Read Nyishi IJIKEL 39 Bible Online

IJIKEL 39 - Nyishi bible

IJIKEL 39

¹“Hoo nyia ko tuup, no Gognvn ceekol nyiqry beto, soq sib Pwnbo At Sw bedo: Kaato, Mesek la Tubalwg lvpw atwg peelo bo ko tuup, Gognga, nam ngo ceeko dvn.

²‍Hoo nam ngo pwrkub-pwrxeq tayin hoo nam otuqb ruqlwq tayin, hoo nam nyoodumg vtwr cuukiq hoqgv booca tayin, hoo nam Israelwg puutu tulungam ceeko mvdwb bool wgtayin.

³‍Ho ngo noqg laqc alaq hoqg illiam xitwr tayin, hoo noqg lvqbwq alaq hoqg uppuqkam yoql dvb mvtayin.

⁴‍No la noqg sipai tulungv hoo noqg lvgab doonbo nyiilu mwlwngv Israelwg puutu aoho yoql tayin. Doag pvta luucw-luutam hoo nyorog svdin tulungam nam dvpaq mvdwb ngo jitayin.

⁵‍No deela bvbinho geqp tayin, hoggab Pwnbo At Sw ngo agam gool bibwq pakun.

⁶‍Magog la soiyoq gvdaho bos haai maab doonbo tulug aoho ngo wm mam kanam tayin, hoo ngo At Swv hvl bulv cengtayin.

⁷“Hoo ngoqg dvrwqbo eminam ngo Israel nyi tulug pengko ho cengm dvb mvtayin, hoo ngo lokkam ngoqg dvrwqbo eminam kacdvb mvmkuram. Hoo Israel ho Dvrwqbo Akv, ngo At Swv hvl nyob tulungv cengtayin.

⁸‍Kaato, hoqhv hoodu do hoo hoqham haam tayin, Pwnbo At Sw bibwqdo. Hoq aal hamlak ngo agam goopa kun.

⁹“Ho Israelwg bopamho doogw bo tulungv lenglayil hoo nyob panan dupum-dvrab pam, svtam-soruqkam, illy-uppuqkam, nwwxo-svtam, dvvp-daapongam wm parn dvb mvtayin; hoo bulv ham vnyw kvn go wm parntayin,

¹⁰‍hoqgab bulv rongo hoqgv la nyoro hoqgv wsw padkub nyikram, hoggab bulug panan dupum-dvrab pam wsw gob mvtayin. Bulam mucu-mviya kunbo hoqgv bulv nyob pal naareq tayin, bulam naareqbo hoqgv bulv naareq tayin, Pwnbo At Sw bibwqdo.

¹¹“Sa-svlog dou-cagag Nyiody bookwg Lywpag, Israel gvda uraho Gog gab svma liik nyook ak hoq aalam ngo jitayin. Hoqhv nyiody boonboam mutum tayin, hoggab hoqho Gog nvla mwwg mvqlw liitayin. Hoqham Hamon-gog lywpangv hvl emin tayin.

¹²‍Gvdangam mvxaq dvb, Israelwg nombungv Pool kvn gob bulam liitayin.

¹³‍Gvda hoqg nyiilungv bulam liitayin, hoo hoqhv bulam yuunam gob nyitayin hwdlo aalam ngo ngoqg yuunam mam kaakin yin, Pwnbo At Sw bibwqdo.

¹⁴‍Bulv gvdangam lwxiam gvqyiql kaam dvb nyi ata xuqlin tayin hoo nyiody boonbo tulug svma doodu boam gvdangam dvrwq dvb liipaq tayin. Pool kvnwg kokwngam bulv meetayin.

¹⁵‍Hoo hwdlo hoq gvdab nyiody booikam hiyv ak gon nyi alo kaapa baloqkam, ho mwv hoqham kaacin dvb muxtayin, ho ham liipaqbo tulungv haal Hamon-gog gv Lywpa ho liipaq maady deedib.

