Read Nyishi IJIKEL 40 Bible Online

IJIKEL 40 - Nyishi bible

IJIKEL 40

¹Camnyi leq nywg deen vnywg wrab dvk pool barg looyw deen aal gob ngulv nyumwb swwiyik ho, bopam mam mviyaq de kokwg camleq nywpy deen vnywg hoq aalho, At Swg alaqkv ngoqg aoso laqpnum, hoo mwv ngam bopam urab boanum.

²‍Pwnbog nyiqry kaanamho ngam Israelwg gvdab boanum, hoo nyooko daiyag bopam hvb nyita bo golo, ngam ao kiigo bo puutu aoho boopnum.

³‍Hwdlo mwv ngam hoqho boanum, kaato, hoqho nyi ak doonum mwv kaadwb tama hvb nyitwl mwwg alaqho topum tan xikanan soog la rapeq soog bwwnum. Hoo mwv lamta toggoqho doqdunum.

⁴‍Hoo nyi akv ngam benum, “Nyia ko tuup, noqg vnyiq hoqgv kaato, hoo noqg nyuru hoqgv tato, hoo ngoqg nam kaakinam hog mwlwho noqg hangv tuugab to, hoggab ngo soq tulu sam nam kaakin dvb hvl ngo nam boapan. Noqg kaaknam hog mwlwngam Israelwg nombungam bibwqto.”

⁵‍Hoo dvrwq namlog lvvgwg bvly akwg taqg-loosaqkam kaato, hoo nyi akwg alaqho rapeq xikanan daag kiubit ax gob aasonum, rapeq daa-daa hv kiubit ak gogab la lvqdw gab ak gogab nyinum. Hoqgab mwv bvly hoqg jwwkam mam rapeq soogwb, hoo ao ngam rapeq soogwb xikanum.

⁶‍Ho mwv dou-cagag toggoq urab haanum, hoqg baakap caajo ywnv jurpy lwqga toggoqkam xikanum, hoqhv rapeq daagwb uranum.

⁷‍Hoo bviywrg wrw tulungv rapeq daagwb aasonum, hoo taqtv rapeq daagwb nyinum; hoo wrw pengko ngv kiubit ang gob; hoo jurpy lwqga toggoq hoqgv ura baag namgob rapeq daag gob nyinum.

⁸‍Ho mwv baag toggoqg urangam xikanum, hoqg urangv rapeq daag gob nyinum.

⁹‍Ho mwv baag toggoqkam xikanamv, hv kiubit piinnum; hoo hoqg swwrwngv kiubit vnyinum; hoo baag toggoqkv ura jaqho doonum.

¹⁰‍Hoo dou-cagag toggoq uraho taqg-loosaqb wrw oum gogaqb doonum. Wrw oum gonhv homyin lvkinum, hoo hoqg bviywrho swwrw tulungv homyin lvkin gob nyinum.

¹¹‍Ho mwv lamta toggoqg taqtam xikanum, kiubit wywnum; hoo lamta toggoq aasongv camleq oum kiubitnum.

¹²‍Wrwg bviywr ho cwqrnam ak doonum, hoqg taqg-loosaqkv kiubit ak ak gogab nyinum. Hoo taqg-loosaqg bviywrg wrw tuluhv kiubit ax gogab nyinum.

¹³‍Ho mwv toggoqg wrw hoqg naaxa akwg hoqgv wrw akwg naaxa namgob xikanum, hoqg taqtv camnyi leq ang kiubitnum; hoqg baagv tuurwq-tuutaqnum.

¹⁴‍Mwv baagamkam xikanum, hv kiubit camnyinum. Hoo lamta toggoq taqg-loosaq hv baagv.

¹⁵‍Toggoq otuq hoqgv naarab layil urag baag haagag toggoq namgub camng kiubitnum.

¹⁶‍Hoo lamta toggoqhv taqg-loosaqb pupum rooxonum, bviywr wrw tulungam goqnyo yaiya dvb urag swwrw tulug taqwb mvanum, hoo hoq hvbkalam baagv taqg-loosaqb pupum rooxonum, hoo wrw aoho pvng svvn tulungam mwiyw-mvctvl doonum.

