Read Nyishi IJIKEL 31 Bible Online

IJIKEL 31 - Nyishi bible

IJIKEL 31

¹Camleq nywkin deen vnywg pool borumg otuq aalho, At Swg gomcwrv ngam haanum:

²“Nyia ko tuup, Ijipt gv lvpw at Paro nvla mwwg nyi tulungam beto: “Noqg ator hvb hiyv nyidwn?

³Kaato, Assiriyangv Lebanonho a sidar hvb nyinum, kangam bo haqbv naleq tvl nyoram doonyium mvm dvn, hoo sojab ao dvn, hoqg niqtuqkv doomwq pengko ho dvqc dvn.

⁴Ham issiv sodwn; ham urag issiv ao jaqb swwdwn, hoqg liik bviywr-bvcarg nyook ho hoqg pobu tulungam tom dvn, rongog svvn mwlw gab hoqg pobu kucw tulungam tol mvgdvn.

⁵Hoqgab hoqhv sojab aonum rongog svvn mwlwg pengko hoqgv; issiv naleqgo hoqham jigam gab hoqg haqdangv koijaqb swwnum hoo hoqg haqb tulungv aasonum

⁶Doag pvta tulungv bulug osupam hoqg haqda tuluho supnum; hoqg haqb tulug niikumho nyorog svdin tulungv bulv ko bwwnum, hoo hoqg doonyium niikumho koibo nyob tulungv doonum.

⁷Hoqg haqb tulug koiyil haqso ko-gab, hoqhv kangam alnum; hoggab hoqg rwbv naleqgo iss dookub ura jaqb meelwqnum.

⁸Pwnbo boolug sidar tulungv ham dag nyoma dvn, ho vm-rvsabo svvn tulungv hoqg haqda tulungam homyin maanum; ho pasa svvn tulu ngvkam hoqg haqb tulungam homyin maanum; Pwnbo boolug svvnv hoqg kangam mam homyin maanum.

⁹Ngo hoqg haqb tulungam mvqlwl kangam dvb mvnum, hoo Iden hoqg svvn mwlwngv ham kaabynum, hoqhv Pwnbog boolu ho daqnum.

¹⁰“Hoqgab soq sib Pwnbo At Sw bedo: Hoggab hoqhv sojab ao dvn hoo hoqg niqtuqkv doomwq pengko ho dvqc dvn, hoo hoqg ao ko-gab hoqg hangv lardwn,

¹¹‍Hoqham ngo atorbo nyob tulug nyi akwg alaqho gvqlwq tayin. Hoggub nyila kam hoqg nyic-nyia nyijo naady sanam mam mwv hoqham nyidwb nyitayin. Ngo ham lvvgwb joopaq pakun.

¹²‍Nyob tulug mwlwngam aya mwwpa yaama bo nyoodo nyi tulungv, hoqham kwrtab tvl hoo ham apaq pakun. Puutu tulug aoho la lywpa ho mwlwho hoqg haqb tulungv yoqp paku, hoo hoqg haqda tulungv gvdag pobu kucw mwlwho dwrp paku, hoo swcw soqg nyiilu mwlwngv hoqg haqb doonyium hoqgv wleq paku hoo ham apaq paku.

¹³‍Hoqg tapto kunbo svvpo aoho doag pvta tulungv hopwl doogw dvn, hoo hoqg haqb tuluho nyorog svdin tulungv sootam dvn.

¹⁴‍Soq nyinam mwlw si hvbnyiloqkam iss jinam svvnv soja swdjaqg ao ram ho bulug niqtuqkv doomwq pengko ho dvqc ram, hoo iss twwl swwnbo svvnv swd aob swwca kuram. Hoggab swcw nvg niikum bolo, nyia ko tulug pengko hoqgv, hiyv ungngwb haapa kun, hoq lvgab haaba mvdwb, sigam bul mwlwngam jipa kun.

¹⁵“Soq sib Pwnbo At Sw bedo: Hwdlo aalho sidarv Sux-ywlwb ipoqnum ngo nyix-riim dvb mvnum; ngo ham lwwrum iss lvgab tolup mvnum, hoo hoqg pobu tulungam tom mvmanum, hoo naleqgo issiv tok maanum. Ngo Lebanonam mwwdwq vj lvgab koomnum, hoo nyorog svvn mwlwngv hoqgab sidu busunum.

¹⁶‍Hoqg yoqlnam yalam tapa bo nyob tulungam ngo hwqmnum, ngo hoqham sigwg ungho ipoqbo lvgab Sux-ywlwb joopaqnum. Hoo Idenwg svvn mwlwngv la Lebanonwg svvn mwlwngv daalinam mwlwngam alyanbo, mwlwngv iss twwn boq hvnamv, swcw nvg niikum bolo mwwt-saqla kunum.

¹⁷‍Hiyam lyoqr orioq hoqgv mengnum; vv, hoqg laqpongv, hiyv hoqg doonyium niikumho nyob tulug pengko ho doonum, hoq lvgab bulv kam Sux-ywlwb ipoq mingnum.

¹⁸“Iden svvn tulug pengko hoqgv hiyam no yuunam bvla koi dvn mwwdwn? Iden svvn tulu lvgab nam swcw nvg niikumb ipoq mvtayin. No pepaql-mux mvmanam pengko ho, lyoqr orioq mengnam lvgab kartayin. “Soq si Paro la mwwg nyiilu mwlwngv, Pwnbo At Sw bibwqdo.”