Read Nyishi IJIKEL 34 Bible Online

IJIKEL 34 - Nyishi bible

IJIKEL 34

¹At Swg gomcwrv ngam haanum:

²“Nyia ko tuup, Israelwg sviya rvkybo tulungam ceekol nyiqry beto; sviya rvkybo tulu ngamkam nyiqry beto, hoo bulam beto, soq sib Pwnbo At Sw bedo: Oa, Israelwg sviya rvkybo tulungv nulv atam hoodu sudo! Sviya rvkybo tulungv sviyangam hooma dvn yv?

³‍Nulv oxam dvdo, nulv atv vm hoqgv vj koodo, nulv ox boam patab do, hvbmabde nulv sviyangam hooma dvn.

⁴‍Laanyi maan boam nulv atordvb mvma, vcboam mwp kuma, un gvnboam un puuma, nulv gaqxar boam bookur kuma, nulv niinboam meegaq ma, hoo nulv bulam mwswr-mvlal anya-kaasar dvb mvl doognum.

⁵‍Hoqgab bulv cwrsaq twqb nyiknum, hoggab sviya rvkybo dooma, hoo bulv nyoro dwr-pee dvs gob nyiknum.

⁶‍Ngoqg sviyangv cwrsaq twqb nyiknum; bulv puutu mwlw hoola yorn yorxho gaqkarl yvnum. Ngoqg sviyangv cwrsaq twqb swcw nvg aoho gaql yvnum, bulam kaagaql meegaqbo akkam dookma.

⁷“Hoqgab, sviya rvkybo tulu nulv, At Swg gomcwram tato:

⁸‍Ngo swwdy deedib, Pwnbo At Sw bibwqdo, hoggub nyilakam ngoqg sviyangv dwr-peeg dvggab nyipa ku, hoo ngoqg sviyangv nyorog dwr-pee mwlw dvs gob nyipa ku, hoggab hoqho sviya rvkybo dooma, hoo ngoqg sviya rvkybo tulungv ngoqg sviyangam meegaq maanum, hvbmabde sviya rvkybo tulungv bulv atv atam hool doonum, hoo ngoqg sviyangam haamanum.

⁹‍Hoqgab, sviya rvkybo tulu nul, At Swg gomcwram tato:

¹⁰‍Soq sib Pwnbo At Sw bedo, Kaato, ngo sviya rvkybo tulungam ceeko dvn, hoo bulug alaq hoqgv ngoqg sviyangam ngo hwwlin taikun hoo bulam sviyangam hoom kuram. Sviya rvkybo tulungv bulv atam hoos kuram. Bulug dvs gob nyim kuma dvb, bulug agam hoqgv ngoqg sviyangam ngo pvpy lengtayin,

¹¹“Hoggab soq sib Pwnbo At Sw bedo: Kaato, ngo, ngo atv jaq ngoqg sviyangam hwwgaql hoo bulam meegaql meelin tayin.

¹²‍Sviya rvky bov hoggub mwwg sviya pvtwngv cwrsaq twqb nyiyikam mwwg meegaqnam hvb, ngo ngoqg sviyangam meelin tayin, hoo doomwq-dooiyam gvla kan twdwq aalho bulv hogloq nyook bvxeq cwrsaq twqb gaqnum ngo bulam meelin tayin.

¹³‍Hoo nyiilu gvla gvda mwlw hoqgv ngo bulam boolinl bookum tayin, hoo bulam at gvdaho boolwq tayin. Hoo Israelwg puutu tulu hoola iss pobuho hoo nyi tulug doogw nyook mwlwho ngo bulam hootayin.

¹⁴‍Ngo bulam nwmw nviyin dviyin bo gvda, hoola Israelwg puutu tulug aongv bulug nwmw dukumko gvdab nyitayin. Hoq nwmw dvminko albo gvdaho bulv kartayin, hoo nwmw naleqgo dvminko Israelwg puutu tulug aoho bulam hootayin.

¹⁵‍Ngo atv atam ngoqg sviya rvky bob mvtayin, hoo ngo atv bulam gel karmin mvtayin, Pwnbo At Sw bibwqdo.