¹⁷‍Ho mwv ngam lvvgwg baagwb boanum. Hoo kaato, hoqho pwqlw tulungv la lamtangv baagwg taqg-loosaqb doonum. Cammum pwqlw go lamtangam tuurwqnum.

¹⁸‍Hoo lamtangv toggoq tulug bviywrb soranum, toggoqg aasonam hwd kalam go aasonum. Hoqhv ako daiya lamtangv.

¹⁹‍Ho mwv ako daiyag ura toggoqkam naalayil lvvgwg toggoq namgub aadongam xikanum, hoqhv lwwg kiubitnum dou-caga gvla nyoodum daiyag toggoqkv.

²⁰‍Lvvg baag nyoodum daiyab daqbo toggoqkam, hoqg aasongam la taqtam mwv xikanum.

²¹‍Hoq bviywr hoqg taqg-loosaqho wrwngv oum gogab doonum, hoo hoqg wrwngv la hoqg baagv otuq toggoq hvb homyin lvkinum. Hoqg aasongv camng kiubitnum, hoo hoqg taqtv camnyi leq ang kiubitnum.

²²‍Hoo hoqg pupum tulungv, hoqg baagv, hoo hoqg pvng svvn tulungv dou-cagag toggoq hvbkalam homyin lvkinum. Hoo nyiv baakap kvn go caoyin hoo baagv doonum.

²³‍Hoo dou-cagag toggoq taqcgon ho nyoodum daiyag toggoqkv doonum, hoqhv baag ura toggoqb nyinum. Hoo mwv toggoq akwn hoqgv toggoq akwn namgob xikanamv, lwwg kiubitnum.

²⁴‍Hoo mwv ngam nyooko daiyab wgnum, hoo kaato, nyooko daiyaho toggoq ak doonum. Hoo mwv hoqg swwrwngam la baagam xikanum; hoq tuluhv asaq ata hvb homyinum.

²⁵‍Hoqg vnyi-vnyig wrwngv la baagv aiyinb taqg-loosaqb pupum rooxonum. Hoqg aasongv camng kiubitnum, hoo hoqg taqtv camnyi leq ang kiubitnum.

²⁶‍Hoo hoqho baakap kvn go caaikam cvvcnum, hoo hoqg baagv doonum, hoo hoqg swwrw bviywrg taqg-loosaqho pvng svvn tulungam mwiyw-mvctvl doonum.

²⁷‍Hoo nyooko daiyag baag uraho toggoq ak doonum. Hoo mwv nyooko daiyag toggoq goqgwn hoqgv goqgwn xaqb xikanamv lwwg kiubitnum.

²⁸‍Ho mwv ngam nyooko daiyag toggoqb boolayil urag baagho boanum, hoo mwv nyooko daiyag toggoqkam xikanum. Hoqhv asaq ata hvbkalam homyinum.

²⁹‍Hoqg bviywrg wrw tulungv, hoqg swwrw tulungv, hoo hoqg baag ata hv asaq tulu hvb homyinum, hoo hoqg wrw gv la baagwg taqg-loosaqho pupum rooxonum. Hoqg aasongv camng kiubitnum, hoo hoqg taqtv camnyi leq ang kiubitnum.

³⁰‍Hoo hoqho taqg-loosaqhv wg baagv, hoqg aasongv camnyi leq ang kiubitnum hoo taqtv ang kiubitnum.

³¹‍Hoqg baagv aga daiyab tuunam, hoo pvng svvn tulungam hoq swwrw tuluho mwiyw-mvctvl doonum, hoo hoqg aongv vbia baakapv piinnum.

³²‍Ho mwv ngam dou-cagag urag baagho boolwqnum, hoo mwv toggoqkam xikanum. Hoqg asaq ata hvbkalam homyinum.

³³‍Hoqg bviywrg wrw tulungv, hoqg swwrw tulungv, hoo hoqg baagv asaq ata hvbkalam homyinum, hoo hoqg wrw gv la baagwg taqg-loosaqho pupum rooxonum. Hoqg aasongv camng kiubitnum, hoo hoqg taqtv camnyi leq ang kiubitnum.

