Read Nyishi DANIYEL 1 Bible Online

DANIYEL 1 - Nyishi bible

DANIYEL 1

¹Judag lvpw at Jehoiakim vnyw nywum gob pvvb bwwl dooi yikho, Bebilonwg lvpw at Nebukadnejjar Jerusalem haanum hoo ham naareqnum.

²‍Hoo At Sw Judag lvpw at Jehoiakimwg, lvgab Pwnbog namlo hoqg dupum-dvrab tuugin mwwg alaqho jiknum. Hoo mwv hoq tulu ham Sinar gvdaho baqanum, ham mwv mwwg pwnbo namho, mwwg pwnbog gumn gob dupum-dvrab pam pvvl apnum.

³‍Hoo lvpw atv mwwg peelo bo nyi nyiipium Aspenajnvn gaml jil benum, dengky bvla xinam dvpar imiq hoqgv Israel nyi lo meeg boato,

⁴‍pai baqmabo tuudy-yaamy lo, kangam boloq la pumb rwnam mwlwho nyilaq boloq, cenglaq boloq, tomswr swrjubnam boloq, hoo lvpw atwg namho pwbwb bon nyinyi deen boloq, hoo bulam Kaldiya nyi tulug lvr-takam la agam goangam tomswrl biswrto.

⁵‍Lvpw atv bulam looxiam dvm-twwm dvb lvpw atwg dvk-twwk hoqgv xibwql xil jinum. Bulam cenglaq mvdwb vnyw nywum gob tomswr dvb nyinum, hoo hoq kokwngam bulv lvpw atwg agaho daqlin dvb nyinum.

⁶‍Hoq tulu hoqgv Daniyel, Hanania, Misayel, hoo Ajariyan Judag nyob hoolu hoqgv.

⁷‍Hoo peelo bo nyiipium nyi hv bulam emin mingmnum: Daniyelnvn mwv Beltesajjar, Hananianvn mwv Sadrak, Misayelnvn mwv Mesak, hoo Ajariyanvn mwv Abednego hvl benum.

⁸‍Hvbmabde lvpw atwg dvk twwk ho dubur twwbur maadwb, Daniyel mwv atv atam dingrnum. Hoqgab mwv peelo bo nyi nyiipium ham mwam dubur twwbur mvma dvb jitbvk hvl mvnyi-moiyul benum.

⁹‍Hoo Pwnbov Daniyelnvn mwwswnv hoo peelo bo nyi nyiipiumg kaagaho mwam aya kaapa dvb jinum,

¹⁰‍hoo peelo bo nyiipium nyi hv Daniyelnvn benum, “Noqg dvs-twwsam jinbo ngoqg at lvpw atam ngo bosdo; hoggab mwv nam kaatayin ho noqg yaapa swwtam hvb no dwjw mabnyiloqkam, lvpw at hoqgv sigam no ngoqg dumpo so haam tado.”

¹¹‍Ho hiyam peelo bo nyiipium nyi hv Daniyel, Hanania, Misayel, hoo Ajariyan dvs-twws horya mvdwb benam nyi akam Daniyel benum,

¹²“Noqg nyera tulungam aal looiyw gob; ngulam oo loq dvdwb hoo iss loq twwdwb jitwl kaaya kvka to.

¹³‍Ho ngulug gv bobuqkam la lvpw atwg dvs-twwsam dvn-twwnbo yaapa tulug gv bobuqkam no kaaya kvka to, hoo noqg nyera tulu lvgab no hoggv kaapan hvb nyito.”

¹⁴‍Ho soq pagoq gab mwv bulam loorwqnum, hoo aal looiyw gob bulam dvm-twwm tvl kaayanum.

¹⁵‍Aal looiywngv wnya yukho lvpw atwg dvk-twwk ho dvn-twwnbo yaapa tulungam bulv kangam yaanam hoo dwjwl bobuq yaanam.

¹⁶‍Hoqgab bulam dvs-twws horya bov lvpw atwg bulam dvd-twwdwb jinam mam naapaq tukul, hoo bulam wj-oo arongv dvdwb jinum.

¹⁷‍Soq yaapa vpy sam Pwnbov lvr-takam la pumb rwnam mam bulam jinum, hoo Daniyel nyiqry kaanam mam la yuma mwlwngam betam dvb cenglaqnum.

¹⁸‍Vtwr-anya moodho, hwdlo lvpw atv bulam mwwg agaho boa mvdwb peelo bo nyi nyiipium ham gaml jiyikam bulam Nebukadnejjarg agaho boolinum.

¹⁹‍Hoo lvpw atv bulam agam goonum, hoo bulug pengko ho Daniyel, Hanania, Misayel, hoo Ajariya hvb nyinbo kaapa maanum. Hoqgab bulv lvpw atwg agaho daqnum.

²⁰‍Hoo lvpw atv bulug luuxy-deedib cenglaq dvb pumb rwnam mam pagoqkam bulam toxnum, ho mwwg lvpw haty ho gwwn-nyiqry tulungam la nyoky nyub tulungam bulv lwyw taqt go cengbinl alyadwb mwv kaapanum.

²¹‍Hoo Sairaswg Lvpw atwg otuq vnyw namgub Daniyel hoqho doonum.