Read Nyishi IJIKEL 48 Bible Online

IJIKEL 48 - Nyishi bible

IJIKEL 48

¹“Soq si nyob tulug eminv: Nyoodum cuukiq jaq hoqgv nyirab layil, Hetlonwg bviywr hoqgv Lebo-hamat, hoqgv Hajar-enan namgub (hogloq hv Damaskaswg nyoodum daiyag vrr hoqgv naalayil Ha-mat namgub), hoo dou-caga hoqgv dou-haaga namgub, Danwg nyook taqhv.

²‍Danwg nyook vrr hoqgv dou-caga hoqgv dou-haaga namgub, Aserwg nyook taqhv.

³‍Aserwg nyook vrr hoqgv dou-caga hoqgv dou-haaga namgub, Naptali nyook taqhv.

⁴‍Naptalig nyook vrr hoqgv dou-caga hoqgv dou-haaga namgub, Manasse nyook taqhv.

⁵‍Manasseg nyook vrr hoqgv dou-caga hoqgv dou-haaga namgub, Iprayim nyook taqhv.

⁶‍Iprayimg nyook vrr hoqgv dou-caga hoqgv dou-haaga namgub, Reuben nyook taqhv.

⁷‍Reubenwg nyook vrr hoqgv dou-caga hoqgv dou-haaga namgub, Juda nyook taqhv.

⁸“Judag nyook bviywr hoqgv dou-caga hoqgv dou-haaga namgub, nulv hoqg paapongam 25,000 kiubit, hoo hoqg daayaram nyob hoolu akwnwg taqtv homyin dvb dou-caga hoqgv dou-haaga namgub dvrwq namlongam lvpa ho doodwb xibwql xilinto.

⁹‍Nulug xibwql At Sw gab xilin nyook taqhv daayarv 25,000 kiubit hoo poopv 20,000 kiubit gob nyiyi nvpv.

¹⁰‍Soq tuluhv dvrwqbo gab xibwq lingjnamv: Nyoodum daiya ho nyub tulu gab nyook xibwq lingjnamv 25,000 kiubit daayar gob, dou-haaga poopv 10,000 kiubit, hoo dou-caga poopv 10,000 kiubit, hoo nyooko daiyag daayarv 25,000 kiubitnum, ho At Swg dvrwq namlongam lvpa ra ho doodwb xilinl jitaq tayin.

¹¹‍Hwdlo Israelwg nyiilungv gaqxar yukho, soq si darxaqnam, Jadok ko tuup nyub tulungv, hiyv ngoqg bekjaqb nyil swwnum, bulv Lebi nyi tulug nyinam hvb nyinum.

¹²‍Hoo Lebi nyi tulug gvda bviywrho soq aljaqn bo gvda taqsam bulam jitayin, hoqhv dvrwq kwrwq yaanbo gvdab nyitayin.

¹³‍Hoo nyub tulug gvda bviywrho, Lebi nyi tulungam daayaram 25,000 kiubit, hoo poopam 10,000 kiubit gob xibwql xilin jitayin. Hoq gvdag hoqg daayarv 25,000 kiubit hoo poopv 20,000 kiubit gob nyinum.

¹⁴‍Bulv hoq gvdangam puqd bvkam, ho kwly dvbkam nyiram. Bulv soq aljaqn bo xuqbwq lengnam gvda sam nyiingam jisiqram, hoggab hoqhv At Sw gab dvrwqdvn.

¹⁵“Horngongam; 5,000 kiubit taqt go hoo 25,000 kiubit daayar go doonbo sam bopamho gooiyab bon nyin dvb, hoo doogw koob gvdangam rooto dvb doom to. Hoq pengko ho bopamv dootayin,

¹⁶‍hoo hoq tulu ham xikanamv soq swd go: Nyoodum daiyangv 4,500 kiubit, nyooko daiyangv 4,500 kiubit, dou-caga daiyangv 4,500 kiubit, hoo dou-haaga daiyangv 4,500 kiubitnum.

