swp pwlo tulungam mvnum; Saipras soiyoqg pasa svvn hoqgv bulv noqg doopiam svvtaq puunum, ho svt vrrw lvgab ham taqtamnum.

⁷Ijipt hoqg anya jaqb topum vj hamnam mam noqg jaaj jaal wikam jet toory gob mvnam; yaj gvi lwwcw cwwmo-cwwlo bo vjam Ilisag soiyoq gvda hoqgv naalayil noqg doonyium doogw koob mvnum.

⁸Sidon gvla Arbad ho nyi doonbo tulungv noqg jaajam piol wg bov; Taiyar nga, noqg pwbwb nyilaqbo nyi tulungv noqg uraho doonum; bulv noqg iss jaajam mvbeql wgnum.

⁹Gebalwg akkam tulungv la mwnwg pwbwb nyilaqbo nyi tulungv noqg uraho doonum, noqg uko boam iss haam mvma dvb hiqtumnum; sa-svlog iss jaaj mwlw hoqg jaajam mvbeql wgbo tulungv noqg uraho doonumnoqg kwm-kor mvnam mam naako-naapeqnum.

¹⁰‍Parsiya la Lud hoo Put noqg nyob panbo sipai nyi tulub nyinum. Bulv nam svtamv la saco dimbiongam tulwq jinum; bulv nam kangam dvb jinum.

¹¹‍Arbad la Helek bunyiv noqg bvly bviywr mwlwho yvnum, hoo Gamad nyi tulungv noqg soja tuluho doonum. Bulv bulug svtam tulungam noqg bvly ho hvqyw-rwgwl apnum; bulv nam kangam looda dvb mvnum.

¹²“Tarsisv noqg dookub pudu ruanum, no koijaqb deedy luuxy gumnv noqg lvgab doogam gab; rup, dvvcw, tina, hoo pitolam noqg dupum-dvrab pam kwlynum.

¹³‍Jaban, Tubal, hoo Mesekngv noqg lvgab pudu ruunum; bulv nyi tulungam tama pwcw gob noqg pudu ruuklo kwlynum.

¹⁴‍Bet-togarma hoqgv bulv nyob panan svpur tulungam, la noqg dupum-dvrab pam svdam gob kwlynum.

¹⁵‍Dedanwg nyi tulungv noqg lvgab pudu ruunum. Soiyoq gvdangv naleqgo noqg atwg kwm-kor mvk hatwb nyinum; bulv nam svtam vxyngam la xinam svvtaqkam kor rvlayil baqanum.

¹⁶‍Siriyangv noqg lvgab pudu ruanum hoggab noqg lvgab naleqgo dvs-twwsv doonum; bulv xinam wlw lvgab, lwwcw cwwmo-cwwlo bo vj lvgab, hamnam vj lvgab, anya jaqn bo topum vj lvgab, svdin alo hoqgv kangam dvb mvnam, hoo xinam wlw rubi lvgab noqg dupum-dvrab pam kwlynum.

¹⁷‍Juda gvdangv la Israelv noqg lvgab pudu ruanum; bulv Minnitwg wtw ammam, dvsam, ngolangam, kutiam, hoo un puunanam noqg dvs-twwsam kwlynum.

¹⁸‍Damaskasv noqg lvgab pudu-ruanum, hoggab noqg lvgab koijaqb hoolu luuxy gumnv doogam gab; Helbonwg opongv hoo Saharg svcaqkv doogam gab

¹⁹‍hoo Ujal hoqg opo uppum mam bulv noqg dupum-dvrab pam; dvvcw, kassiya, hoo kalamusam noqg dvs-twws lvgab kwlynum.

²⁰‍Dootam tvl xarnan vj tulungam Deda noqg lvgab pudu-ruanum.

²¹‍Arabiya la Kedarg lvpw tuup tulungv noqg mwwsw dvb sviya ko tulungam, yaap tvmwr tulungam, hoo sibin tulungam, bulv noqg lvgab pudu-ruanum.

²²‍Seba la Raamag pudu-ruunbo tulungv noqg lvgab pudu-ruanum; bulv noqg dupum-dvrab pam aljaqnbo duiyub-twwgab ngamla mwlw xinam wlw tulungam la hunam kwlynum.

²³‍Haran, Kanne, Iden, Sebag, Assur, hoo Kilmad hoqg pudu ruunbo tulungv noqg lvgab pudu-ruanum.

²⁴‍Noqg kwm-kor mvk haty ho aljaqnbo vj tulungam, yaj bvla xinam hamnam vjam, hoo rwboq-rwsoqbo upiq tulungam, hwngkw dvbla hvlap dvb mvnam oso tulungam noqg lvgab pudu-ruanum.

²⁵‍Tarsisig iss jaaj tulungv noqg dvs-twws gab noqg lvgab wbanum. Ho no vgw dvb paateq tvl sa-svlog hoobum uralo doonum.

²⁶“Nam jaaj piol wgbo tulungv nam lvvgwb boolinv sa-svlo ura jaqb haagnum. Dou-cagag dooiyv nam sa-svlog hoobum uraho nuupianum.

²⁷Noqg nyet tulungam, noqg dupum-dvrab tulungam, noqg pudu-ruunam tulungam noqg jaaj mvbeql wgbo tulungam la noqg iss jaaj piol wgbo tulungam, noqg svvtaq jem mvnbo tulungam, noqg pudu-ruunbo tulungam, hoo noqg lvgab nyob panbo nyi tulungam, noqg lvgab jaajho wmin gvnbo tulungam noqg pengko ho doon boam, sa-svlog hoobum uraho yoqlwq tayin noqg yuupaq dv aalam.

²⁸Noqg jaaj mvbeql wgbo tulug sogoqnam yalam gvdangv tapa tvl tvmdwr dvn,

²⁹hoo bulug iss jaaj niikum hoqgv pion nanam gvbwbo mwlwngv lengtayin. Sa-svlo ho iss jaajam piol wgbo tulungv la mvbeqbo tulungv kedho daqdo

³⁰hoo nam vcjaqb sogoqnum hoo vcjaqb sogoql xabnum. Bulv bulug dumpo ho diimwram toopup sudwn hoo mubho rviyiqnum;

³¹bulv noqgab atv dum riqbinum hoo bulug hwwpoho tuila vjam hiqlwqnum, hoo noqgab bulv vc loodab mwwdwqnv yvjv hoqgv xabnum, hoo hentwr jaqb nyix-riidwn.

³²Bulug sigin ginl xabnv noqgab bulv nyix-riirab do hoo noqg aoho nyix-riido: ‘Hiyv Taiyar hvb nyidwn, sa-svlog pengko ho twrmnam ak hvb?

³³Hwdlo noqg dupum-dvrabpv sa-svlo hoqgv jaalin yin, no nyiilungam naleqgo xumt mvnum; noqg naleqgo nyetnam la pudu-ruunam lvgab no swcwg lvpw at tulungam nyet tvmnum.

³⁴Sija no sa-svlo lo gampia kunv iss ura jaqb gvmlwq paku; noqg pudu-ruunam mvla nam jaaj mvbeql wgbo mwlwngv noqg lvgab yoqlwq mingpaku.

³⁵Soiyoq ho doonbo nyi mwlwngv nam kaac-kaaya gob kaado, hoo bulug lvpw at tulug dumv bos kaapa dvb tudur-busur tvl doodo; bulug nyuqmv mooma-sasa tvl doonum.

³⁶Nyiilu pengko ho pudu-ruunbo tulungv nam tob-tai tayin; no bos jaq dvb twrta duku hoo nwrba xaqb lokkam dookram.’”