Read Nyishi IJIKEL 36 Bible Online

IJIKEL 36 - Nyishi bible

IJIKEL 36

¹“Hoo no, nyia ko tuup, Israelwg puutu tulungam nyiqry beto, hoo beto, Israelwg puutu tulunga, At Swg gomcwram tato.

²‍Soq sib Pwnbo At Sw bedo: Hoggab ceebiongv nulam benum, ‘Vvbo!’ ‘Kolwg puutu tulungam ngulv gumn naapa kun,’

³‍hoqgab nyiqry beto, hoo bet, soq sib Pwnbo At Sw bedo: Bulv nulam dooxa-xaaram dvb la hoo taqg-loosaq hoqgv nulam vmwq yumgub mvnum, ho nulv nyob tulug gumn gob nyiknum, hoo nulam nyiilug nvbcwrho almab xwwmin sunam gob nyinum,

⁴‍hoqgab, Israelwg puutu tulunga, Pwnbo At Swg gomcwram tato: Puutu tulungam la yorn tulungam, pobu tulungam la lywpa tulungam, deexa-raral dooxa-xaara dvb mvnam tulungam hoo bopam haqpaqnam tulungam, ho hogloq ham nyob tulug hwwiyum tvl mengd-puqdwb nyiknam mam; Soq sib Pwnbo At Sw bedo,

⁵‍hoqgab soq sib Pwnbo At Sw bedo: Hoggub nyilakam ngoqg hooduq-kuluql kaaneql ceekonam mam ngo nyob tulug la Idomho doonbo mwlwngam agam goopa kun, ngoqg gvdangam bul atgab gumn naal bulug hangv hwnyir-hvmar lvgab bej-beparnum, ho bulv lokam nwmw dukub ko nyookam mingkum-puqkum deenam nyook gob mvkam yinpv.

⁶‍Hoqgab Israelwg gvda gab nyiqry beto, hoo puutu tulungam la yorn tulungam, pobu tulungam la lywpa tulungam beto, soq sib Pwnbo At Sw bedo: Kaato, ngoqg kaaneql hang lingtwrnam hoqgv ngo agam goopa kun, hoggab nyob tulug benyi-beyanam hoqgv nulv hentwr henpa kun.

⁷‍Hoqgab soq sib Pwnbo At Sw bedo: Ngo dingdwn nulam taqg-loosaqb hwwiyum bo nyob tuluhv bulug atwg benyi-beyanam hoqgv hentwr hen tayin.

⁸“Hvbmabde nulv, Israelwg puutu tulunga, nulug haqbv jurlin tayin hoo ngoqg Israelwg nyiilu gab nulug aaxiam xeetayin, hoggab bulv nyebia jaqb nammwb haatayin.

⁹‍Hoggab kaato, ngo nulgab, hoo ngo nulgab tobkur tayin, hoo nulv rongo mvl hoo liitayin.

¹⁰‍Hoo Israelwg nombu bupwngam, ho hoqho doonbo mwlwngam, nulug nyiilungam ngo dumtwq-miilyw dvb mvtayin. Bopam tuluho nyi doom taikun hoo dooxa-xaaram bo nyookam mvdar taikun.

¹¹‍Hoo nulug aoho ngo nyiam la svdinam swwmw mvtayin, hoo bulv dumtwq-miilyw dumtwq-miilyw tayin. Hoo otuq moodho nulv hoggub dooknum hvb doom dvb ngo nulam mvtayin, hoo nulam otuq hoqgam vigo alyadwb mvtayin. Ho ngo At Swv hvl nulv cengtayin.

¹²‍Ngo nulug aoho nyiilungam, hoo ngoqg Israel nyiilu ngamkam wl yvm tayin. Hoo bulv nam doog tayin, hoo no bulug otu gob nyitayin, hoo noqg ko hury tulungam naapaq kuram.

¹³‍Soq sib Pwnbo At Sw bedo: Hoggab bulv nulam bedo, ‘No nyiilungam twryumnum, hoo noqg nyob hoolug ko hury tulungam no naapaq kunum,’

¹⁴‍hoqgab no nyiilungam twryum kuram hoo noqg nyob hoolug ko hury tulungam naapaq kuram, Pwnbo At Sw bibwqdo.

¹⁵‍Hoo nyob tulug nam bej-beparnam mam ngo nam tapa mvkram, hoo no nyiilu tulug xima dvb nyinam mam hempa kuram hoo noqg nyookam dwqtup dvb mvkram, Pwnbo At Sw bibwqdo.”

¹⁶‍At Swg gomcwrv ngam haanum:

¹⁷“Nyia ko tuup, hwdlo Israelwg nombungv at gvdaho doonum, bulv ham bulug nyij-mujv la bulug bon tulungv kacdvb mvnum. Bulug nyij-mujv ngoqg agalo nyem akv namc dooikam dvrwq maan hvb nyidwn.

¹⁸‍Ho gvdaho bulv ywlw-twwgam gab hoo bulug murty tulu gab hoqham kacdvb mvgam gab, ngoqg hang lingtwrnam mam ngo bulug aoho huqpupnum.

¹⁹‍Nyob tulug pengko ho ngo bulam cwrsaq twqb mvnum, hoo gvda mwlwho bulv gaqkarnum. Bulug nyij-muj hvbla bulug bon nyinam tulu hvbnyijaq ngo bulam pw-hwwnum.