¹⁶‍Ngo niinboam meegaq tayin, hoo ngo gaqxar boam bookur tayin, hoo un gvnboam un puutayin, hoo xuunboam ator dvb mvtayin, hoo jwwtwl bobuq boam la ator boam ngo twryum tayin. Ngo bulam jvqtw hoqgv hootayin.

¹⁷“Nulgab nyiloqkam, ngoqg sviya pvtw, soq sib Pwnbo At Sw bedo: Kaato, sviyangv sviyag pengko ho, hoo yaap tvmwr gvla bimp pengko ho ngo pw-hwwdwn.

¹⁸‍Soq albo nwmw dvk nyook si nulgab xumt maai yv, ho nulug dvk maanam mam nulug lupupv caajabnum, ho dvrwqbo issam nulv nulug lupupv kacdvb cvvgiqnum?

¹⁹‍Hoo ngoqg sviyangam nulug lupup hoggv nulv caajab-cvvyiqnum ham dvdwb nyiky tayin, hoo nulug lupup hoggv nulv cvvgiqnum ham twwdwb nyiky tayin?

²⁰“Hoqgab, soq sib Pwnbo At Sw bulam bedo: Kaato, ngo, ngo atv jaq sviya jwwtw bo la sviya xuunboam pengko lo pw-hwwtayin.

²¹‍Hoggab nulv xuunboam bulam aadob cwrsaq twqb ruqpaq maady deedib, nulug vrrw lvgab nwqb la pabnv bulam bviywrb ruqpaqnum.

²²‍Ngoqg sviya pvtwngam ngo pvpy tayin; bulv lokkam dwr-pee dvggab nyikram. Hoo ngo sviya pengko ho xuqtayin.

²³‍Hoo bulug aoho ngo sviya rvky boloq ak mvptayin, ngoqg nyera Debid, hoo mwv bulam hootayin: mwv bulam hootayin hoo bulug sviya rvkybo akgob nyitayin.

²⁴‍Hoo ngo, At Sw bulug Pwnbob nyitayin, hoo ngoqg nyera Debid bulug pengko ho lvpw at ko tuup gob swwtayin. Ngo At Sw; ngo agam goopa kun.

²⁵“Ngo bulug lvgab swrso bo pvvbam mvtayin hoo nyoro svdin tulungam gvda hoqgv niimtayin, ho bulv hog bos haai kumab deexa-rara ngvla nyoro uraho yubnyi yinpv.

²⁶‍Hoo bulug taqg-loosaqg yorn tulungam ngo bul gab lvqc gob mwjtayin, hoo mood jaqkam ngo nyodo hom tayin; hoq tuluhv lvqc cinam gob nyitayin.

²⁷‍Hoo nyorog swwn tulungv aaxy xeetayin, hoo nyookv vly-axeqkv burl-cvrl swwtayin, hoo gvdaho bulv bos-haai kuram. Hwdlo ngo bulug dvvcw viyam naapaq yukam, hoo bulam nyera-paqn bwwnbo alaq hoqgv bulam naalin yukam, ngo At Swv hvl bulv cengtayin.

²⁸‍Bulv nyob tulug mengnam-puqnam gob nyikram, ho gvdag dwr-peengv bulam dvkram. Bulv bos haai kumab dootayin, hoo bulam bos dvb mvnbo akjijaqkam dookram.

²⁹‍Hoo gvdag dwr-kanongv bulam mviya mvma dvb, bul gab ngo xinam nwmw-nwsinam jitayin hoo nyob tulug benyi-beyanam hoqgv mwwdwq kuram.

³⁰‍Hoo ngo At Sw bulug Pwnbov bulug lvgab doodwn hvl bulv cengtayin, hoo bulv, Israelwg nombungv, ngoqg nyiilungv, Pwnbo At Sw bibwqdo.

³¹‍Hoo nulv ngoqg sviyangv, ngoqg boolu hoqgv nyia ko sviyangv, hoo ngo nulug Pwnbov, Pwnbo at Sw bibwqdo.”