Read Nyishi IJIKEL 33 Bible Online

IJIKEL 33 - Nyishi bible

IJIKEL 33

¹At Swg gomcwrv ngam haanum:

²“Nyia ko tuup, noqg nyiilungam agam googdvl hoo bulam beto, ngo gvdaho lyoqr orioqkam haam bvnyiloqkam, hoo gvdag nyiilungv bulug pengko hoqgv nyi ak xuqlinv, hoo mwam bulug rvky bob mvdwn,

³‍hoo gvdaho lyoqr orioqkv hoodunam mam kaapa yin mwv tuuly miql hoo nyiilungam beol betam bvnyiloqkam,

⁴‍hoq kokwb hiyv akgon tuuly miqnam yalam tapa tvl tvmw dvn, mwv lyoqr orioqb haadkun, mwwg hijumv mwwg atwg dumpo ho dooi kun pv.

⁵‍Mwv tuuly miqnam yalam tapanum hoo beonam mam hingkub maanum; mwwg hijumv mwwg atwg aoho haatayin. Hvbmabde mwv beonam mam tanyiloqkam, mwv mwwg atwg swwgam ywwlin ban pv.

⁶‍Hvbmabde lyoqr orioq hoodunam mam kaapa tvl rvky bov tuuly miql, ho nyiilungam beomab nyiloqkam, hoo lyoqr orioqkv haal bulug akin gokam nabnyiloqkam, hoq naanam nyi akv mwwg nyixiaq ko-gab, hvbmabde mwwg hijum gorgiam rvkybo aoho ngo pw-hwwtayin.

⁷“Hoqgab nyia ko tuup, nam, ngo Israelwg nombug gab rvkybo ak gob mvpa kun. Hwdlo jaqkam no ngoqg agam soqgv gomcwr tapa yin, no bulam ngoqg beol benam mam betam to.

⁸‍Nyic-nyiabo aka, hoggub nyilakam no sitayin hvl ngo nyic-nyia boam beikuam, hoo mwwg nyic-nyia hoqgv wkur mvdkub no beo maatwl, nyic-nyiabo nyi akv mwwg nyixiaq gab sim nyiloqkam, mwwg hijum gorgiam noqg galoqkv pw-hwwtayin.

⁹‍Hvbmabde no nyic-nyia boam mwwg nyic-nyia hoqgv wkur mvdkub beo bvnyiloqkam, hoo mwv mwwg lamta hoqgv wkur kuma baloqkam, hoq nyi akv mwwg nyixiaqgab sitayin, hvbmabde noqg yvjam no ywwlin sutayin.

¹⁰“Hoo nyia ko tuup, no, Israelwg nombungam beto, nulv soq sib benum: ‘Hoggub nyilakam ngulug nyimurv la ngulug nyicv ngulug aoso haatayin, hoo hoq tulug doogam gab ngulv yaapaq paku. Hoq nyiloqkam ngulv hoggub swwnyi tan?’

¹¹‍Bulam beto, ngo swwdy deedib, Pwnbo At Sw bibwqdo, ngo nyic-nyiabo sinam mam hemp mwwpa maadwn, hvbmabde nyic-nyia bov mwwg lamta hoqgv wkurl hoo swwto; wkurto, wkurto nulv almanbo lamta hoqgv, hoggab nulv sitayin, Israelwg nombunga?

¹²“Hoo nyia ko tuup, no, noqg nyiilungam beto, lootwbo akam lootwngv mwwg nyimur hoqgv naalin nyoram, hoo nyicbo akv mwwg nyic-nyia hoqgv wkur baloqkam mwv sikram, hoo hwdlo mwv nyic nyibnyiloqkam lootwbo akv mwwg lootw hoqgv swwnyi ram.

¹³‍Ho ngo lootwbo akam mwv jvqtw jaqb swwtayin hvl besjaqkam, hvbmabde mwv mwwg lootwngam mwwgw tvl hoo jvqtw maanboam nyibnyiloqkam, mwwg lootwb bon nyinam tulungam mwwpa kuram, hvbmabde mwv jvqtwb nyima ko-gab mwv sitayin.

¹⁴‘No hoggub nyilakam sitayin,’ hvl lokta ngo nyic-nyia boam besjaqkam, hvbmabde mwv mwwg nyic hoqgv wkurl hoo hoggv jvqtw bvla aldvn ham nyibnyiloqkam,

¹⁵‍hutanam mam nyic-nyia bov jikur kubnyiloqkam, hoggv mwv naareqnam mam jikur kubnyiloqkam, hoo jvqtw maanboam nyikmab, nyiig swwcwb swwb nyiloqkam, mwv hoggub nyilakam swwtayin; mwv sikram.

