Read Nyishi IJIKEL 43 Bible Online

IJIKEL 43 - Nyishi bible

IJIKEL 43

¹Ho mwv ngam dou-cagag tuurwqbo toggoqb wgnum.

²‍Hoo kaato, Israelwg Pwnbo yuunamv dou-caga hoqgv haanum. Hoo mwwg haanam yalv iss pobu dunam hvb nyinum, hoo mwwg yuunamv swcwngam huulubnum.

³‍Hoo hwdlo mwv bopam mam twrtab haai yikho Kebar silam ho ngoqg nyiqry kaanam hvbjaq ngo nyiqriam kaanum. Hoo ngoqg nyuqm mam ngo kedho nywtinum.

⁴‍At Swg yuunamv dvrwq namlog dou-cagag toggoq hoqgv haanum,

⁵‍ho Yalv ngam aob joorabnum hoo ngam baag urab boolwqnum; hoo kaato, dvrwq namho At Swg yuunamv huupwnum.

⁶‍Ngoqg bviywrho nyi akv daqdu yukho, ho ngam dvrwq namlo hoqgv nyi ak agam goonam mam ngo tapanum,

⁷‍hoo mwv ngam benum, “Nyia ko tuup, soq si ngoqg pvlwngv hoo ngoqg lvpia dadaqko nyookv, hoqho ngo Israel nyi tulug pengko ho nwrba gob dootayin. Hoo Israelwg nombungv ngoqg dvrwqbo eminam kacdvb bulv la ho bulug lvpw at tulungv mvkram, bulug yocu-yabio nyinam hoqgv hoo bulug lvpw at tulug svmangam puutu aoho joop tvl xunam hoqgv,

⁸‍ngoqg haaga lamtangam bulug haaga lamta gob hoo ngoqg viyap yvbgw tulungam bulug viyap yvbgw gob mvnv, ngoqg gvla bulug pengko ho cwqc arongv doonum. Bulug bulum-kac dvb nyinam tulu hoqgv bulv ngoqg dvrwqbo eminam kacdvb mvnum, hoqgab ngoqg haaxaqho ngo bulam twryumnum.

⁹‍Sija bulug yocu-yabio nyinam mam la bulug lvpw atwg svmangam xunam mam ngoqg hoqgv aado mvto, hoo ngo bulug pengko ho nwrba gob dootayin.

¹⁰“Noqgab nyiloqkam, Nyia ko tuup, Israelwg nombungv dvrwq namlongam kvtaqjaqb betam to, ho bulug nyixiaqnam mam bulv hvnyw tayin; hoo bulv mwonam mam xika tayin.

¹¹‍Hoo bulug nyinam mam bulv hvnyw paknyiloqkam, bulam dvrwq namlongam hoggub mvtayin, hoqg mwi-mvcangam, hoqg doody sanam mam hoo hoqg haaga tulungam, hog bvxeq mwlwngam mvtayin ham bulam cengm to; hoo hoqg gaml bepnam tulungam hoo hoqg hog mwlw nyidy sanam mam hoo hoqg pvvb mwlwngam bulam cengm to, hoo hoqham bulug kaagaho xeql apto, ho bulv pvvb mwlwngam la gaml tulungam tagab layil hoq tulu ham bvvl swwm to.

¹²‍Soq si dvrwq namlog pvvbv: hoq gvdag puutu aog taqg-loosaqkv mwlw hv dvrwq kwrwq bob nyitayin. Kaato, soq si dvrwq namlog pvvbv.

¹³“Soq tulu sib yugwngam kiubitho xikanamv (kiubit-kiubitho hoo lvqdw gabgwb): hoqg gwwl aongv ak kiubit hoo taqtv ak kiubit tayin, ho hoqg gambv haqgwb jwwkamnum. Hoo soq sib yugw aongv nyitayin:

¹⁴‍haty gwwl akongv vnyi kiubit, ho taqtv ak kiubit tayin; hoo anyo bada hoqgv koi bada xaqb vpy kiubit, hoqg taqtv ak kiubitnum;

¹⁵‍hoo yugw gwwra lvpangv vpy kiubitnum; hoo yugw gwwra lvpa hoqgv vrrw rwwpy go odumb tuudunum.

¹⁶‍Yugw gwwra lvpangv cuukiq vpy tayin, aasongv camleq vnyi kiubit hoo taqtv camleq vnyi kiubitnum.

¹⁷‍Hoqg bada hvvkam cuukiq vpy tayin, aasongv camleq vpy kiubit hoo taqtv camleq vpy kiubitnum, ho hoqg gambv papo kiubit gob taqtnum, hoo gwwl hoqg taqg-loosaqkv ak kiubit gogaqb nyitayin. Yugwg hoqg baakap caakv dou-cagab tuutayin.”

¹⁸‍Hoo mwv ngam benum, “Nyia ko tuup, soq sib Pwnbo At Sw bedo: Soq tulu si yugw hoqg nyidy sanam pvvbv: hwdlo aalam hoqham aky gab diirab yukam hoqg aoho boyuqnam akiam la pwr jinam hijum mam hoqho pwqyaqto,

¹⁹‍Hiyv ngoqg ogumb hvvnwql ngam bon nyij dvn, Lebi nyub tulu Jadokg imiqkam no nyic gab svv hvvtw pengko hoqgv hvvb lo dorg jitayin, At Sw bibwqdo.

²⁰‍Hoo no hoqg ui loq meeg naalayil hoo ham yugwg vrrw rwwpy ho pwlwqto, hoo badag cuukiq vpy ho hoo taqg-loosaqg gamb ho pwqyaq tayin. Soq sib nyigdvl no yugwngam xeexaqto hoo hoqham pvlyw to.

²¹‍No hvvbam kam nyic aky gab naatayin, hoo hoqham dvrwq namlo lvvgwg diirwl apko ho baagdvl pwr jito.

²²‍Hoo aal loonyi dvn aalam no nyic gab bimp un-tar gvma boloq aky jitayin; hoo yugwngam hvvb lvgab pwr jil xeexaqnam hvb xeexaq tayin.

²³‍Hwdlo no ham xeexaq xaqnyia yukam, no svv hvvtw pengko hoqgv un-tar gvma hvvb loq dorg aky jitayin hoo sviya pvtw pengko hoqgv un-tar gvma yaap tvmwr loq dorg aky jitayin.

²⁴‍Hoq tulu ham At Swg agaho no aky jitayin, hoo nyub tulungv ham al taayaq tvl At Swn boyuqnam aky jitayin.

²⁵‍Aal looxiam aal kvn gob nyic gab bimp loq aky jitayin; un-tar gvma boloq svv hvvtw pengko hoqgv hvvb loq ak la sviya pvtw pengko hoqgv yaap tvmwr loq dorg jidwb nyitayin.

²⁶‍Aal kvn go yugwngam pvlywl hoo hoqham hwrxaqto, hoo hoqham garxaqto.

²⁷‍Hoo hwdlo bulv hoq aal tulu ham nyiyum yukun, ho piin dvn aal hoqgv nyub tulungv yugw ho nulug boyuqnam akiam la nulug swrsomalo akiam jirab tayin, hoo nulam ngo loorwq tayin, At Sw bibwqdo.”