Read Nyishi IJIKEL 4 Bible Online

IJIKEL 4 - Nyishi bible

IJIKEL 4

¹“Hoo nyia ko tuup no, hita pwg naato hoo hoqham noqg agaho apto, hoo Jerusalem bopam mam hoq aoho mwiyw-mvcil mvpto.

²‍Hoo hoqho ceekol naareq tanam mam mwlwqto, hoo hoqho ceekol bvly nwqtum tanam mam mwlwqto, hoo hoqham ceekol joopaql pookuml paacanam ham mwlwqto. Hoqham ceeko bo svmcw loq ak mwlwqto, hoo taqg-loosaqb mwlwho yaap tvmwram twqswr-twqla mvdwb mwlwqto.

³‍Hoo no dvvcw poiyap lo ak naato, hoo hoqham noqg gvla bopamg pengko ho dvvcw bvly gob mvto; hoo noqg nyuqm mam hoq daiyab pwrto, hoo hoqham naareq tanam hvb nyimto, hoo ceekol nyob pvlwql naareq tanam hvb nyimto. Soq si Israelwg nombungam mwiyw-mvcil kaatam pan.

⁴“Ho noqg laqc daiyab karto, hoo Israelwg nombungam laqm baqdynam mam hoq aoho pvvl apto. Hoggab no hoq aoho hog hwd aal go kartayin, no bulug laqm baqdynam mam baqtayin.

⁵‍Hoggab ngo nam aal 390 aal gob jibwq gviyin, hoqhv bulug laqm baqdynam vnywngv homyin tayin. Hoqgab no Israel nombug laqm baqdynam mam baqtayin.

⁶‍Hoo hwdlo no soq tulu sam nyiyum yukam, no lwnyi dvb kartayin, hvbmabde noqg lvqbwq daiyab kartayin, hoo Juda nombug laqm baqdynam mam baqtayin. Aal campy go nam jibwq gviyin. aal loog hv vnyw nywx-cwr gab.

⁷‍Hoo noqg nyuqm mam no naareqnam Jerusalem daiyab pwrtayin, noqg alaq asar lvgab no bopam mam ceekol nyiqry betayin.

⁸‍Hoo kaato, ngo noqg aoho oso lvgab raqtin tayin, hwdlo nam naareqnam aal tulungv noqg ho wnya maad deedib, hoqgab no taqgon hoqgv taqgonwb tobkur nyoram.

⁹“Hoo no, wtw amlo hoo tanyeqlo, peerinlo hoo tanyeqlo, temylo hoo tailo naato, hoo hoq mwlw ham pwcw cwwkinho vlwqtvl hoqgv noqg wtwngam mvto. No aal 390 aal gob kwdwr tvl kard moodam, no hoqham dvtayin.

¹⁰‍Hoo noqg dvs dvnam mam jaaka tayin, aal loog gab sikil camnyi go jitayin; aal looxiam no hoqham dvtayin.

¹¹‍Hoo noqg iss twwnam mam xika tayin, hin hoqg pac ax gon twwtayin; aal looxiam no hoqham twwtayin.

¹²‍Hoo tanyeq wtw mvnam mam dvtayin, hoqham bulug kaagaho nyi ee lvgab boonu tayin.”

¹³‍Hoo At Sw benum, “Ngo bulam hogloq nyob tulug pengko ho ruqpaq tayin, ho Israelwg nyiilungv bulug kacbo wtwngam dvtayin.”

¹⁴‍Ho ngo benum, “Oa, Pwnbo At Sw! Kaato, ngo atv atam nywywngam kacdvb mvmanum. Ngoqg yaapa swwca hoqgv jaq sija godab ngo siram bongam ho dwr-pee cexnam mam, ho kacbo vdinam ngoqg agamlo vlwq maanum.”

¹⁵‍Ho mwv ngam benum, “Kaato, ngo nam nyi ee kwlib svv ee aoho noqg wtwngam kabyi nvpv.”

¹⁶‍Ho mwv ngam benum, “Nyia ko tuup, kaato, ngo Jerusalemho dvnam twwnam baqanam mam mutum tayin. Bulv mwwdwql xika xikal wtwngam dvtayin, hoo bulv hang hojol issam xika xikal twwtayin.

¹⁷‍Ngo soq sam nyitayin ho bulug wtwngv la issiv dooma mvdwb mvtayin, hoo hang hol akwn akwn kaagab tarab tayin, hoo bulug laqm baqgam gab yaapaq tayin.