¹⁶‍Mwwg nyic nyiknum tulungam akjijaqkam mwam ceekol mwwpa jikram. Hoggv jvqtw bvla aldvn ham mwv nyipa ku; mwv hoggub nyilakam swwtayin.

¹⁷“Hwdlo bulug atwg lamtangv jvqtw maas tvl, hvbsujaqkam noqg nyiilungv bedo, ‘At Swg lamtangv jvqtw ma.’

¹⁸‍Hwdlo lootwbo mwwg lootwnam hoqgv wkurl hoo jvqtw maanboam nyibnyiloqkam, mwv hoqgab sitayin.

¹⁹‍Hoo hwdlo nyic-nyia bov mwwg nyic-nyia hoqgv wkurl hoo hoggv jvqtw bvla aldvn ham nyibnyiloqkam, hoq tulu gab mwv swwtayin.

²⁰‍Hvbsujaqkam nulv bedo, ‘At Swg lamtangv jvqtw ma.’ Israelwg nombunga, ngo nyiicwr-cwrxiam mwwg nyinam-wnam hvbjaq pw-hwwtayin.”

²¹‍Camleq nywnyi deen vnywg pool bvryw deen loog aal deenho, ngulv nyumwb swwi yikho, Jerusalem hoqgv kelinbov ngoqg dookub haanum hoo ngam betamnum, “Bopam mam jwwgeq lopaku.”

²²‍Kelinbov haama taab hoq otuq ariyumho ngoqg aoso At Swg alaqkv laqdaqnam; hoo mwv ngoqg agam mam mvko dvk moodho nyi akv ar hvvcnum, ho ngoqg agam mam mvkonum, hoo ngo gobeqmab doomanum.

²³‍At Swg gomcwrv ngam haanum:

²⁴“Nyia ko tuup, dooxa xaaram bo Israelwg gvdaho doonbo nyiilungv hvraqb bidu do, ‘Abraham nyega akin ciqnyinum, hvbsujaqkam mwv gvdangam naol doognum; hvbmabde ngulv naleqdo; hoggub nyilakam gvdangam ngulam naol doog mvdwb jipa kun.’

²⁵‍Hoqgab bulam beto, soq sib Pwnbo At Sw bedo: Nulv vdinam hijum lvgab dvtaq do hoo nulug murty tulungam nulv nywdul kaanv hoo ywlw-twwdo; hvnyiloqkam nulv gvdangam naol doog bvi yv?

²⁶‍Nulv lyoqr orioqkam hingw do, nulv bulum-kac dvb nyido, hoo nyiicwr-cwrxiv nulv mwwg door-doopw nywxwngam yocu-yabio nyido; hvnyiloqkam nulv gvdangam naol doog bvi yv?

²⁷‍Bulam soq sam beto, soq sib Pwnbo At Sw bedo: Ngo swwdy deedib, hoggub nyilakam dooxa-xaaram bo nyook doonbo tulungv lyoqr orioq niqtuqb haatayin, hoo hiyv xeq bvbin ko deela ho yvdwn ham ngo svdin tulungam cex mvtayin, hoo cwwgwnan hoola lwwpwqho doon bov dooi-palam hoqgv sitayin.

²⁸‍Hoo ngo gvdangam deexa-rara bvla dooxa-xaaram dvb mvtayin, hoo mwnwg larnamv niikam yuk nvpv, hoo Israelwg puutu tulungv deexa-rarab nyigam gab nyi akkam loc dwqpeq kuram.

²⁹‍Ho bul mwlwngv bulum-kac dvb nyigam gab, hwdlo ngo gvdangam deexa-rara dvb la dooxa-xaaram dvb mvikam, ngo At Swv hvl bulv cengtayin.

³⁰“Noqgab nyiloqkam, nyia ko tuup, noqg pagoqkam noqg nyiilungv bvly tulu hoola nam tulug viyap haaga ho, nyiicwr-cwrxiv mwwg vbw-boram akwn-akwn beminsunv bedo, ‘Haato, hoo tato, hoggv At Swg gomcwrv hoqgv haadwn.’

³¹‍Hoo nyiilug haanam hvb bulv noqg dookub haado, hoo ngoqg nyiilu hvb bulv noqg agaho doodo, hoo bulv tado hoggv no bedwn hvbmabde bulv ham nyima dvn; hoggab bulug kaaby-mwwbynam mam agam goonv bulv nyido; bulug hangv rvvsw-roogum mam tuugab do.

³²‍Hoo kaato, no bul gab tangaml tabybo guuly anyangam bemin bijbo ak hvb nyido hoo rwwxw-gunggangam mvlaq jaqdo, hoggab no hoggv benam bulv tado, hvbmabde bulv ham nyima ram.

³³‍Hwdlo soq si haaikam—hoo hoqhv haatayin! —hooxiq bulug pengko ho nyiqry benbo ak doodo hvl bulv cengtayin.”