Read Nyishi IJIKEL 35 Bible Online

IJIKEL 35 - Nyishi bible

IJIKEL 35

¹At Swg gomcwrv ngam haanum:

²“Nyia ko tuup, Seir puutungam ceekol noqg nyuqm mam nywwto, hoo ham ceekol nyiqry beto,

³‍hoo ham beto, soq sib Pwnbo At Sw bedo: Kaato, ngam nam ceeko dvn, Seir puutu, hoo ngoqg alaqkv nam ceeko dvb ngo ijin tayin, hoo nam ngo deexa-rara dvb la dooxa-xaaram dvb mvtayin.

⁴‍Ngo noqg bopam tulungam dooxa-xaaram dvb mvtayin hoo no deexa-rara bob nyitayin, hoo ngo At Swv hvl no cengtayin.

⁵‍Hoggab no lwxiam ceebiob nyinam mam hempnum hoo Israelwg nyiilungam dwr-kano moodho, hoo bulam laqm-bvqtwr baqnya moodho bulam lyoqr orioq niqtuqb jilwqnum,

⁶‍hoqgab, ngo swwdy deedib Pwnbo At Sw bibwqdo, ngo nam ywlw-twwm dvb mwx-mvaq tayin hoo ywlw-twwn bov nam ruqmin gvtayin; hoggab no ywlw-twwn boam oyum maanam, hoqgab ywlw-twwn bov nam ruqmin gvtayin.

⁷‍Seir puutungam ngo dooxa-xaaram dvb la deexa-rara dvb mvtayin, hoo hoqho hiyv xeq wi-wca boam mutum tayin.

⁸‍Hoo hoq puutu tulungam ngo svma rooxo dvb mvtayin. Noqg yorn tuluho hoo noqg lywpa tuluho hoo noqg pobu kucw mwlwho lyoqr orioq hoqgv mengnum rooxo tayin.

⁹‍Ngo nam lwxiam deexa-rara dvb mvtayin, hoo noqg bopam tuluho nyi dookram. Ho ngo At Swv hvl nulv cengtayin.

¹⁰“Hoggab no benum, ‘Soqg nyob luunyi si la soqg gvda vnyi si ngoqgv, hoo ngulv bulam gumn naatayin’ —At Sw hoqho doos kujaqkam—

¹¹‍hoqgab, ngo swwdy deedib, Pwnbo At Sw bibwqdvn, noqg bulam oyuml ceekonam mam haaxaq bvla kaaneql kaakin ko-gab ngo nam hvbkalam nyitayin. Hoo hwdlo ngo nam pw-hwwikam, ngo atam bulug pengko ho cengm dvb mvtayin.

¹²‍Hoo ngo At Swv hvl no cengtayin. “No Israelwg puutu tulungam ceekol bej-beparnam mam ngo tapanum, hoo begamv, ‘Bulam dooxa-xaaram dvb mvpa kun; ngulam dvmeq mvdwb bulam jipa kun.’

¹³‍Hoo noqg agam hoqgv no atv atam koi gob mvl ngam ceeko dvn, hoo ngam ceekonv noqg gomcwram naleq mvm gvdo; ngo ham tapanum.

¹⁴‍Soq sib Pwnbo At Sw bedo: hwdlo swcw bumpwngv hemp-hvnyir yukam, ngo nam dooxa-xaaram dvb mvtayin.

¹⁵‍Ngo gumn Israel nombungv dooxa-xaaram yuku ho no hoggub hemp-hvnyirnum, hvbkalam ngo noqg lvgab nyitayin; hoo Seir Puutungv la Idom ho doonbo mwlwngv dooxa-xaaram tayin. Ho ngo At Swv hvl bulv cengtayin.