Read Nyishi IJIKEL 44 Bible Online

IJIKEL 44 - Nyishi bible

IJIKEL 44

¹Ho mwv ngam dou-caga daiyab tuunbo dvrwq namlog agag toggoqb langkwb boolwqnum. Hoo hoqhv mutum tvl doonum.

²‍Hoo At Sw ngam benum, “Soq toggoq si mutum tvl dooky tayin; hoqham mvko ram, hoo hoqb nyi akkam haanyi ram, hoggab Israelwg Pwnbo At Sw hoqb haanum. Hoqgab hoqham mutum tvl dooky tayin.

³‍Lvpw atwg ko tuup arongv At Swg agaho dvs dvtab doatayin. Mwv urab baag toggoqb haatayin, hoo hoq lamta baakinb lengtayin.”

⁴‍Ho mwv ngam nyoodum daiyag toggoq hoqgv dvrwq namlog agaho boolwqnum, hoo ngo kaanum, hoo kaato, At Swg yuunamv At Sw dvrwq namlo ho huupwnum. Hoo ngoqg nyuqm mam ngo kedho nywtinum.

⁵‍Hoo At Sw ngam benum, “Nyia ko tuup, aljaqb kaagab to, noqg vnyiq jaq hoqgv kaato, hoo noqg nyuru jaq hoqgv At Swg dvrwq namlog gaml tulungam la pvvb tulu bvrwqkam tagabto. Hoo dvrwq namlog haagangam la lvvgwb lengdy koam hingky jaqb kaagab to.

⁶‍Hoo taleqbo Israelwg nombungam beto, soq sib Pwnbo At Sw bedo: Israelwg nombunga, nulug bulum-kac dvb nyinamv jotv paku,

⁷‍nyoodo nyi tulungam la hangam pepaql-mux mvma boam ngoqg dvrwq namlo lo haam pa, ho hwdlo nulv ngoqg dvs oxam la hijum mam ngam jidwk ho, ngoqg dvrwq namlongam kacdvb mvnum. Nulv ngoqg birnam pvvbam nulug bulum-kac dvb nyiknamv mvpia paku.

⁸‍Hoo nulv ngoqg dvrwqbo dupum-dvrab pam hingkib koocuml doog kuma, hvbmabde nulv nyi asaqkam ngoqg dvrwq namlongam koocum mvpa ku.

⁹“Soq sib Pwnbo At Sw bedo: Nyoodo nyiv, ho hangam la gv aiyaqkam pepaql-mux mvma bov, hoo hiyv Israelwg nyi tulu pengko ho nyoodo nyi doon bov ngoqg dvrwq namlob haanyi ram.

¹⁰‍Hvbmabde Lebi nyi tulungv hiyv ngoqg hoqgv aado kunum, ho hwdlo Israelv gaqxar yukho bulv bulug murty kokwb ngoqg hoqgv gaqlin kunum, hoqgab bulam laqm baqm tayin.

¹¹‍Bulv ngoqg dvrwq namlo ho bon nyin tulu gob dootayin, dvrwq namlog toggoqkam kvvyw-tadal hoo dvrwq namlo uraho bon nyil dootayin. Bulv boyuqnam akiam patab tayin hoo nyiilu gab pwr jitayin, hoo bulv nyi tulug agaho daqtwl bulam bon nyij tayin.

¹²‍Hoggab bulug murty tulug agaho bulv nyixiaqnamv Israelwg nombu gab dwqtup bob nyinum, hoqgab ngo bulug pagoq gab dingr pakun, Pwnbo At Sw bibwqdo, hoo bulv bulug laqm mam baqtayin.

¹³‍Bulv ngoqg ogumb hvvnwqram, ho nyubwb nyitwl ngoqgab bon nyinyi ram, ho ngoqg dvrwqbo dupum-dvrab ogumho hoo dvrwq-kwrwqbo dupum-dvrab ogumho hoojaqkam hvvnwq nyoram, hvbmabde bulv bulug bulum-kac dvb nyiknam hvnywngam baqtayin.

¹⁴‍Hvbsujaqkam ngo bulam dvrwq namlongam koocum mvdwb xuqtayin, hoo hoqg hog mwlw bonam nyim dvb hoo hoqho hognvk nyisv doodwn ham nyim dvb jitayin.

