Read Nyishi IJIKEL 7 Bible Online

IJIKEL 7 - Nyishi bible

IJIKEL 7

¹At Swg gomcwrv ngam haanum:

²“Hoo no, nyia ko tuup nga, nam soq sib Pwnbo At Sw Israelwg gvdangam bedo: Twrdy ku! Gvdag taqg-loosaqb cuukiq-bvvrwb twrdy moodv haapa ku.

³‍Sija twrdy moodv noqg aoho doodku, hoo ngo noqg aoho ngoqg haaxaqnam mam kanam tayin; ngo noqg nyinam wnam hvbjaq pw-hwwtayin, hoo ngo noqg bulum dvb nyinam mwlw gab laqm-baqm tayin.

⁴‍Hoo ngoqg vnyiqkv bulam kvvmw ram, ho ngo aya mwwpa ram, hvbmabde noqg nyinam wnam hvb ngo nam laqm-baqm tayin, noqg bulum dvb nyinamv noqg pengko ho doodwn. Ho ngo At Swv hvl nulv cengtayin.

⁵“Soq sib Pwnbo At Sw bedo: Ciqcaq-bviyaq aob ciqcaq-bviyaqkv haatayin! Kaato, hv haado.

⁶‍Twrdy haapa ku; twrdy haapa ku; hoqhv nam ceekol huurab paku. Kaato, hv haado.

⁷‍Noqg dookub tvnwr dwrdv haapa ku, gvdag doonbo nga. Moodv haapa ku; aalv hvvnwq duku, hur-marab de aalv, hoo puutu tulug aoho goqr ronamv hempnam ma.

⁸‍Sija ngo nyebia jaqb ngoqg hang lingtwrnam mam toolwq tayin, hoo ngoqg haaxaqnam mam nam ceekol haaxaq tayin, hoo noqg nyinam wnam hvbjaq ngo pw-hwwtayin, hoo ngo noqg bulum dvb nyinam mwlw gab nam laqm-baqm tayin.

⁹‍Hoo ngoqg vnyiqkv kvvmw ram, ho ngo aya mwwpa ram. Ngo noqg nyinam wnam hvbjaq ngo nam laqm-baqm tayin, ho noqg bulum dvb nyinamv noqg pengko ho doodwn. Ho ngo jwwn bo At Swv hvl nulv cengtayin.

¹⁰“Kaato, aalam! Kaato, hv haado! Noqg tvnwr dwrdv haapa ku; dvvcwngv puupa ku; larnamv jurpa ku.

¹¹‍Kwr-kor gob nyinamv nyic-nyia yaab swwrab paku. Bulam akjijaqkam dookram, ho bulug swwnam geenamv, ho bulug gumn-ranv; ho bulug pengko ho yuunam mvkam dookram.

¹²‍Moodv haapa ku; aalv hvvc paku. Rvnbongam hemp mvmabv, ho puqnbongam mwwdwq mvmabv, hoggab bulug dumtwq-miilyw nyi aoho hang lingtwrnamv haapa ku.

¹³‍Hoggab bulv swwl dood deedib, puqn bov hoggv mwv puqknum ham jikur kuram. Hoggab bulug dumtwq-miilyw nyi pagoq gab nyiqry kaanamv; hoqhv wkur kuram; hoo mwwg nyixiaq ko-gab, mwwg swwgam nyi akjijaqkam hindib pvvla deema.

¹⁴“Bulv tuuliam miqpaku hoo hog mwlwngam mwx-mvaq paku, hvbmabde nyob patab akjijaqkam wma, hoggab bulug dumtwq-miilyw nyi aoho ngoqg hang lingtwrnamv doodwn.

¹⁵‍Lyoqr orioqkv agangam; dooi-palam mvla dwr-kanongv ura gam. Mwv hiyv rongo ho yvnbov lyoqr orioqho sido, hoo bopam uraho doon boam dwr-kanongv la dooi-palam dvmeq do.

¹⁶‍Hoo mengonam akgon kelin baloqkam bulv puutu aoho, vxy-cwrv mwwg nyixiaqnam gab, lywpag pwk yobur hvb bul mwlwngv ringl doodu do.

¹⁷‍Alaq mwlwngv ator kuma, hoo lwbw mwlwngv issib nyikub paku.

¹⁸‍Bulv tuila vjam koonam, hoo bulam koor-karaqkv pulupnum. Mwlwg nyuqm ho hvnywngv doonam, hoo bul mwlwg dumpongv dungxo loolnam.

¹⁹‍Bulv bulug rupam lyobu buuxy ho hurgaqnam, hoo bulug hunv kacbo dupum-dvrab ak gob nyinam. Bulug rupv la hunv At Swg hang lingtwr yikho bulam naalin nyok maanam. Hoq lvgab bulug kanongam xumt dvb ho bulug kepongam bwwr mvdwb nyila maadwn. Hoggab bulug nyixiaqkv bulam dwqtub gob nyinum.

²⁰‍Mwwg kangam bo larnan tvsw-taiyinam, hoo bulv bulum-kac dvb guss tulungam, hoo hoqham bulug kacbo pagoq tulungam mvn mvdwn. Hoqgab ngo hoqham bul gab kacdvb mvdwn.

²¹‍Hoo ngo hoqham nyoodo nyi tulug alaqho naam dvb jitayin, hoo nyic nyiangv swcwngam mucu-mviya tayin, hoo bulv hoqham kacdvb mvtayin.

²²‍Ngoqg nyuqm mam ngo bulug hoqgv pwrkub tayin, hoo bulv ngoqg gumn nyookam kacdvb mvtayin. Naaly bo tulungv hoqb haatayin hoo ham kacdvb mvtayin.

²³“Gai soog mvto! Hoggab gvdangv nyic-nyia nyil nyi mengnam-puqnv bwwr tvl doodo hoo bopamho yolu-swcinv bwwr tvl doodo.

²⁴‍Ngo al looda maanbo nyoblo boa tvl nulug namlongam bulug gumn gob naamtayin. Ngo ator lvrgwnam mam twryum tayin, hoo bulug dvrwqbo nyook tulungam kacdvb mvtayin.

²⁵‍Hwdlo mwwdwqkv haaikam, bulv swrsongam meegaq tayin, hvbmabde akkam kaapa ram.

²⁶‍Ciqcaq-bviyaq aoho ciqcaq-bviyaqkv haatayin; pui dusamnam aoho pui dusamnamv wba tayin. Bulv nyiqry kaanam loq ak nyiqry belin bo meegaqdvn, nyub tulu hoqgv pvvbv hoo nyi axa tulu hoqgv tomswr-honynamv nyiid ku.

²⁷‍Lvpw atv nyix-riinam, lvpw atwg ko tuup tulungam mwwgw dook maanamv pulup paku, hoo gvda nyiilug alaqkam bosv eyoqb raqp paku. Bulug nyinam wnam hvbjaq ngo bulam mvtayin, hoo bulug pw-hwwcwb ngo bulam pw-hwwtayin, hoo ngo At Swv hvl bulv cengtayin.”