Read Nyishi IJIKEL 47 Bible Online

IJIKEL 47 - Nyishi bible

IJIKEL 47

¹Ho mwv ngam dvrwq namlog langk daiyag viyap boolwqnum, hoo kaato, issiv dvrwq namlog dou-caga daiyag haaga viyap niikum hoqgv todunam (hoggab dvrwq namlongv dou-caga daiyab tuurwqnum). Issiv nyooko daiyag vtwrg dvrwq namlog viyap yugw hoqgv tol doonam.

²‍Ho mwv ngam nyoodum daiyag lamta toggoqb boolwqnum hoo dou-cagab tuurwqbo agag toggoqb ngam boolwqnum; hoo kaato, nyooko daiyab issiv tolinl doonam.

³‍Mwwg alaqho xika nannam bwwtwl dou-caga daiyab wdunam, nyi akv lwwyw ak kiubit gob xinum, hoo mwv ngam issib wgnum, hoo hoqhv lwnyiq pwp namgub uranam.

⁴‍Mwv lokta xikanamv lwwyw aknum, hoo mwv ngam issib bool wgnum, hoo hoqhv lwbw namgub uranam. Lokta mwv xikanamv lwwyw aknum, hoo mwv ngam issib bool wgnum, hoo hoqhv hwwpo namgub uranam.

⁵‍Lokta mwv xikanamv lwwyw aknum, hoo hoq pobungam ngo rabnyi maanam, hoggab issiv koi ko-gab. Hoqg issiv jaal wdkub ura kunum, rabnyi kuma dvb nyinbo pobu hoggwb nyiknum.

⁶‍Hoo mwv ngam benum, “Nyia ko tuup, no soq sam kaat bai yv?” Ho mwv ngam pobu sugurb bookur kunum.

⁷‍Ngo hoqb wkur yik ho, ngo pobu bviywrg taqg-taqsaqho naleqgo svvn tulungam daqdwb kaapanum.

⁸‍Hoo mwv ngam benum, “Soq iss si dou-caga daiya nyookub tolayil Araba namgub tol dvn, hoo sa-svlob tolwqdvn; hwdlo issiv sa-svlo urab tolwq yin, issiv dvrwq cojor tayin.

⁹‍Hoo pobungv hogloq xeqb tol wnam, gwn-xarnbo topum yorup mwlwngv swwtayin, hoo hoqho nguiyv naleqgo dootayin. Hoggab hoqg iss si hoqb tolwqdo, ho sa-svlog issiv dvrwq cojor yin pv, hogloq xeqb pobungv totayin hog luuxiv swwtayin

¹⁰‍Ngui mengn bo nyi tulungv sa-svlo bviywrho daqtayin. Engedi hoqgv Eneglaim nyook namgub wswq tor apkob nyitayin. Hoqho luuxy deedy nguiyv naleq tayin, Xitor Sa-svlog ngui hvb nyitayin.

¹¹‍Hvbmabde svpia-sviyangv la jopiu-joiyu issam dvrwq cojor dvb mvram; hoq tulu ham al mvlin kob doom tayin.

¹²‍Hoo pobu taqg-taqsaqho deed luuxy dvs svvn tulungam swwm tayin. Bulug okv sengram, ho hoqg aaxiv xeemab nyiram, hvbmabde pool bvrxiam bulv nitbo aaxy xeetayin, hoggab bul gab dvrwq namlo hoqgv issiv tol jidwn. Bulug aaxiv dvs gab nyitayin, hoo bulug okv vc mwpnan gob nyitayin.”

¹³‍Soq sib Pwnbo At Sw bedo: “Soq sib no gvda sam Israelwg nyub camleq vnyig pengko ho mvpin-mvral vrr jitayin. Josap nyook tvqnyig naatayin.

¹⁴‍Hoo ngo nulug ab tulungam jitayin hvl dingrnam gvdangam nulv homyin lvkin dvb mvpin-mvra tayin. Hoq gvda hv nulug otu gob nyitayin.

¹⁵“Soq sib gvda soqg vrram rwtayin: Nyoodum daiyaho, Xitor Sa-svlo hoqgv naalayil Hetlonwg Lebo-hamat, hoo Jedad namgub,

¹⁶‍Berota, Sibraim (hogloq hv Damaskas gvla Hamat pengkog vrr namgub), naarab layil Hajer-hattikon namgub, hogloq hv Hauran vrr namgub doodwn.

¹⁷‍Hoqgab sa-svlo hoqgv Hajar-enan namgub vrram rwtayin, hoqhv Damaskaswg nyoodum bviywr lvgab Hamatwg bviywr namgub dootayin. Soq sib nyoodum daiya ho dootayin.

¹⁸“Dou-cagag vrram Hauran gvla Damaskaswg pengkob; Jordon lvgab Gilead gvla Israelwg gvda pengko ho, hoo dou-cagag sa-svlo hoqgv Tamar namgub. Soq sib dou-caga daiya ho dootayin.

¹⁹“Nyooko daiyangv, Tamar hoqgv naalayil Meriba-Kades iss namgub, hoqgv Ijipt gv kucw lvgab Xito Sa-svlo namgub vrr rwtayin. Soq sib dou-haaga daiya ho dootayin.

²⁰“Dou-haaga ho, Xito Sa-svlog hoqgv naalayil Lebo-hamat taqgwn namgub vrr rwj tayin. Soq sib dou-haaga daiya ho dootayin.

²¹“Soq sib nulv soq gvda sam nulug Israelwg nyob pengko ho mvpin-mvra tayin.

²²‍Nulv hoqham nulug atwg otu gob nyim tayin hoo nulug pengko ho nyoodo nyi doonbo tulu ngvla bulug ko tulungv gvdangam naabam tayin. Bulv nulgab Israel ho nyiidu nyi ko bwwnam hvb nyitayin. Nulug lvgab bulv Israelwg nyob tulug pengko ho otungam bvba tayin.

²³‍Nyoodo nyob luuxy doon boam, nulv mwwg otu naasam jibwqtayin, Pwnbo At Sw bibwqdo.