Read Nyishi IJIKEL 37 Bible Online

IJIKEL 37 - Nyishi bible

IJIKEL 37

¹At Swg alaqkv ngoqg aoho laqdaqnum, hoo mwv ngam At Swg Yal lvgab boolinum hoo alo rooxo ko lywpag ra-lvpaho ngam boolwqnum.

²‍Hoo alo rooxo ko pengko ho ngam mwv bookar yvgnum, hoo kaato, hoqg lywpa aoho naleq loodag alongv doonum, hoo kaato, hoq tuluhv looram kunum.

³‍Hoo mwv ngam benum, “Nyia ko tuup, soq alo tulu si swwi yin dvi yv?” Hoo ngo birwqnum, “Pwnbo At Swa, no cengdwn.”

⁴‍Ho mwv ngam benum, “Soq alo tulu sam nyiqry bel, hoo bulam beto, looram tulunga, At Swg gomcwr sam tato.

⁵‍Soq sib Pwnbo At Sw soq alo tulu sam bedo: Kaato, ngo nulam saqm dvb miqlwq tayin hoo nulv swwtayin.

⁶‍Hoo ngo nulug aoho aiyaqlo tinglwq tayin, hoo nulug aoho aiyaq yoqpupv haatayin, hoo nulam vpin lvgab pulub tayin, hoo nulam svqlwq tayin, hoo nulv swwtayin, hoo ngo At Swv hvl nulv cengtayin.”

⁷‍Ho ngam hoggub gaml jiknum hvb ngo nyiqry benum. Hoo ngo nyiqry bidu yukho, yalv dunam go tapanum, hoo kaato, gurung-goroq dul alongv alo kalam ho xwqsiq-xwqmeql lvkin gob hookumnum.

⁸‍Hoo ngo tuugabl kaanum, hoo kaato, nulug aoho aiyaq dooknum hoo aiyaq yoqpupv bulug aoho haaknum, hoo vpinv bulam pulup kunum. Hvbmabde bulug uraho saqnamv doomanum.

⁹‍Ho mwv ngam benum, “Saqnam mam nyiqry beto, nyia ko tuup, nyiqry beto saqnam mam, soq sib Pwnbo At Sw bedo: Langk-haabo taqg-loosaq hoqgv dooiyv haato, Saqnama, hoo soq sinbo aoso svqlwqto, ho bulv swwkam yin pv.”

¹⁰‍Ho ngam gaml jikjaqb ngo nyiqry benum, hoo bulug urab saqnamv haanum, hoo bulv turabnum hoo bulv vc loodab sipai tulub nyitwl bulug lvpia ho daqnum.

¹¹‍Ho mwv ngam benum, “Nyia ko tuup, soq alo tulu si Israelwg nombungv. Kaato, bulv bedo, ‘Ngulug alo tulungv looram paku, hoo ngulug mwwgwngv niipa ku; ngulv dvrwq kwrwq dvb twryum paku.’

¹²‍Hoqgab nyiqry beto, hoo bulam beto, soq sib Pwnbo At Sw bedo: Kaato, ngo nulug nyubu tulungam mvko tayin hoo nulam nulug nyubu tulu hoqgv gorab mvtayin, ngoqg nyiilunga. Hoo ngo nulam Israelwg gvda uraho boolwq tayin.

¹³‍Hoo ngo At Swv hvl nulv cengtayin, hwdlo ngo nulug nyubu tulungam mvko yukam, hoo nulam nulug nyubu tulu hoqgv gorab mvikam, ngoqg nyiilunga.

¹⁴‍Hoo ngoqg Yalam ngo nulug uraho jilwq tayin, hoo nulv swwtayin, hoo ngo nulam nulug at gvdaho pvvtayin. Ho ngo At Swv hvl nulv cengtayin; ngo agam goopa kun, hoo ngo ham nyitayin, At Sw bibwqdo.”