¹⁶(Hamona hvlakam hoq bopam mam eminam.) Hoqgab bulv gvdangam mvxaq tayin.

¹⁷“Nyia ko tuup, noqgab nyiloqkam, soq sib Pwnbo At Sw bedo: Doag pvta luucw-luutam la nyoro-deelag svdin mwlwngam beto, ‘Lvkin gob hookuml hoo haato, goqkumto taqg-loosaq mwlw hoqgam pwr jil dvmin-twwmin mvdwb ngo nulgab mwx-mvaql mudu dvn, koi jaqb pwr jil dvmin-twwminl soonam mam Israelwg puutu tulug aoho mwx-mvaqpan, hoo nulv soodinam dvto hoo hijum mam twwto.

¹⁸‍Nulv atorbo nyi tulug soodinam dvto, hoo swcw soqg lvpw atwg ko tuup tulu hijum mam twwto—yaap tvmwrg, sviya ko tulug, hoo bimp tulug, hvvb tulug, hoo Basanwg jwwtw bo svdin mwlwg hijum mam twwto.

¹⁹‍Hoo pwr jil dvmin-twwmin soomin dvb ngoqg mwx-mvaq muduko ho, nulv oxam dvbe maady deedib dvtayin, hoo nulv hijum mam twwxum maady deedib twwtayin.

²⁰‍Hoo nulv ngoqg tebolho svpur tulu lvgab ceriotam xargbo tulungam, atorbo nyiam hoo deedy lwxiam nyob panbo tulungv dvdeq dvb dvbatayin,’ Pwnbo At Sw bibwqdo.

²¹“Hoo nyob nyi tulug pengko ho ngoqg yuunam mam mvptayin, hoo ngoqg alaqkv bulug aoho laqdaqnam mam, la ngoqg pw-hwwl laqm-baqmnam mam, nyob tulungv kaapa tayin.

²²‍Israelwg nombungv ngo At Sw bulug Pwnbov hvl hoqg aal hoqgv cengtayin.

²³‍Hoo Israelwg nombungv bulug nyixiaq ko-gab bulam nyumwb leepa hvl nyob tulungv cengtayin, hoggab ngoqg nyuqm mam bulug hoqgv kvs daqdwb bulv ngoqg lvgab vc loodab bej-beparnum hoo bulam mvnyi-mviya bo alaqho bulam jiknum, hoo bulv lyoqr orioq niqtuqho haanum.

²⁴‍Bulug dvrwq mabla nyimur nyinam hvbkalam ngo bulug lvgab hog mwlwngam nyirwq kun, hoo ngoqg nyuqm mam bulug hoqgv kvsnum.

²⁵“Hoqgab soq sib Pwnbo At Sw bedo: Sija ngo Jakubnvn nvtaqnam mam jikur tayin hoo Israelwg nombu buupwngam aya mwwpa tayin, hoo ngoqg dvrwq eminam raol doog tayin.

²⁶‍Bulv bulug hvnywngam la bulug ngam ceekol al looda maab nyinyi-nyianam mam mwwpa kuram, hwdlo bulug at gvdaho bos haai kumab bulv dooi kukam hoo bulam bos belam bo nyi akkam dookram,

²⁷‍hwdlo ngo bulam nyiilu tulug pengko hoqgv bookur kunum hoo bulug ceebio gvda hoqgv bookum kunum, hoo bulug hoqgv nyob tulug kaagaho ngoqg dvrwq kwrwqkam nyedar darpa kun.

²⁸‍Ho ngo At Sw bulug Pwnbov hvl bulv cengtayin, hoggab nyob tulug pengko lo bulam ngo nyumwb kanamnum hoo bulam bulug at gvdaho hookum mvknum. Ngo bulam nyob tulug pengko ho lokkam doom kuram.

²⁹‍Hoo hwdlo ngoqg Yalam ngo Israelwg nombu aoho jilwq yin, ngoqg nyuqm mam bulug hoqgv ngo lokkam kvs kuram, Pwnbo At Sw bibwqdo.”