Read Nyishi IJIKEL 38 Bible Online

IJIKEL 38 - Nyishi bible

IJIKEL 38

¹At Swg gomcwrv ngam haanum:

²“Nyia ko tuup, noqg nyuqm mam, Magog gvdag, Gog daiyab nywwto, Mesek la Tubalwg peelo bo lvpw atwg ko tuupam ceekol nyiqry kaal

³‍hoo beto, soq sib Pwnbo At Sw bedo: Kaato, Goga, Mesek la Tubalwg peelo bo lvpw atwg ko tuupam ngo nam ceeko dvn.

⁴‍Hoo ngo nam pwrkub-pwrxeq tayin hoo noqg coqklo alo ho vkar hvqlwq tayin, hoo noqg sipai mwlwngam, svpur tulungam la svpuram xargbo tulungam, illy-vgeq gvtwl doonbo mwlwngam, koi xitorbo mwlwngam, svtam-soruq koonbo mwlwngam la lyoqr orioq bwwnbo mwlwngam ngo lvvgwb boolin tayin.

⁵‍Parsiya, Kus, hoo Putv, bul mwlwngv svtam mam la saco dibio gvtwl, bulug lvgab doonum;

⁶‍Gomar la mwwg nyiilungv; nyoodum cuukiqg Bet-togarma hoqgv mwwg lvgab nyiilungv—naleqgo nyiilungv noqg lvgab doodwn.

⁷“Mwx-mvaqto hoo mwx-mvaqtvl dooto, no la noqg acam camt albo nyi hookum tanbo mwlwngv, hoo bul gab rvky bob nyito.

⁸‍Oyu jaqg kokwngam no hookum tayin. Kokwg vnyw tulungam nyob panam hoqgv nookur kunam gvdangam no ceeko tayin, Israelwg puutu tulug aoho hiyv gvda hoqgv nyiilungam naleqgo bookum kunum, hogloq ham lwxiam dooxa-xaaram kunum. Hoq nyiilu tulu ham nyiilu hoqgv boolin kunum, hoo sija bul mwlwngv bos haai kumab doodwn.

⁹‍No doogum-dooi ak hvb nyebiab haatayin. No la noqg nyiilungam, hoo noqg lvgab nyiilu tulungv, gvdangam doomwq hvb pulup tayin.

¹⁰“Soq sib Pwnbo At Sw bedo: Hoq aalam, noqg dumpo ho mwwnamv haatayin, hoo no almab nyidy sanam mam pwr rwtayin

¹¹‍hoo beto, ‘Gvda hoqg bvly nwqtum maanam nampam tulungam ngo ceekol haatayin. Bul mwlwngv bvly nwqtum maak ho doogw do, hoo viyap toggoq mvmab doodo, hiyv bos haai maab cooikab doonbo, hoq nyiilug aoho ngo haatayin,’

¹²‍nyob pal naareqnam mam la naalynam mam baql wg dvb, dooxa-xaaram bo swcwngam sija nyi doodwb mvnam mam, hoo nyob tulu nyiilu hoqgv bookum kunam mam, tuun-meengam la dvs-twwsam nookum pakun, hiyv swcwg ra-lvpaho doon boam, noqg alaqho ceeko mvtayin.

¹³‍Seba la Dedan hoo Tarsisig pudu ruunbo tulungv la nyig-wgbo tulu mwlwngv nam betayin, ‘No nyob pal naareq taab haai nvi yv? Noqg nyiilungam no naalynam tulungam, rupam la hunam, tuun-meengam hoo dvs-twwsam, naleq jaqg nyob pal naareqnam mam baqm dvb hookum mvd nvi yv?’

¹⁴“Hoqgab, nyia ko tuup, Gognvn nyiqry kaal hoo beto, soq sib Pwnbo At Sw bedo: Hwdlo ngoqg Israelwg nyiilungv bos haai maab doodu de aalam, no ham cengram yv?

¹⁵‍No nyoodum gvdag vtwr cuukiq hoqgv no la noqg nyiilu tulungv, bul mwlwngv svpur tulug aoho xarl, nyi camt ak la, atorbo sipai lvgab haatayin.

¹⁶‍Gvdangam doomwq ak hwrlupnam hvb, ngoqg Israelwg nyiilungam no ceekol hwrlup tayin. Kokwg aal tulungam ngoqg gvdangam nam ceeko mvdwb boatayin, ho ngam nyob tulungv cengtayin, noqg lvgab Gognga, ngo atv ngoqg dvrwq kwrwqkam bulug vnyiq kaagaho dardarb bedar tayin.

¹⁷“Soq sib Pwnbo At Sw bedo: No yv mwv hiyam ngo otuqho ngoqg Israelwg nyiqry benbo nyera tulungam agam goon hv, hiyam hoq moodho haatam vnyw gob nyiqry bemnum, ngo bulam ceeko mvdwb nam boanam ak hvvi yv?

¹⁸‍Hvbmabde hoq aalam, hwdlo Gog Israelwg gvdangam ceeko taab haaikam, Pwnbo At Sw bibwqdo, ngoqg hang lingtwrnam mam ngo vcjaqb haaxaq xaqrab tayin.

¹⁹‍Hoggab ngoqg kaaneqnam hoola ngoqg wm bioqnam hvb hang lingtwrnam ho ngo bibwqdvn, hoq aalam Israelwg gvdaho nyioby bit ak hwqtayin.

²⁰‍Sa-svlog nguiyam hoo doa pvta tulungam hoo nyoro svdin tulungam hoo kedho gwwn-xarnbo mwlwngam, hoo swcw nvg aoso doonbo nyiilu mwlwngv ngoqg agaho hwqtayin. Hoo gvda puutu tulungv yaql tayin, hoo bwdw dwwraqkv yaql tayin, hoo bvly mwlwngv kedho yaqp tayin.

²¹‍Ngoqg mwlwg puutu aoho Gognvn lyoqr orioq hoqgv ceeko mvdwb ngo goqlwq tayin, Pwnbo At Sw bibwqdo. Nyiicwr-cwrxig lyoqr orioqkv mwwg vbw-boram ceeko tayin.

²²‍Dooi-palam mvla ywlw-twwnam hoqgv ngo mwam pw-hwwtayin, hoo mwam la mwwg nyi tulug aoho hoo mwwg lvgab nyiilu tulug doonbo aoho ngo sibiq-raceq dvb la nyodo taangam wm bioql cumdwq nyodongam hom tayin.

²³‍Ho nyob nyi tulug vnyiq kaagaho ngoqg atornam mam la ngoqg dvrwq kwrwqnam mam ngam ceng dvb ngo kaakin tayin. Ho ngo At Swv hvl bulv cengtayin.