Read Nyishi IJIKEL 32 Bible Online

IJIKEL 32 - Nyishi bible

IJIKEL 32

¹Camleq nywnyi deen vnywg pool camleq bvrnyi deen otuq aalho At Swg gomcwrv ngam haanum:

²“Nyia ko tuup, Ijipt gv lvpw at Paro gab nyix-riinam mam riirab gvdwl hoo mwam beto: “No atam nyob tulug pengko ho sony nyot ak gob mwwdo, hvbmabde no sa-svlog bur ak hvb nyido; noqg pobu tuluho no xipia-xiyal noqg lvpia lvgab issam jwwkub-jwwnyiab do hoo bulug pobu tulungam kacdvb mvdo.

³Soq sib Pwnbo At Sw bedo: nyiilu naleq lvgab ngoqg wswqkam ngo noqg aoho hurlup tayin, hoo bulv nam ngoqg wswq uraho tumtwl seelin tayin.

⁴Hoo ngo nam deelaho joop tayin; bvbin bo deelaho nam hurp tayin, hoo doag pvta tulungam noqg aoho doogw mvtayin, hoo swcw mwlwg svdin tulungam noqg lvgab ngo hool mvtayin.

⁵Ngo noqg vdin ayaqkam puutu tulug aoho hoo lywpa mwlwho noqg svma rooxo dvb mvtayin.

⁶Ngo gvda puutu tulu hoqgv noqg tonbo hijum lvgab biqmin mvtayin, hoo pobu kucw mwlwho noqg ui rooxo tayin.

⁷Hwdlo ngo nam mvpaqyin, ngo doangam pulup tayin hoo bulug takar tulungam kan dvb mvtayin; doomwq lvgab doonyiam ngo pulup mvtayin, hoo pool hutongv huukram.

⁸Doag kwlwq-kvlaqbo huto huunbo mwlwngam ngo noqg aoho kan dvb mvtayin, hoo noqg gvdaho kan twdwq mvtayin, Pwnbo At Sw bibwqdo.

⁹“Ngo naleqgo nyiilug hangam vs-axaq dvb mvtayin, ngo nam twrmnam mam nyob tulug pengko ho, hoo noqg cengka maanam gvda mwlwho puiyam tapa mvdwb baqayin.

¹⁰‍Ngo naleqgo nyiilungam noqg aoho kaac-kaayab kaam dvb mvtayin, hoo ngo ngoqg lyoqr orioqkam bulug agaho pwrkub-pwrxeq mvikam, noqg pagoq gab bulug lvpw atwg dumv tudur-busur tvl koor-karaq tayin, hwdlo ngoqg lyoqr-orioqkam bulam pwjwrl kaakin yin. Noqg sid aalam, nyiicwr-cwrxiv mwwg atwg swwgab, bulv mood vxiam tvmdwr tayin.

¹¹“Hoggab soq sib Pwnbo At Sw bedo: Bebilonwg lvpw atwg lyoqr orioqkv noqg aoho haatayin.

¹²‍Mwlw aya mwwpa maanbo nyob tulu ham, la ngo noqg mvqlwngam atorbo tulug lyoqr orioq niqtuqho haam dvb mvtayin. “Bulv Ijipt gv largnam mam mucu-mviya tayin, hoo hoqg mvqlwngv yuupaq tayin.

¹³Ngo svdin mwlwngam pobu soiyoq hoqgv twryum tayin; hoo nyi akkam hoqham svmgiq kuram, ho hoqham svdin lupupv cvvgiq kuram

¹⁴Ho ngo hoq issam dvrwq dvb mvtayin, hoo hoq pobu tulungam kuty biqnam hvb biqm dvb mvtayin, Pwnbo At Sw bibwqdo.

¹⁵Hwdlo ngo Ijipt gv gvdangam dooxa-xaaram dvb mvikam, hoo hwdlo gvda hoqg hog mwlw doon boam dooxa dvb mvikam, hwdlo ngo hoqho doogw bo mwlwngam jwwtab yukam, ho bulv ngam At Swv hvl cengtayin.

¹⁶‍Soq nyix-riinam tulu sam liil bedwb nyitayin; nyob tulug nyem ko tulungv sam liil betayin; Ijipt ao hoola mwnwg nyi tulug aoho bulv sam liil betayin, Pwnbo At Sw bibwqdo.”

¹⁷‍Camleq nywnyi deen vnywg pool camleq bvrnyi deen camleq loog deen aalho, At Swg gomcwrv ngam haanum:

¹⁸“Nyia ko tuup, sogoql sig gin gvdwl Ijipt mvqlw gab xabto, hoo mwnwn la koijaqb xinam nyob tulug nyem ko tulungam swcw nvg niikumb, hiyv sig ungngwb haan kun hoqb bulam kanam nvmlwqto:

¹⁹‘Hiyam no kangam ngambin yaadwn? Pepaql-mux mvmanam lvgab ipoq gvdkul hoo doonu taaku.’

