Read Nyishi IJIKEL 8 Bible Online

IJIKEL 8 - Nyishi bible

IJIKEL 8

¹Vnyw nywx gola pool barxwg loog deenho, ngoqg agaho Judag akam tulungv ngoqg lvgab doodu yikho, ngoqg namho ngo doonum, hoo At Swg alaqkv ngoqg aoso laqdaqnum.

²‍Hoo ngo rogabl kaanamv, nyi toj hvb nyinbo ak kaapanum. Mwwg hwwpo ako ho wmmwb nyinum, hoo mwwg hwwpo odumv kwlwq-kvlaqbo dvvcw hvbjaq huunum.

³‍Mwv alaq hvb nyinbo ak laqlinv hoo ngoqg pudum mam gvbw tvl ngam gaarabnum, hoo Yalv ngam swcw gvla doag pengko lo joocanum hoo Pwnbog nyiqriam Jerusalem gab kaamnum. Hogloq ho kaaneq mvdwb guss mvpko ho, ngam nyoodum daiyag haagag ura toggoqb haamnum, hoo hoqhv kaaneq dvb mvnum.

⁴‍Hoo kaato, lywpa ho ngo nyiqry kaanam hvb, Israelwg Pwnbo yuunamv hoqho doonum.

⁵‍Ho mwv ngam benum, “Nyia ko tuup, sija noqg vnyiqkv nyoodum daiyab piorabl kaaka to.” Hoqgab ngoqg vnyiqkv ngo nyoodum daiyab piorabl kaanum, hoo kaato, nyoodum daiyag haagag yugw toggoqho, kaaneq dvb mvnam guss mvnamv hoqho doonum.

⁶‍Hoo mwv ngam benum, “Nyia ko tuup, bulv hoggv nyidu dvn ham no kaapa dvi yv, soq so Israelwg nombungv vc loodab bulum dvb bon nyinv ngam ngoqg dvrwq namlo hoqgv aadob ruqpaq dvn? Hvbmabde no hoq tulu ham koi yaadwb bulug bulum dvb nyinam mam kaapa tayin.”

⁷‍Hoo mwv ngam baag haagaho boanum, hoo ngo hwdlo rogabl kaanamv, hoq cwqc ho ung ug doonum.

⁸‍Ho mwv ngam benum, “Nyia ko tuup, cwqc ho duto.” Hoqgab ngo cwqcam dunum, hoo kaato, hoqho haaga ak doonum.

⁹‍Hoo mwv ngam benum, “Urab haan, hoo soq so bulug vc jaqb bulum dvb nyitwl apnam mam kaaka to.”

¹⁰‍Hoqgab ngo urab haabnv hoo kaanum. Hoo cwqc aoho taqg-loosaqb gwn-xarnbo hoo kaac-kaiya bo svdinam mwiyw-mvcnam mam, la Israelwg nombug murty tulungam kaapanum.

¹¹‍Hoo bulug agaho Israelwg nombug nyiilo nyi camkvn go daqnum, Sapanwg ko tuup Jaajaniya bulug pengko ho daqmin gvnum. Nyiicwr-cwrxiv mwwg alaqho cvvk macaqkam bwwnum, hoo sulum mwkv doomwqb nyitwl juucanum.

¹²‍Ho mwv ngam benum, “Nyia ko tuup, Israelwg nombug nyiilo tulungv wrw rwwpwho murty mwiyw-mvctvl kanbo ho hoggv nyidu dvn ham no kaapas i? Hoggab bulv begamv, ‘At Sw ngulam kaapa maadwn, At Sw gvdangam haqpaq paku.’”

¹³‍Mwv ngam hvlkam benum, “Sam hilayab no hvraqb bulug bulum dvb nyinam mam kaapa tayin.”

¹⁴‍Ho mwv ngam At Swg dvrwq namlog nyoodum daiyag haaga toggoqho boanum, hoo kaato, dvn tulungv hoqho dootwl Tam-muj gab xobdul doonum.

¹⁵‍Ho mwv ngam benum, “Nyia ko tuupa, no soq sam kaapas i? No soq tulu sam hilayab bulum dvb nyinam mam kaapa tayin.”

¹⁶‍Hoo mwv ngam At Swg dvrwq namlog nyosa ho boanum. Hoo kaato, At Swg dvrwq namlog baag haaga gvla yugwg pengko ho, nyi camnyi leq ang gob, bulug langkv At Swg dvrwq namlo daiyab pwrtwl, hoo bulug nyuqm mam dou-cagab pwrtwl, doonyiam xumdu do.

¹⁷‍Ho mwv ngam benum, “Nyia ko tuupa, no soq sam kaapas i? Soq si Judag nombungv hog hvvtw yooma go bulum dvb bulv nyidwn i, ho bulv gvdangam yolu-swcin bvla ngam hvraqb hang nyiluq i? Kaato, bulv bulug nyupumho haqbam pwrxal appa.”

¹⁸‍Hoqgab ngo hang lingtwrl bon nyitayin. Ngoqg vnyiqkv kvvmw ram, ho aya mwwpa ram. Hoo bulv ngoqg nyuru taga so vcjaqb sogoql xabs jaqkam, ngo bulam tapa ram.”