Read Nyishi IJIKEL 6 Bible Online

IJIKEL 6 - Nyishi bible

IJIKEL 6

¹At Swg gomcwrv ngam haanum:

²“Nyia ko tuup, noqg nyuqm mam Israelwg puutu tulug daiyab pwrg dvl, hoo bulam ceekol nyiqry beto,

³‍hoo beto, Israelwg puutu tulu no, Pwnbo At Swg gomcwram tato! Soq sib Pwnbo At Sw puutungam la yorn tulungam, bwdwngam la lywpa tulungam bedo: Kaato, ngo, ngo jijaqkam nulug aoho lyoqr orioqkam haam tayin, hoo ngo nulug aobo xumk nyook tulungam twryum tayin.

⁴‍Nulug yugw tulungam dooxa-xaara tayin, hoo nulug sulum mwwk yugw tulungam mvpia-mviya tayin, hoo ngo nulam mengtwql nulug murty tulug agaho joop tayin.

⁵‍Hoo ngo Israelwg nyiilug sinbo svmangam bulug murty tulug agaho joop tayin, hoo ngo nulug alongam nulug yugw taqg-loosaqho cwrsaq gob mvtayin.

⁶‍Hoglo xeq nulv doogw tayin, bopam mam la aobo xumk nyook tulungam dooxal yuupaq dvb mvtayin, ho nulug yugw tulungv dooxal yuupaq tayin, nulug murty tulungam vmwq gob mvl twryum tayin, nulug sulum mwwk yugw tulungam pal tayin, hoo nulug bonam nyinam tulungam tipaq tayin.

⁷‍Hoo nulug pengko ho mengminamv dootayin, hoo ngo At Swv hvl nulv cengtayin.

⁸“Hvbsujaqkam ngo nulug nyi tuugin swwm dvb apaq jitayin. Hoo hwdlo nulv gvda mwlwho cwrsaq-twqb nyiyikam, nulv nyob tulug lyoqr orioq pengko hoqgv keleq tayin,

⁹‍ho nulam hogloq nyook ho nyumwb booknum nulv nyob tulug pengko ho ngam mwwpa tayin, hoggub ngo bulug yocu-yabio hangv ngoqg galoqkv wleq kunam mam hoo bulug yocu-yabio vnyiqkv bulug murty tulungam kaanam mam mvpianum. Hoo bulv atv almab nyimurnam mamla hoo bulug bulum dvb nyiknam mam bulv kaatwl oyum tayin.

¹⁰‍Hoo ngo At Swv hvl bulv cengtayin. Ngo sam besam-beyam bema hvbmabde ngo soq alman sam bulug aoho nyim tayin.”

¹¹‍Soq sib Pwnbo At Sw bedo: “Noqg alaqkv cupupto hoo lvpiangv dudin gvdwl bedo, Oa, Israelwg nombungv almab bulum dvb nyigam gab, hoggab bulv lyoqr orioqho, dwr kano, hoo dooi-palam ho haatayin.

¹²‍Hiyv aadoho doodwn hv dooi-palam ho sitayin, hoo hiyv koc ho doodwn hv lyoqr orioqb haatayin, hoo hiyam boum pan hoo cumpan hv dwr-kano ho sitayin. Hoqgab bulug aoho ngoqg hang lingtwrnam mam ngo bwqlwq-yvqlwq tayin.

¹³‍Hoo ngo At Swv hvl nulv cengtayin, hwdlo bulug mengnam svmangam bulug murty pengkog yugw tulu taqg-loosaqho, aobo yorn yorxy ho, puutu mwlwg aoho, jeenbo svvn nwwxig niikumho, hoo nana rooxo bo kora svvn nwwxig niikumho, hogloq hooxeq bulug murty tulungam sungam bo akiam jik ho joop yukam,

¹⁴‍Hoo ngoqg alaqkv bulam ceeko dvb ngo ijin tayin hoo bulug nyook doogw gvdangam oyum dvb la dooxa dvb deexa-rara hoqgv Ribla namgub mvtayin. Ho ngo At Swv hvl bulv cengtayin.”