Read Nyishi IJIKEL 46 Bible Online

IJIKEL 46 - Nyishi bible

IJIKEL 46

¹“Soq sib Pwnbo At Sw bedo: Dou-cagab tuunbo baag urag toggoqkam bonam nyid aal looxiam ciqtum tvl dooi nvpv, hvbmabde Doonu aalam ham ciqko yin pv, hoo nitib pool karlin yukam ham ciqko yin pv.

²‍Lvpw atwg ko tuupv lvvg hoqgv baag toggoqb haatayin, hoo mwv toggoqg yvbgw rwwda ho daqtayin. Nyub tulungv mwwg boyuqnam akiam la mwwg swrso aky tulungam jitayin, hoo mwv haagag yabtamho xumtayin. Ho mwv lvvgwb lengtayin, hvbmabde toggoqkam oyumnam gob ciqtum ram.

³‍Gvdag nyiilungv haagag toggoqho At Swg agaho Doonu aalam la nit poolam pvxwl xumtayin.

⁴‍Lvpw atwg ko tuupv At Swn Doonu aalam un-tar gvma bo sviya koam la yaap tvmwram boyuqnam akiam jitayin.

⁵‍Hoo yaap tvmwr lvgab am aky ipa ak, hoo am aky lvgab sviya ko mwwg jilanam gob jitayin, ipa vcw-at ho kuty hin ak lvkin gob jitayin.

⁶‍Nit pool kard aalam mwv svv hvvcam hoqgv un-tar gvma bo hvvb dorg aky jitayin, hoo un-tar gvma bo sviya ko dorx gola yaap tvmwr dorg jitayin.

⁷‍Am aky gab mwv ipa ak hvvb lvgab, ipa ak lvgab yaap tvmwr dorg, hoo sviya ko lvgab am akiam mwwg jilanam gob, ipa vcw-at ho kuty hin ak lvkin gob jitayin.

⁸‍Hwdlo lvpw atwg ko tuupv haaikam, mwv baag toggoqb haatayin, hoo mwv lengam mamkam lamta baakin hoqgv lengtayin.

⁹“Hwdlo gvdag nyiilungv At Swg agaho durum dvdwb sooyiq hiql apnum aalho haadwn, hiyv nyoodum toggoq hoqgv xumtab haanbov nyooko toggoqb lengtayin, hoo hiyv nyooko toggoqb haanbov hv nyoodum toggoqb lengtayin: hiyvkam mwwg haak toggoq lamta hoqgv mwv lingkur kuram, hvbmabde nyiicwr-cwrxiv ws wdal toggoq goqsaqb lengtayin.

¹⁰‍Hwdlo bulv haaikam, lvpw atwg ko tuupv bulug lvgab haaba tayin, hoo hwdlo bulv lvvgwb lengyikam, mwv kam lvvgwb lengtayin.

¹¹“Durum dwdam la sooyiq hiqrnam xilo sood tulungam, am aky lvgab svv hvvb hvvdo lvgab ipa ak, hoo yaap tvmwr lvgab ipa ak, hoo sviya ko tulu lvgab mwwg jilanam gob, ipa vcw-at ho kuty hin ak lvkin gob jitayin.

¹²‍Hwdlo lvpw atwg ko tuupv mwwg mwwswl aky jinam mam jiyikam, boyuqnam akiam maalo swrsomalo akiam mwwg mwwswl At Swn aky jinam gob jiyikam, dou-caga daiyag toggoqkam mwwg gab kuqko jitayin. Hoo mwv mwwg boyuqnam akiam maalo swrsomalo akiam mwv Doonu aalam hoggub jidwn hvb jitayin. Ho mwv lvvgwb lengtayin, hoo mwv lvvgwb lengro kalam toggoqkam ciqtum tayin.

¹³“Un-tar gvmab vnyw nywgbo sviya koam no At Sw gab boyuqnam akiam aal looxiam jitayin; ar-aram no hoqham jitayin.

¹⁴‍Hoo no am aky lvgab hoqham ar-ram jitayin, ipa ak hoqgv akwn, hoo kuty hin oum deen hoqgv akwn doopiam neelap nvdwb, At Swn am aky jinam ak gob jito. Soq sam kuiyum namgub nyidu keetayin.

¹⁵‍Boyuqnam akiam nyidu keem dvb, sviya koam la dvnam-twwnam akiam la kuty akiam ar-ram jiky dvb nyitayin.

¹⁶“Soq sib Pwnbo At Sw bedo: Lvpw atwg ko tuupv mwwg ko tuup tulungam mwwg otungam aky jib nyiloqkam, hoqhv mwwg ko tuup tulug gvku. Hoqham bulug gumn otu nvvsiqnamv ku.

¹⁷‍Hvbmabde mwv mwwg nyera ak gon mwwg otu hoqgv gumn aky gob jib nyiloqkam, hoqhv jikur de vnyw namgub mwwg gwjku. Hvbmabde hoqham lvpw atwg kongam lok jikur taikun; hoggub nyilakam hoqhv mwwg otub nyitayin—hoqhv mwwg ko tulu gab dootayin.

¹⁸‍Lvpw atwg ko tuupv nyi tulu hoqgv gumn otu akkam naanyi ram, bulug gumn hoqgv bulv peeneq nyoram. Mwv mwwg ko tuup tulungam mwwg atwg gumn otu hoqgv bulug gumn otub jitayin, hoqgab ngoqg nyiilungv akjijaqkam mwwg gumnam cwrsaq-bvraq gob mvram.”

¹⁹‍Ho mwv ngam haaga hoqgv boolwqnum, hoqhv toggoqg bviywr golo nyoodum daiyag nyub tulu gab dvrwqbo poop hiby pwqlw mvnamho haagnum, hoo kaato, dou-haaga daiyag vtwr nyook ak kaakinum.

²⁰‍Hoo mwv ngam benum, “Soq nyook tulu so nyub tulungv nyimurnam akiam la nyicnam akiam xwwnu tayin, hoo hoqho bulv am akiam baag lvvgwb bwwlin tamab kobnu tayin hoo hoqhvb dvrwqkam nyiilungam bekin tayin.”

²¹‍Ho mwv ngam baag lvvgwb boolinum hoo baagwg cuukiq vpy ho ngam boogaql yvgnum. Hoo kaato, baag vx-cwrho baag siqdangv doonum—

²²‍baagwg cuukiq vpy ho anyo bo baagv doonyanum, hoqg aasongv campy kiubit hoo taqtv cammum kiubitnum; hoq vpiv homyin lvkinum.

²³‍Baag vpig vx-cwr uraho wlwngv poop hibib diiyum tvl doonum, hoqg ako ho imiqkv poop hibib muiyum tvl apnum.

²⁴‍Ho mwv ngam begamv, “Soq tulu si imiqkv soq so dvrwq namlo lo nyigbo tulungv nyi tulug pwr jinam tulungam xwwnu tayin.”