Read Nyishi IJIKEL 30 Bible Online

IJIKEL 30 - Nyishi bible

IJIKEL 30

¹At Swg gomcwrv ngam haanum:

²“Nyia ko tuup, nyiqry kaal hoo beto, soq sib Pwnbo At Sw bedo: “Oa hvl hoq aal gab, ‘Siginl sogoq to!’

³Hoggab aalv ogumdo, At Swg aalv ogumdo; hoq aalhv doomwq punam aal gob nyitayin nyob tulug gab twrdy mood gob nyitayin.

⁴Lyoqr orioqkv Ijipt aoho haatayin, hoo hentwr-kanyiv Kus ho dootayin, hwdlo Ijiptho mengnamv haaikam, hoo mwnwg gumnam baql wleq gvtayin, hoo mwnwg gwwlam mvpia lonum.

⁵‍Kus, hoo Put, hoo Lud, hoo Arabiya mwlwngv, hoo Libya, hoo gvdag nyiilu nyiin-orum gob nyil doon bov lyoqr orioqb haatayin.

⁶“Soq sib At Sw bedo: Hiyv Ijiptam turn bov yuupaq tayin, hoo mwnwg larnamv akob iyi kun pv; Migdol hoqgv Sien namgub bulv mwnwg uraho lyoqr orioqb haatayin, Pwnbo At Sw bibwqdo.

⁷Hoo bulv dooxa-xaaram tayin dooxa-xaaram bo gvda pengko ho dootayin, hoo bulug bopam tulungv dooxa-xaaram bo bopam tulug pengko ho dootayin.

⁸Ho ngo At Swv hvl bulv cengtayin, hwdlo ngo Ijiptam wm tolwq yukam, hoo mwnwn svka bo mwlwngv tuupa ku.

⁹“Mwum dooma bo Kus nyiilungam bos nyilam taab, hoq aalam pui baqnbo tulungv ngoqg hoqgv iss jaajib lengtayin, hoo Ijipt gv twrdy aalam, bulug aoho hentwr henamv haatayin; hoggab kaato, hoqhv haadku!

¹⁰“Soq sib Pwnbo At Sw bedo: “Bebilonwg lvpw at Nebukadnejjarg alaq hoqgv, ngo Ijipt gv gumnam twryum tayin.

¹¹Mwv la mwwg nyiilug lvgab mwam aya mwwpa maanbo nyob tulungam gvdangam twryum dvb boatayin, hoo bulug lyoqr orioqkam seqlinl Ijiptam bulv ceeko tayin hoo gvdaho mengnam rooxo tayin.

¹²Hoo ngo Nail pobungam xootwr mvtayin hoo gvdangam almab nyinbo tulug alaqho puqlwq tayin; nyoodo nyi tulug alaq hoqgv, gvda hoola hoq aoho hog mwlw doon boam ngo dooxa-xaaram dvb mvtayin; ngo At Swv; ngo agam goopa kun.

¹³“Soq sib Pwnbo At Sw bedo: “Ngo murty tulungam twryum tayin hoo guss tulungam Mempis ho twryum tayin; Ijipt gv gvda hoqgv lvpw atwg ko tuup akkam dookram; ho ngo Ijipt gvdaho bosnam mam jilwq tayin.

¹⁴Ngo Patrosam dooxa-xaaram ak gob mvtayin hoo Joan ham wm rwlwq tayin hoo Tebesnvn pw-hwwl laqm-baqm tayin.

¹⁵Hoo ngoqg hang lingtwrnam mam ngo Pelusiyum aoho huqpup tayin, Ijipt gv ator jaqb cwwgwnan nam, la Tebeswg nyi mvqlwngam mingtwr tayin.

¹⁶Hoo ngo Ijiptam wm rwlwq tayin; Pelusiyumv vc loodab sigin gintayin; Tebesam mvpia tayin, hoo Mempisv aalam nyemaq tulungam dvqrwq tayin.

¹⁷On gvla Pi-besetwg yaapa tulungv lyoqr orioq niqtuqb haatayin, hoo nyem dvn tulungam nyumwb bootayin

¹⁸Hwdlo ngo Ijipt gv yoqdwr lookam mvpiayin, Tehapnehes ho aalv ai gob nyitayin, hoo mwnwg atorb larnamv mwnwg uraho twryum tayin; mwnwn doomwq ak pulup tayin, hoo mwnwg nyem ko tulungam nyumwb bootayin.

¹⁹Hoqgab ngo Ijipt aoho pw-hwwl laqm-baqm tayin. Ho ngo At Swv hvl bulv cengtayin.”

²⁰‍Camleq nywkin deen vnywg otuq poolwg kvn deen aalho, At Swg gomcwrv ngam haanum:

²¹“Nyia ko tuup, ngo Ijipt gv lvpw at Parog laqpongam jwwtwr pakun, hoo kaato, hoqham atorb lyoqr orioqkam bwwm kuma dvb, unnam geem dvb un puuma pakun.

²²‍Hoqgab soq sib Pwnbo At Sw bedo: Kaato, ngo Ijipt gv lvpw at Paronvn ceeko dvn hoo mwwg laqpongam jwwtwr tayin, laqpo atorboam la jwwtwr kunam laqpo vnyi-vnyiam jwwtwr tayin, hoo mwwg alaq hoqgv lyoqr orioqkam yoql mvdwb mvtayin.

²³‍Ngo Ijipt nyi tulungam nyob tulug pengko hoola gvda mwlwho cwrsaq twqb ruqpiaq tayin.

²⁴‍Hoo Bebilonwg lvpw atwg laqpongam ngo ator dvb mvtayin hoo mwwg alaqho ngoqg lyoqr orioqkam gvqlwq tayin, hvbmabde ngo Parog laqpongam jwwtwr tayin, hoo mwv mwwg agaho vcjaqb un baqn bov sig ginam hvb sig gin tayin.

²⁵‍Bebilonwg lvpw atwg laqpongam ngo ator dvb mvtayin hvbmabde Parog laqpongv yoql tayin. Ho ngo At Swv hvl bulv cengtayin, hwdlo ngoqg lyoqr orioqkam ngo Bebilon lvpw atwg alaqho gvqlwq yin hoo mwv ham puseq layil Ijipt gvdangam ceeko tayin.

²⁶‍Hoo ngo Ijipt nyi tulungam nyob tulug pengko hoola gvda mwlwho cwrsaq twqb ruqpiaq tayin. Ho ngo At Swv hvl bulv cengtayin.”