Read Nyishi IJIKEL 28 Bible Online

IJIKEL 28 - Nyishi bible

IJIKEL 28

¹At Swg gomcwrv ngam haanum:

²“Nyia ko tuup, Taiyarg lvpw tuupam beto, soq sib Pwnbo At Sw bedo: Hoggab noqg hangv lardo, hoo no benum, ‘ngo pwnbo ak gon, ngo pwnbo tulug dootam dookho, sa-svlog hoobum uraho doodwn,’ hvbsujaqkam no nyia ko akv twq hoo pwnbo ma, no noqg hangam pwnbo hang hvb mvsjaqkam—

³jvqtw jaqb no Daniyelnvn pumb-rwbin yaanam; noqg hoqgv hog akkam kvs ko dooma;

⁴noqg pumb rwnam mvla noqg cenglaqnam hoqgv no atam nyet dvb mvs pakun, hoo noqg gumn uddumho hunam la rupam nookuml ap paku;

⁵noqg pumb-rwnam hoqgv noqg pudu-ruunv noqg nyetam koi yaiya dvb tvpa ku, hoo noqg hangv noqg gumnam larg gvdo—

⁶hoqgab soq sib Pwnbo At Sw bedo: Hoggab noqg hangam no pwnbo ak gonwg hang hvb mvdwn,

⁷hoqgab, kaato, noqg aoho ngo nyoodo nyi tulungam boatayin, nyob mwlwngam kor yaan boam; hoo bulv nulug lyoqr orioqkam noqg anya dvb pumb rwnam mam ceeko dvb seqlin tayin hoo noqg kangam mam kacdvb mvtayin.

⁸Bulv nam ung uraho tuulwq tayin, hoo sa-svlog hoobum uraho no mengnamv hoggub sidwn hvb sitayin.

⁹Sija godab no bedo, ‘Ngo pwnbo akgon hv,’ nam mengbog agaho, no nyia ko ak twq, hoo pwnbo ak gon ma, nam mengbog alaq tuluho?

¹⁰Nyoodo nyi tulug alaqb no pepaql-mux mvmanam akwg sinam hvb sitayin; hoggab ngo agam goopa kun, Pwnbo At Sw bibwqdo.”

¹¹‍Hoq aoho, At Swg gomcwrv ngam haanum:

¹²“Nyia ko tuup, Taiyarg lvpw atgab nyix-riirabl, hoo mwam beto, soq sib Pwnbo At Sw bedo: “No kaagdvb kvtaq looda bov, naleqgo pumb-rwnam mvla kvtaq jaqdvb kangam dvn.

¹³No Idenho doonum, Pwnbog booluho; nam xinam wlwngv joolupnum, sardius, topaj, hoo viyin, beril, onex, hoo jaspar sappir, emerald, hoo karbunkel; hoo hun yip pwnamv nam guj mwlwqtvl hoo noqg wlw ho tvqlwqnum. Hwdlo nam pwd aalho bulv mwx-mvaqnum.

¹⁴No xuqlinam rvkybo cerub nyinum. Ngo nam pvvnum; hoo no Pwnbog dvrwqbo puutu ho doonum; hoo no wm wlw tulug pengko ho wl yvnum.

¹⁵Nam pwdwk aal hoqgv jaq noqg nyinam wnamv timb dvb nyimanum, hwdlo nam lootw maanv kaapa namgob.

¹⁶Noqg naleqgo pudu ruugam gab noqg pengko ho no yolu swcin rooxonum, hoo no nyic nyinum; hoqgab Pwnbog puutu hoqgv nam ngo kac gob joopaq paku, hoo gooyuml doogbo cerubpa, wm wlw pengko hoqgv nam ngo twryum pakun,

¹⁷Noqg kangam ko-gab noqg hangv larnum; noqg kangam ko-gab noqg pumb-rwnam mam ngo mucu-mviyanum. Ngo nam deelaho joopaqnum; ngo nam lvpw at tulug agaho torlinum, bulug durum-dvmaq vnyiqkv noqg aoho doodwn.

¹⁸Noqg mvqlw nyixiaqnam tulungv, noqg lootwb pudu ruumanamv no noqg dvrwq namlongam kacdvb mvnum; hoqgab ngo noqg pengko hoqgv wm mam gulin mvnum; hoqhv nam guiyumnum, hoo nam kaanbo nyi mwlwg agaho nam ngo swcw ao so mui cinjum gob mvknum.

¹⁹Nam cengn bo nyiilu mwlwg pengko ho nam kaac-kaaya dvb kaaknum; nam bos looda dvb twryum tadku hoo no nwrba xaqb lokkam dookram.”

²⁰‍At Swg gomcwrv ngam haanum:

²¹“Nyia ko tuup, noqg nyuqm mam Sidon daiyab nywwto, hoo mwnwn ceekol nyiqry beto

²²‍hoo beto, soq sib Pwnbo At Sw bedo: “Kaato, Sidon na, nam ngo ceeko dvn, hoo noqg pengko ho ngoqg yuunam mam ngo kaakin tayin. Hwdlo ngoqg dvrwq kwrwqkam pw-hwwnam mam mwnwn kaakin yukam hoo ngo At Swv hvl bulv cengtayin;

²³hoggab ngo dooi-palam mam mwnwg uraho kanam tayin, hoo mwnwg lamta tuluho hijum biqmin mvtayin; hoo mengnamv mwnwg pengko ho haatayin, mwnwn ceeko bo lyoqr orioqkv taqg-loosaqho dootayin. Ho ngo At Sw swv hvl bulv cengtayin.

²⁴“Hoo Israelwg nombu gob nyiloqkam dudy bo taa dookram ho bulug door-doopw mwlwngv bulam tonyum taa dudy bo hvb nyikram. Ho ngo At Swv hvl bulv cengtayin.

²⁵“Soq sib Pwnbo At Sw bedo: Hwdlo cwrsaq twqb mvnam Israelwg nombungam ngo nyiilug pengko hoqgv bookum yukam, hoo nyob nyi tulug kaagaho ngoqg dvrwq kwrwqkam kaakin yukam, ho ngoqg nyera Jakubnvn jiknum at gvdaho bulv doogw mvdwb ngo tayin.

²⁶‍Hoo bulv namlo pool hoo roo liil dootayin. Bulv bos haai maab dootayin, hwdlo bulam bos belaml mengd-puqdwb nyinbo door-doopwngam ngo pw-hwwl laqm-baqm yukam, hoo bulv bos haai maab hoqho dootayin. Ho ngo bulug Pwnbo At Swv hvl bulv cengtayin.”