²⁰‍Hvbmabde hoglo jaqkam bulv nyob tulug dookub haadwk ho, bulv ngoqg dvrwqbo eminam kacdvb mvnum, hoqho nyiilungv bulam benum, ‘Soq nyiilu si At Swg nyiv, hvbsujaqkam bulv mwwg gvda hoqgv lvvgwb lengleq dvb nyiyi kubnyi.’

²¹‍Hvbmabde Israelwg nombungv nyob tulug pengko ho haalayil kacdvb mviyikam, ngoqg dvrwqbo emin gab ngo mwwnum.

²²“Hoqgab Israelwg nombungam beto, soq sib Pwnbo At Sw bedo: Israelwg nombunga, ngoqg bon nyita gvdwn si, hoqhv nulug gab ma, hvbmabde ngoqg dvrwqbo emin gab su, hogloq ham nulv nyob tulug pengko ho kacdvb nulug haak hoqgv mvnum.

²³‍Hoo ngoqg dvrwq kwrwqbo koibo eminam ngo atv nyedar tayin, hogloq ham nyob tulug pengko ho kacdvb mvpa kun, hoo hogloq ham nulv bulug pengko ho kacdvb mvpa kun. Hoo ngo At Swv hvl nyob tulungv cengtayin, hwdlo bulug vnyiq kaagaho noqg lvgab ngoqg dvrwq-kwrwqkam nyedar dvb mvtayin. At Sw bibwqdo.

²⁴‍Ngo nulam nyob tulungv la gvda mwlw hoqgv naalayil lvkin gob bookuml hoo nulug at gvdaho boolwq tayin.

²⁵‍Nulug aoho ngo dvrwqbo issam pwqyaq tayin, hoo nulug dvrwq kumanam hoqgv nulv dvrwq taikun, hoo nulug murty mwlw hoqgv nulam hwrxaq tayin.

²⁶‍Hoo nulam ngo nitbo hang ak jitayin, hoo nitbo yal ak nulug uraho ngo vlwq jitayin. Hoo nulug gv hoqg wlw hangam ngo naapaq tvl hoo nulam yan hang ak jitayin.

²⁷‍Hoo ngoqg Yalam nulug uraho ngo vlwq jitayin, hoo nulam ngoqg gaml bepkob wm dvb la ngoqg pvvb tulungam hingky jaqb tvjwl swwm dvb mvtayin.

²⁸‍Nulug ab tulungam ngo jiknum gvdaho nulv doogw tayin, hoo nulv ngoqg nyiilub nyitayin, hoo ngo nulug Pwnbob nyitayin.

²⁹‍Hoo nulug dvrwq kuma bo mwlw hoqgv ngo nulam naalin tayin. Hoo vly axeqkam naleqgo swwm dvb ngo goqa tayin hoo nulug aoho dwr-kanongv haakram.

³⁰‍Svvn tulug aaxy-amaram la rongog vly-axeqkam naleq yaiyab swwm dvb ngo mvtayin, ho nulv dwr-kano gab nyob tulug pengko nywywngam hentwr kuram.

³¹‍Ho nulv nulug almanbo lamta tulu ham, hoo nulug almanbo bon nyinam tulu ham mwwpa kuram, hoo nulv atv atam nulug nyixiaqnam gab la nulug bulum-kac dvb nyinam tulu ham oyum tayin.

³²‍Soq sam ngo nyita dvn nulv gab ma, Pwnbo At Sw bibwqdo; nulv sam cengto. Israelwg nombunga, hvnyw gvdwl hoo nulug nyij-mujam mwwyum suto.

³³“Soq sib Pwnbo At Sw bedo: Nulug nyixiaq mwlwngam nulug hoqgv ngo mvxaq de aalam, bopam tuluho ngo nyi doogwb mvtayin, hoo dooxa-xaaram bo nyook tulungam mvdar taikun.

³⁴‍Hoo deexa-rara bo gvdangam rongo mvta yukun, deexa-rara nyookam naleqgo vly-axeq swwdwb ya mvtwl wpeql kaan boam kaamdvb.

³⁵‍Hoo bulv betayin, ‘Soq dooxa-xaaram bo gvda si Iden boolu hvb yaab nyipa ku, hoo mucu-mviyanam la dooxa-xaaram bo gvdangv la bopam tulungv sija gurum nwqtuml nyi dookum kob nyidku.’

³⁶‍Ho nulug taqg-loosaqho doonbo nyob tulungv ngo At Swv hvl cengtayin; ngo yaqpia-yaqya bo nyook tulungam mvdar pakun hoo dooxa-xaaram bo gvdangam liidar pakun. Ngo At Sw; ngo agam goopa kun, hoo ngo ham nyitayin.

³⁷“Soq sib Pwnbo At Sw bedo: Ngo soq samta Israelwg nombungam ngam bul gab nyitbvk hvl kom dvb mvtayin: bulug nyiilungam sviya pvtw hvb koi yaiya go swwmw mvdwb.

³⁸‍Pwr jidynam sviya pvtw hvb, xuqbwqnam aalho Jerusalemho dvmin-twwminl soomin nan sviya pvtw hvb nyinum, hoq hvbkalam dooxa-xaaram bo bopam tuluho nyiilungv naleq tayin. Ho ngo At Swv hvl bulv cengtayin.”