²⁰‍Hiyam lyoqr orioq hoqgv mengpa kun bulv hoq pengko ho haatayin. Ijiptam lyoqr orioq niqtuqho jilwqnum; mwnwn la mwnwg mvqlwngam seel wgtayin.

²¹‍Bulug svka bo lvgab, Sux-ywlw pengko hoqgv, atorbo peelongv bulam agam gootayin: ‘Bulv ipoq paku, bulv pepaql-mux mvmanam lyoqr orioq hoqgv mengnam, lvgab hvraqb karba do.’

²²“Assiriyangv la mwnwg rolungv hoqho doodo, hoqg nyub tulungv hoq taqg-loosaqb doodo, lyoqr orioq hoqgv, bul mwlwngam mengnam,

²³‍hiyvg nyubu tulungam mwlwg niikum jaqho mvpan; hoo mwnwg rolungv mwnwg nyubu taqg-loosaqho doodo, lyoqr orioq mengnam mwlw hv, hiyv swwn bog gvdaho bosam bvqmwnum.

²⁴“Elamv ho doodo, hoo mwnwg mwlw mvqlwngv mwnwg nyub taqg-loosaqb doodo; lyoqr orioq hoqgv, bul mwlwngam mengnam, hiyv pepaql-mux maanam lvgab swcw nvg niikumb haankun, hiyv swwn bog gvdaho bosam bvqmwnum; hoo hiyv sig ungngwb haakbo dookub, bulv bulug hvnywngam baqlayil innum.

²⁵‍Bulv mwnwn mengnam pengkog mwnwg mvqlwg kartaq gob mvpa ku, mwnwg nyubungv hoqg taqg-loosaqho doodo, bul mwlwngv pepaql-mux mvmanamv, lyoqr orioq hoqgv mengnamv; hoggab swwn bog gvdaho bosam bvqmwnum, hoo hiyv sig ungngwb haakbo dookub, bulv bulug hvnywngam baqlayil innum; hoo bulam mengnam pengko ho apnum.

²⁶“Mesek-Tubal hoqho doodo, hoo mwnwg mwlw mvqlwngv mwnwg nyub taqg-loosaqb doodo; pepaql-mux mvmanam mwlwngam lyoqr orioq hoqgv mengnum; hoggab bulv bulug swwn bog gvdaho bosam bvqmwnum.

²⁷‍Hoo pepaql-mux mvmanum pengko hoqgv haanbov, bulv atorbo lvgab dooba ma, hiyv Sux-ywlwb bulug nyob panan nwwxo-svtam lvgab ipoqnum, hiyvg lyoqr orioqkam bulug dumpo niikumho pvvnum, hoo hiyvg nyixiaqnamv bulug alo aoho doonum; hoggab atorbo nyi tulungam bosnamv swwn bog gvdaho doonum.

²⁸‍Hvbmabde noqgab nyiloqkam, nam vmwq-akaq dvb mvtayin hoo pepaql-mux mvmanam mam lyoqr orioqkv mengnam pengko ho kartayin.

²⁹“Idomv hoqho doodo, mwnwg lvpw atv la mwnwg lvpw atwg ko tuup tulungv doodo, bulug ator mwlwngv lyoqr orioq hoqgv mengnum lvgab karba kunum; bulv pepaql-mux mvma bo sig ungngwb ikbo lvgab karba do.

³⁰“Nyoodumg lvpw atwg ko tuup tulungv la bul mwlwngv la Sidon nyi mwlwngv, bulug ator hoqgv bos dvb nyilam ko-gab, bulv hvnywl mengnam lvgab inkun; bulv pepaql-mux mvmab lyoqr orioqkv mengnam lvgab karba nukun, hoo hiyv sig ungngwb haakbo dookub, bulv bulug hvnywngam baqlayil innum.

³¹“Hwdlo Paro bulam kaaikam, mwwg mwlw mvqlw gab mwv mwwt-saqla dvn, Paro nvla mwwg sipai tulungam lyoqr orioq hoqgv mengnum, Pwnbo At Sw bibwqdo.

³²‍Hoggab ngo swwn bog gvdaho bosam bvqmwnum; hoo pepaql-mux mvmanam pengko ho mwam karm tayin, Paro la mwwg mwlw mvqlwngam, lyoqr orioq hoqgv mengnum lvgab karba tayin, Pwnbo At Sw bibwqdo.”