Read Nyishi IJIKEL 29 Bible Online

IJIKEL 29 - Nyishi bible

IJIKEL 29

¹Vnyw nywyw deen pool bvryw deen camleq loonyi deen aalho, At Swg gomcwrv ngam haanum:

²“Nyia ko tuup, noqg nyuqm mam Ijipt gv lvpw at Paronvn ceeko to, hoo mwam la Ijipt nyi mwlwngam ceekol nyiqry beto:

³‍agam gooto hoo beto, soq sib Pwnbo At Sw bedo: “Kaato, Ijipt gv lvpw at Paronvn, ngo nam ceeko dvn, mwwg pobu tulug uraho koibo bur bumdal doon bov, ho begamv, ‘Ngoqg Nail ngoqg gvsu; hoqham ngoqg atgab ngo mvnum.’

⁴Ngo noqg coqpia ho vkaram vlwq tayin, hoo noqg pobu tulug nguiyam noqg puswqho tenggab mvtayin; hoo noqg pobu tulug ngui mwlwngam noqg puswqho tenggab boam ngo nam noqg pobu tulug pengko hoqgv lvvgwb twqlin tayin.

⁵Hoo nam la noqg pobu tulu hoqg nguiyam, ngo nam deexa-raraho joopaq tayin; no bvbinho hoptayin, hoo lvkin gob nookumko ho doorkum kuram. swcw soqg svdin tulu gabla doa pvta tulu gab ngo nam bulug dvs gob jitayin.

⁶‍Ho ngo At Swv hvl Ijipt gv ho doonbo nyi mwlwngv cengtayin. “Hoggab nulv Israelwg nombu gab rapeq beqnyia ak hvb nyipa ku;

⁷‍Hwdlo bulv nam alaqkv nootu yin, no bulug alaqkam la gorbwngam jwwtwrnum; hoo hwdlo bulv nam hiigw yin, no bulam jwwtwrnv bulug hwngkam hwqdin mvnum.

⁸‍Hoqgab soq sib Pwnbo At Sw bedo: Kaato, noqg aoho lyoqr orioqkam bwatayin, hoo hoqhv noqg nyiam la svdin tulungam mvpaq tayin,

⁹‍hoo Ijipt gv gvdangam deexa-rara bvla dooxa-xaaram taikun. Ho ngo At Swv hvl bulv cengtayin. “Hoggab no benum, ‘Nailv ngoqgv, hoo ngo ham mvnum,’

¹⁰‍hoqgab, kaato, nam la noqg pobu tulungam ngo ceeko dvn, hoo Ijipt gv gvdangam Migdol hoqgv Sien namgub, hoqgv Kuswg vrr namgob, ngo deexa-rara bvla dooxa-xaaram dvb mvtayin.

¹¹‍Hoqb nyi akkam loc dwqpeqram, hoo hoqb svdin akkam loc dwqpeqram; hoqho vnyw campy gob hog akkam doogw ram.

¹²‍Hoo ngo Ijipt gv gvdangam deexa-rara gvda pengko hoqgv deexa-rara dvb mvtayin, hoo mwnwg bopam tulungv vnyw campy gob bopam pengko ho yaqpia-yaqya tvl dootayin. Ngo Ijipt nyi tulungam nyob tulu gvla gvda tulug pengko ho cwrsaq twqb mvtayin.

¹³“Hoggab soq sib Pwnbo At Sw bedo: Vnyw campiv wnya yukam nyiilug pengko ho hiyam cwrsaq twqb mvknam mam ngo Ijipt nyi tulungam bookum tayin,

¹⁴‍hoo ngo Ijipt gv nvtaqnam mam jikur tayin hoo bulam bulug at gvda nvmcw jaq hoqgv Patros gvdaho bookur tayin, hoo bulv hoqho anyo kob lvpw-haty akwb nyitayin.

¹⁵‍Hoqhv lvpw-haty mwlwngam anyo yaanbo gob nyitayin, hoo hoqhv nywywngam lokta nyob tulug aoho yuudub swwkram. Hoo ngo bulam anyo ko dvb mvtayin hoggab bulv nywywngam lokta nyob tulug aoho pvvb bwwl doonyi gvkram.

¹⁶‍Hoo hoqhv nywywngam lokta Israel nombungam hiigw dvb nyikram, bulug nyixiaqkam kookur yukam, bulv svka gab haatayin. Ho ngo Pwnbo At Swv hvl bulv cengtayin.”

¹⁷‍Camnyi leq kvn deen vnywg otuqg poolwg otuq aalho At Swg gomcwrv ngam haanum:

¹⁸“Nyia ko tuup, Bebilonwg lvpw at Nebukadnejjar mwwg sipai yv Taiyaram ator jaqb ceeko mvdwb mvnum. Nyiicwr-cwrxig dumpongam riqbinum, hoo nyiicwr-cwrxig gorbwngam talo dvb rvbinpa, hvbsujaqkam mwv la mwwg sipai tulungv bulv mwnwn ceekol ator jaqb bon nyijongam Taiyar hoqgv hog akkam kaapa kuma.

¹⁹‍Hoqgab soq sib Pwnbo At Sw bedo: Kaato, ngo Ijipt gv gvdangam Bebilonwg lvpw at Nebukadnejjarnvn jitayin; hoo mwv hoqg gumnam baql wgtayin hoo hoqham mucu-mviyal hoo naareq tayin; hoo hoqhv mwwg sipai tulug nyijo gob nyitayin.

²⁰‍Ngo Ijipt gv gvdangam mwwg bonam nyijo gab jipa kun, hoggab bulv ngoqgab bonam nyinum, Pwnbo At Sw bibwqdo.

²¹“Hoq aalam ngo Israelwg nombuho tuuly subuqkam buqlin mvtayin, hoo ngo noqg naboram bulug pengko ho mvko tayin. Ho ngo At Swv hvl bulv cengtayin.”