Read Nyishi IJIKEL 45 Bible Online

IJIKEL 45 - Nyishi bible

IJIKEL 45

¹“Hwdlo nulv gvdangam otub nvvsiq yukam, nulv At Sw gab dvrwqbo gvda jila lo aasongam 25,000 kiubit hoo taqtam 20,000 kiubit gob jibwqto. Hoqhv bumpwngv dvrwq dvb nyitayin.

²‍Soq cuukiq vpy bo gvda riabg hoqgv 500 kiubit gola 500 kiubit gob dvrwq namlo gab, ho hoqg taqg-loosaq camng kiubit gob rootob doomto.

³‍Hoo xibwqnam dwrbu-dwrya hoqg aasongam 25,000 kiubit hoo taqtam 10,000 kiubit gob xilin to, hoqhv dvrwqbo namlo gab, hoqhv Dvrwq Kwrwqbo Dook.

⁴‍Hoqhv gvda hoqg dvrwqbo pac gob nyidwb nyitayin. Hoqhv nyub tulu gab, hiyv dvrwq namlo ho bon nyinbo tulu gab hoo At Sw dookub haal bon nyin bo tulu gab doodwb nyitayin, hoo hoqhv bulug nam doogwb bvla dvrwqbo namlo doogw nyitayin.

⁵‍Asaq pac gonwg aasongv 25,000 kiubit hoo taqtv 10,000 kiubitnum, hoqhv dvrwq namlo ho bon nyinbo Lebi nyiilu gab dootayin, hoqg bopam tulu ham bulv doogwl gumn gob bwwtayin.

⁶“Dvrwq dvb dwrbu xuqlin kunum gvda lvgab nulv bopam gumn taqtv 5,000 kiubit hoo aasongv 25,000 kiubit gob jitayin. Hoqhv Israelwg nombu bupw gab doodwb nyitayin.

⁷“Lvpw atwg ko tuupv dvrwqbo jila gvla bopamg gumn hoqgv vnyi-vnyiam naatayin, dvrwqbo jila lvg-lvgab bopamg hoqgv dou-caga hoqgv haaga namgub, hoo hoqg daayarv nyob akwg gvda namgub wctayin, hoo dou-haaga hoqgv caagag gvda vrr namgub.

⁸‍Hoqhv Israelho mwwg gumn gob nyidwn. Hoo ngoqg lvpw atwg ko tuup tulungv ngoqg nyiilungam nyijab-nyiyiq kuram, hvbmabde bulv Israelwg nombungam bulug nyob hoolu-hoolungam gvdangam naamtayin.

⁹“Soq sib Pwnbo At Sw bedo: Jotv paku, Israelwg lvpw atwg ko tuup tulunga! Yolu-swcinam la nyijab-nyiyiqnam mam apaq tuku, hoo jvqtwngam la lootwngam nyitku. Ngoqg nyiilungam ruqpaqnam mam nyik maabv, Pwnbo At Sw bibwqdo.

¹⁰“Jvqtw ipa ak la jvqtw bat ak, nulv jvqtw jaaka nadwb doog tayin.

¹¹‍Ipa ngvla batv xinnan homyin gob nyitayin, batv homar wyw hoqgv akwn doodwn, hoo ipangv homar wyw hoqgv akwn doodwn; homarv kvtaq xinnan gob nyitayin.

¹²‍Sikilv gera camnyi gob nyitayin; camnyi sikil lvgab camnyi-ang sikil lvgab cam leq ang sikilv nulug mina gob nyitayin.

¹³“Soq sib aky sam nulv mvtayin: wtw ammwg homar vcw-at hoqgv ipa ax hoqgv akwn, hoo tanyeq homar vcw-at hoqgv ipa ax hoqgv akwn,

¹⁴‍hoo bat ho kutiam xibwql xin gvdwn, kor vcw-at hoqgv hoo bat wyw hoqgv akwn (korv, homar hvb kalam nyidwn, hv bat wyw go haadwn).

¹⁵‍Hoo sviya lwwnyi hoqgv dorg, Israelwg sepa rongo hoqgv ammam, boyuqnam akiam, hoo pvlywnam akiam, hoqg tulu ham pwr jidwb nyidwn, Pwnbo At Sw bibwqdo.

¹⁶‍Gvda hoqg nyiilu mwlwngv soq aky sam Israelwg lvpw atwg ko tuupam jidwb nyiky tayin.

¹⁷‍Lvpw atwg ko tuupv boyuq deenam akiam, am-temy akiam, hoo twwnam akiam nit poolam xilo sool dvmin-twwminam mam, hoo Doonu aal tulungam hoo Israel nombuho xilo sool dvmin-twwmin dvb xuqlinl apnum mood mwlwho jidwb nyiky tayin: mwv nyic akiam, am-temy akiam, boyuq deenam akiam, hoo swrso akiam, pvlywnam mam Israelwg nombug kwlib mwv jitayin.

¹⁸“Soq sib Pwnbo At Sw bedo: Otuq poolwg otuq aalam, no svv hvvtw hoqgv un-tar gvma bo hvvb loq dorg naalayil hoo dvrwq namlongam xeexaqto.

¹⁹‍Nyubv nyic aky hoq hijum meeg naalayil hoo ham dvrwq namlog swwrw tuluho, ho yugwg badag vpyho, hoo urag baag toggoq swwrw tuluho pwqyaq tayin.

²⁰‍Hiyv cengmab nyimurl nyic nyigam gab nyiicwr-cwrx gab no ham kvn dvn aalam hvraqb nyinam akinam nyitayin; hoqgab no dvrwq namlo gab pvlyw tayin.

²¹“Otuq poolwg camleq loopy dvn aalam, nulv Dvtv Durum mam dvta-twwtayin, hoo aal kvn gob opap kiilwq maanam wtwngam dvtayin.

²²‍Hoq aalam lvpw atwg ko tuupv nyiilu gab hvvb hvvdo dorg nyic gab mwv atgab jitayin.

²³‍Hoo aal kvnwg durum dwd moodam mwv At Swn un-tar gvma bo hvvdo kvn gola yaap tvmwr kvn go boyuqnam aky gab jitayin, aal kvnho aal looxiam nyic gab bimp dorg-dorgwb jitayin.

²⁴‍Hoo mwv cwrm-malo akiam ipa ak-akwb hvvb dorcw-dort lvgab, yaap tvmwr dorcw-dort lvgab ipa ak-akwb, hoo ipa vcw-atam hin kuty ak-akwb jitayin.

²⁵‍Pool kvn dvn camleq loog dvn aal hoo aal kvn gob dvmin-twwminl soomin deek aalam, mwv nyinam akin nyic akiam, boyuqnam akiam, hoo cwrm-malo akiam hoo kuty aky jicwngam hvraqb jidwb nyitayin.