¹⁷‍Hoo bopamv soq sib rooto dvb gvdangam doom tayin: nyoodum daiyangv 250 kiubit, nyooko daiyangv 250 kiubit, hoo dou-caga daiyangv 250 kiubit, hoo dou-haaga daiyangv 250 kiubitnum.

¹⁸‍Horngo dvrwqbo nyook lvgab doobaqbo hv dou-cagaho 10,000 kiubit, hoo dou-haagaho 10,000 kiubitnum, hoo hoqhv dvrwqbo nyook lvgab doobaqbo dvn. Hoqg dvs mvlinamv bopamg bonam nyinbo tulu gab dootayin.

¹⁹‍Hoo bopam hoqg bonam nyinbo tulungv, Israelwg nyob hoolu mwlwngv hoqham rongo mvl dvtayin.

²⁰‍Ho nulug xibwql xilinamv taqg-taqsaqb 25,000 kiubitnum, hoqhv bopamg gumn lvgab dvrwqbo taqhv dootayin.

²¹“Horngo taqg-loosaq dvrwqbo nyook gvla bopamg gumn hv lvpw at ko tuup gab dootayin. Dvrwq nyook taq hoqgv dou-cagag bviywr xaqb 25,000 kiubit, hoo dou-haagag bviywr xaqb 25,000 kiubitnum, nyob hoolug gvda tingtwqhv lvpw atwg ko tuup gab dootayin. Dvrwqbo nyookwg pengko ho dvrwq namlongv dootayin.

²²‍Hoqhv Lebi nyi tulu gvla bopamg gumn hoqgv mvpin pvvnam gob nyitayin, lvpw atwg ko tuupwg gvda lvpa ho dootayin. Lvpw atwg ko tuupwg gvdangv Juda gvla Benjaminwg gvda pengko ho dootayin.

²³“Nyob tuugin gab: dou-caga hoqgv dou-haaga namgub, Benjamin nyook taqhv.

²⁴‍Benjaminwg nyook vrr hoqgv dou-caga hoqgv dou-haaga namgub, Simeon nyook taqhv.

²⁵‍Simeong nyook vrr hoqgv dou-caga hoqgv dou-haaga namgub, Issakar nyook taqhv.

²⁶‍Issakarwg nyook vrr hoqgv dou-caga hoqgv dou-haaga namgub, Jebulun nyook taqhv.

²⁷‍Jubulun gv dwrbu-dwrya hoqgv dou-caga hoqgv dou-haaga namgub, Gad nyook taqhv.

²⁸‍Hoo Gadwg nyooko hoqgv Tamar gvla Meriba-kades iss namgub, hoqgv Ijipt gv pobu kucw hoqgv Xito Sa-svlo namgub vrr tayin.

²⁹‍Soq gvda sam nulv Israelwg nyob tulu pengko ho gumn otu gob jitayin, hoo soq tulu si bulug naady sanam gumnv, Pwnbo At Sw bibwqdo.

³⁰“Soq tulu si bopamg lengkwb nyitayin: Nyoodum daiyaho 4,500 kiubit gob xilin tayin.

³¹‍toggoq goqoum go dootayin, Reubenwg toggoq, Judag toggoq, hoo Lebig toggoq nyitayin, bopamg toggoq tulungam Israelwg nyob tulug eminb mingtayin.

³²‍Dou-caga daiyaho 4,500 kiubit gob toggoq goqoum go xilin tayin, Josapg toggoq, Benjaminwg toggoq, hoo Danwg toggoqkv.

³³‍Nyooko daiyaho 4,500 kiubit gob xilin tayin, toggoq goqoum go dootayin, Simeong toggoq, Issakarwg toggoq, hoo Jebulunwg toggoqkv.

³⁴‍Dou-haaga daiyaho 4,500 kiubit gob xilin tayin, toggoq goqoum go dootayin, Gadwg toggoq, Aserg toggoq, hoo Naptalig toggoqkv.

³⁵‍Bopam hoqg taqg-taqsaqb hwwiyiqnamv 18,000 kiubitnum. Hoo hoq mood jaq hoqgv bopam mam emin tayin, At Sw soq so doodwn.”