¹⁵‍At Swg gomcwrv ngam haanum:

¹⁶“Nyia ko tuup, swwxo lo ak naato hoo hoq aoho xeqto, ‘Juda gab, la mwwg lvgab yvba bo Israelwg nyiilu gab’; ho swwxo akta naato hoo hoq aoho xeqto, ‘Josap (Iprayim hog swwxo) gab la mwwg lvgab yvba bo Israelwg nombu gab.’

¹⁷‍Hoo swwxo soonyiam sookin hvb xwqsiqto, ho bulv noqg alaqho sookin gob nyiyi nvpv.

¹⁸‍Hoo hwdlo noqg nyiilungv nam beikam, ‘Soq tulu si hognvkv ham no ngulam betam ram yv?’

¹⁹‍hoo bulam beto, soq sib Pwnbo At Sw bedo: Kaato, ngo Josapg swwxongam naata dukun (hogloq hv Iprayim alaqho doodwn) hoo mwwg lvgab Israelwg nyob yvba bo tulu gab. Hoo ngo hoqg swwxongam Judag lvgab xwqsiq tayin, hoo hoq tulu ham swwxo sookin gob mvtayin, ho bulv ngoqg alaqho sookin gob nyiyi nvpv.

²⁰‍Hwdlo noqg xeqnan swwxo tuluhv noqg alaqho bulug vnyiq kaagaho dooikam,

²¹‍ho bulam beto, soq sib Pwnbo At Sw bedo: Kaato, ngo Israelwg nyiilungam nyob tulug pengko hoqgv la hogloq bvxeq bulam wwm kunum naatayin, hoo bulam taqg-loosaq hoqgv bookum tayin, hoo bulam bulug at gvdaho boolwq tayin.

²²‍Hoo Israelwg puutu tulug aoho, ngo bulam nyob akin gob gvda uraho mvtayin. Hoo bulug aoho lvpw at akin go swwg mvdwb mvtayin, hoo bulv nyob vnyi gob nyikram, hoo lvpw-haty vnyi gob mvpin-mvra kuram.

²³‍Bulv atv atam bulug murty tulu lvgab hoo xima dvb, ho nyimurl kacdvb mvkram. Hvbmabde ngo bulam nyic nyil mwwjw kumab nyiknam hoqgv ywwlin tayin, hoo bulam hwrxaq tayin; hoo bulv ngoqg nyiilub nyitayin, hoo ngo bulug Pwnbob nyitayin.

²⁴“Ngoqg nyera Debid bulug aoho lvpw at gob swwg tayin, hoo bulv sviya rvkybo akin go dootayin. Bulv ngoqg pvvb tulug bekjaqb wtayin hoo ngoqg gaml tulungam hingky jaqb tvjw tayin.

²⁵‍Ngoqg nyera Jakubnvn ngoqg jinum gvdaho bulv doogw tayin, hogloq nulug ab tulungv doogw kunum. Bulv bulug ko tulungv hoo bulug ko ko siqdangv nwrba gob hoqho doogw tayin, hoo ngoqg nyera Debid bulug lvpw atwg ko tuupwb nwrba gob swwtayin.

²⁶‍Ngo swrso bo pvvbam bulug lvgab mvtayin. Hoqhv kuiyum xaqb pvvb gob dootayin. Hoo ngo bulam dumtwq-miilywl bulug gvdaho doom dvb mvtayin, hoo bulug pengko ho ngoqg dvrwq namlongam nwrba gob doom dvb mvtayin.

²⁷‍Ngoqg doogw ko nyookv bulug pengko ho dootayin, hoo ngo bulug Pwnbob nyitayin, hoo bulv ngoqg nyiilub nyitayin.

²⁸‍Ho nyob tulungv ngo At Swv hvl cengtayin, hiyv Israelam dvrwq dvb darxaqbov, hoo bulug pengko ho ngoqg dvrwq namlongv nwrba cwtam gob dootayin.”