¹⁵“Hvbmabde hwdlo Israelwg nyiilungv ngoqg hoqgv gaqxar yuk ho, Lebi nyob tulug Jadokg ko tuup nyub tulungv ngoqg dvrwq namlongam koocuml pvvnum, hoq tulu si ngoqg ogumb hvvnwql ngam bon nyij tayin. Hoo bulv ngoqg agaho daqtwl oxam la hijum mam ngam aky jitayin, Pwnbo At Sw bibwqdo.

¹⁶‍Bulv ngoqg dvrwq namlob haatayin, hoo bulv ngoqg tebol ogumb haal ngam bon nyij tayin, hoo bulv ngoqg bilwqkob koocum tayin.

¹⁷‍Hwdlo bulv urag baag toggoq tuluho haaikam, bulv topum vjam koodwb nyitayin. Hwdlo bulv urag baag toggoq tulu hoola hoqg bviywrho bon nyiyikam, bulv svcaq hoqgv vj mvnam mam koodwb nyiram.

¹⁸‍Bulug dumpongam topum vj hoqgv bulv dump tayin, hoo bulug hwwpo ho ura gvnam topum vjam hiqlwq tayin. Bulv atv atam haaxor leng deenboam hiqlwq dvb nyima tayin.

¹⁹‍Hoo hwdlo bulv nyi tulu dook agag baagho lengyi kam, bulv kootwl bon nyitaqnan vjam pipaq tayin hoo ham dvrwqbo pwqlw ho doom tayin. Hoo bulv asaq vjam kootayin, hvbmab nyiloqkam bulv dvrwq kwrwq boam vjam lvgab nyi tulug pengko ho baqlin tai.

²⁰‍Bulv bulug dumpo dummam reqram ho bulug dumkwqkam aaso dvb swwm ram; bulv hoggub nyijaqkam bulug dumpo dummam hingky alwb tuqlab tvl pvvtayin.

²¹‍Hwdlo nyubv urag baag toggoqb haaikam mwv opo twwdwb nyiram.

²²‍Bulv xwwmy ge, tuminsun ge nywxw naadwb nyiram, hvbmabde Israelwg mvvngam nyijwr tulungam la nyub tulug xwwmiam nywxw naala tayin.

²³‍Bulv ngoqg nyiilungam dvrwq gvla goiya pengkog luusaq minsnam mam tomswr tayin, hoo dvrwq maanboam la dvrwq boam kaalaq mvdwb bulam kaakin tayin.

²⁴‍Yolu-swcin yukam, bulv nyegam tulu gob swwtayin, hoo bulv ngoqg pw-hwwnam hvbjaq pw-hwwtayin. Bulv ngoqg pvvbam la ngoqg gaml tulungam ngoqg xuqlinam xilo soonam tulungam pvvtayin, hoo bulv ngoqg Doonu Aalam dvrwqb pvvtayin.

²⁵‍Nyi svma ogumb wnwql bulv atv atam kacdvb mvram. Hvbmabde bulug ab gab, ho ann gab, nyega ko gab ho nyem ko gab, vbw-bor gab ho nyem wma tanbo any-bwrm gab bulv atv atam kacdvb mvkam yinpv.

²⁶‍Mwam dvrwqb mvxo kokwngam, bulv mwwg gab aal kvn go xikal doonu mvm tayin.

²⁷‍Hoo hwdlo aalam mwv urag baagho Dvrwqbo Wrwb bon nyitab haaikam, mwv mwwg nyic akiam jitayin, Pwnbo At Sw bibwqdo.

²⁸“Soq si bulug otu naady sanamv: Ngo bulug otungv: hoo nulv bulam Israel lo gumn bwwm dvb jimabv; ngo bulug gumnv.

²⁹‍Bulv cwrm-malo akiam, nyic akiam, hoo nyixiaqnam aky jikumnam mam dvtayin, hoo Israel lo Pwnbon xuml jinam hog mwlwngv bul gab dootayin.

³⁰‍Hoo deedy luuxy aaxy xeeco bo tulungv, hoo nulug hoolu luuxy aky jinam tulungv nyub tulu gab dootayin. Nulv nulug wtw mvconam mam kam nyub tulungam jidwb nyitayin, ho nulug namho lvqc cilwqnamv dooky tayin.

³¹‍Nyub tulungv pvta ho svdin hoo dwr-pee cexnam hoo atv sirambo vdinam dvdwb nyiram.