Read Nyishi IJIKEL 3 Bible Online

IJIKEL 3 - Nyishi bible

IJIKEL 3

¹Hoo mwv ngam benum, “Nyia ko tuup, so hoggv xeq kaapa tayin ham no dvto. Soq tiqnam pota sam dvto, hoo wno, Israelwg nombungam agam goota.”

²‍Hoqgab ngoqg agam mam ngo gamkoqnum, hoo mwv ngam soq vtiqnam pota sam dvm dvb jinum.

³‍Hoo mwv ngam benum, “Nyia ko tuup, ngoqg nam jinam vtiqnam pota ham noqg kepongam hoodeqto hoo noqg kepongam dvdeq mvto.” Ho ngo ham dvnum, hoo hoqhv ngoqg agamlo tong ngola hvb tiiswrnum.

⁴‍Hoo mwv ngam benum, “Nyia ko tuup, Israelwg namlob wgdvl bulam ngoqg gomcwram goota.”

⁵‍Hoggab nam agam goola maanam la nyoodo agam goonbo nyiilug dookub kanam nvmlwqma, hvbmabde Israelwg namlo dvparb—

⁶‍agam cengla maanam la nyoodo agam goonbo nyiilug pengko lo kanam ma, hiyvg gomcwram no talaq maadwn. Hoggub nyijaqkam, ngo nam hvk golo kanam nyiloqkam bulv taab nvpv.

⁷‍Hvbmabde Israelwg namlongv nam mwarl tvnw kama, hoggab bulv ngam mwarl tvnw maadwn. Hoqgab Israelwg namlo nyi mwlwngv mwwlaq maanbo dumpo baqdwn hoo tamy bo hang gvdwn.

⁸‍Kaato, ngo noqg nyuqm mam bulug nyuqm moolarnam hvb moolar mvpan, hoo noqg tuqtam bulug tuqt tuqtarnam hvb mvpan.

⁹‍Wlwngam alar yaanbo lwar hvb noqg tuqtam ngo mvpa kun. Bulam bos maabv, ho bulug rogabnam mam hang homabv, hoggab bulv taleqbo namlongv.”

¹⁰‍Hoq aoho, mwv ngam benum, “Nyia ko tuup, ngoqg nam gomcwr gootanam tulungam noqg hvvjwlo svgagvrwq to, hoo noqg nyuru hoqgv tagabto.

¹¹‍Hoo nyumwb boonam noqg nyiilu dookub wno, hoo bulam agam goog dvl hoo bulam beta, bulv tag ge ho tama ge, ‘Soq sib Pwnbo At Sw bedo’.”

¹²‍Ho Yalv ngam joorabnum, hoo ngoqg langk daiya ho koijaqb nyioby hwqnam yalam tapanum: “Hogloq nyook hoqgv At Swn yuum dvn hv xinam jaqkv!”

¹³‍Hoq yal dunam hv swwnbo svdin tulug alap lvbsiq-lameq tvl yal dulinumv, hoo bulug bviywrho ceka tulug yalv dulinumv, hoo koijaqb nyioby hwqnam yalv dulinum.

¹⁴‍Ho Yalv ngam joorabnum hoo ngam jool wgnum, hoo ngoqg yal ogho ngo henc-henyal henl wnum, At Swg alaqkv ngoqg aoso ator jaqb idaqnum.

¹⁵‍Hoo ngo Tel-abib Kebar silamg nyuum tulug doogw ko dookub haanum, hoo ngo bulug doogw dookho doonum. Hoo ngo aal kvn go bulug vs-axaqnam mam doomin gvl kaanum.

¹⁶‍Hoo aal kvnv wnya kokw so, At Swg gomcwrv ngam haanum:

¹⁷“Nyia ko tuup, ngo nam Israelwg namlongam rvkybo gob mvpa kun. Hwdlo jaqkam no ngoqg agam soqgv gomcwr ak tapa baloqkam, no bulam ngoqg hoqgv beol-belam dvn hvb betayin.

¹⁸‍Ngo nyic nyia boam betayin, ‘No jvqtw jaqb sitayin,’ hoo no mwam beol belam mabnyiloqkam, ho mwwg nyic nyia lamta hoqgv mwv nyic nyia pa hvl beol belam mabnyiloqkam, mwwg swwgam ywwlin mvma bvnyiloqkam, nyic-nyia nyinbo nyi akv mwwg nyixiaq ko-gab sitayin, hvbmabde mwwg hijum mam ngo noqg alaq hoqgv naadkub nyitayin.

¹⁹‍Hvbmabde no nyic nyia boam beol belam baloqkam, hoo mwv mwwg nyic nyia hoqgv, ho mwwg nyic nyia lamta hoqgv wkur mabnyiloqkam, mwv mwwg nyixiaq gab sitayin, hvbmabde noqg yvjam no naalin sutayin.

²⁰‍Lokta, jvqtw bo nyiingv mwwg jvqtw hoqgv wkurl lootw maab nyib nyiloqkam, hoo ngo mwwg agaho duqtup ak joop tayin, mwv sitayin. Hoggab no mwam beol betam jimanum, mwv mwwg nyic gab sitayin, hoo mwwg jvqtw bon nyiknam tulungam mwwpa kuram, hvbmabde mwwg hijum mam ngo noqg alaq hoqgv naatayin.

²¹‍Hvbmabde no jvqtw bo nyiam nyic nyim maadwb beol belam baloqkam, hoo mwv nyic nyima baloqkam, hoggub nyijaqkam mwv swwtayin, hoggab mwv noqg beol belamnam mam loorwqnum, hoo noqg yvjam no naalin sutayin.”

²²‍Hoo At Swg alaqkv ngoqg aoho doonum. Hoo mwv ngam benum, “Gorabto, lywpab lengdvl wto, hoo olo ngo nam gootayin.”

²³‍Hoqgab ngo gorabnum hoo lywpab wnum, hoo kaato, Kebar silamho yuunam mam kaaknam hvb, At Swg yuunamv ho doonum, hoo ngoqg nyuqm mam ngo bobumnum.

²⁴‍Hvbmabde Yalv ngoqg urab haanum hoo ngoqg lvpiaho ngam daqmnum, hoo mwv ngam agam goonv hoo ngam benum, “Wgdvl, no noqg nam ura alo atv mutum tvl doota.

²⁵‍Hoo Nyia ko tuupa, no, kaato, osongv noqg aoho hwwtam tayin, hoo hoq oso lvgab nam leetayin, hoo no nyiilug pengko ho wla kuram.

²⁶‍Hoo ngo noqg lyolam noqg agam wtw koqduho kaqtin mvtayin, hoo no goolin kuram hoo bulam yolu ruqnyi ram, hoggab bulv taleqbo nombungv.

²⁷‍Hvbmabde hwdlo ngo noqg lvgab agam gootayin, ngo noqg agam mam gamkoq mvtayin, hoo no bulam betayin, ‘Soq sib Pwnbo At Sw bedo.’ Hiyv tadwn, mwam tamto; hoo hiyv tama dvn, mwam tama mvto, hoggab bulv taleqbo namlongv.