³⁴‍Hoqg baagv aga daiyab tuunam, hoo pvng svvn tulungam taqg-loosaqb hoq swwrw tuluho mwiyw-mvctvl doonum, hoo hoqg vbia baakapv piinnum.

³⁵‍Ho mwv ngam nyoodum daiya toggoqb boolwqnum, hoo mwv ham xikanum. Hoqg asaq ata hvbkalam homyinum.

³⁶‍Hoqg bviywrg wrw tulungv, hoqg swwrw tulungv, hoo hoqg baagv asaq ata hvbkalam homyinum, hoo hoqg wrw gv la baagwg taqg-loosaqho pupum rooxonum. Hoqg aasongv camng kiubitnum, hoo hoqg taqtv camnyi leq ang kiubitnum.

³⁷‍Hoqg baagv aga daiyab tuunam, hoo hoqho pvng svvn tulungam swwrw tuluho mwiyw-mvctvl doonum, hoo hoqg vbia baakapv piinnum.

³⁸‍Toggoqg baagho viyap doonbo pwqlw ak doonum, hoqho boyuqnam pwr jita tanam mam hwrxaq dvb nyinum.

³⁹‍Hoo baagwg toggoqg taqg-loosaqho tebol pwnyig doonum, hoq aoho boyuqnam aky hoo nyic aky hoo nyixiaqnam akiam patab dvb nyinum.

⁴⁰‍Hoo nyoodum daiyag haagag toggoq bviywrg taqg-loosaqho tebol pwnyig doonum; hoo taqcgonwg baag toggoqho tebol pwnyi kalam doonum.

⁴¹‍Toggoqg taqg-loosaqb tebolv pwpy gogab, hoo tebolv piin go patab sanam mam pvvnum.

⁴²‍Hoo hoqho wlw taqnam hoqgv tebol pwpy go boqyul aky jisam pvvgwnum, hoq aasongv kiubit akla paponum, hoo hoqg aongv kiubit aknum, hoq aoho dupum-dvrab pam la boyuqnam akiam la pwr jid sanam mam mengnum.

⁴³‍Hoo lvqdw gabgwb aaso bo tookiam hoqg taqg-loosaqho taqtinum. Hoo tebol aoho aky gab soodinam joop dvb nyinum.

⁴⁴‍Ura lamta toggoq lvvgho pwqlw vnyi go doonum, akwn hv nyoodum daiyag bviywr toggoqkv nyooko daiyab tuunum, ho akwn hv nyooko daiyag toggoqkv nyoodum daiyab tuunum.

⁴⁵‍Hoo mwv ngam benum, soq pwqlw nyooko daiyab tuudwn si dvrwq namlongam nyig-wgbo nyub tulu gab doodwn,

⁴⁶‍hoo soq pwqlw nyoodum daiyab tuudwn si yugwngam nyig-wgbo nyub tulu gab doodwn. Soq tulu sam Jadok ko tuup tulungv nyitayin, hiyv Lebig ko tuup tulu pengko hoqgv bulv aro At Swn bon nyijtab ogumb haadwb nyiyi nvpv.

⁴⁷‍Hoo mwv baagam xikanum, hoqg aasongv lwwg kiubitnum hoo taqtv lwwg kiubitnum, hv cuukiq vpynum. Hoo yugwngv dvrwq namlog agaho doonum.

⁴⁸‍Ho mwv ngam dvrwq namlog baagho boolwqnum hoo baagwg swwrw tulungam xikanum, hoqhv taqg-loosaqb ang kiubitnum. Hoo toggoqg taqtv camleq vpy kiubitnum, hoo toggoq bviywrg cwqcv taqg-loosaqb oum kiubitnum.

⁴⁹‍Baag hoqg aasongv camnyi kiubit, hoo taqtv camleq vnyi kiubitnum, hoo nyiilungv baakap kvbyw go cao dvb nyinum. Hoo rwwdangv swwrw tulu taqg-loosaqb daag-daagwb doonum.