Read Nyishi DANIYEL 10 Bible Online

DANIYEL 10 - Nyishi bible

DANIYEL 10

¹Parsiyag lvpw at Sairus vnyw nywum dvb swwi yikho gomcwr ak Daniyelnvn betamnum, hiyvg eminv Beltesajjar. Hoo gomcwr hv jvqtwnum, hoo gomcwram vcjaqb haqmin sunum. Hoo mwv gomcwram cengknum hoo nyiqry kaanam mam cenglaq kunum.

²‍Hoq moodho Daniyel, ngo, hapta oum gob mwwdwq dwql doonum.

³‍Ngo dvngam bo dvmanum, vdin namla opongam ngoqg agam lo vlwq maanum, ho hapta oum gob ngo atam kuty paqlap maanum.

⁴‍Otuq poolwg aal camnyi leq loopy ho, ngo koibo pobu (hoqhv Taigwris pobu) sugurho doqdu yikho

⁵‍ngoqg vnyiqkv piorab ngo kaanum, hoo kaato, nyi ak pud vjam kootwl, Upaj hun hoqgv mvnam soruqkam mwwg hwwpo ho kvrlwqnam nyi ak kaapanum.

⁶‍Mwwg gv ngv guj huunbo hvb nyinum, mwwg nyuqmv huto hvb nyinum, mwwg vnyiqkv mur bioqn bo hvb nyinum, mwwg laqpongv la lvpiangv tama kwlwq-kvlaqbo hvb nyinum, hoo mwwg gomcwr yalv mvqlwg yal dunam hvb nyinum.

⁷‍Hoo Daniyel, ngo, vp-cwkwb hoq nyiqriam kaanum, hoggab ngoqg lvgab dooba nyi tuluhv kaapa maanum, hvbmabde bulug aoho vcjaqb tvmdwrnamv haanum, hoo bulv atv atv kvs dvb kenum.

⁸‍Ho ngam vp-cwkwb apaq kunum hoo soq koibo nyiqry sam ngo kaanum, hoo ngo ator akkam dook maanum. Ngoqg kwlwq-kvlaqbo gv ngv bos looda dvb kwly kunum, hoo ngo ator dook maanum.

⁹‍Ho ngo mwwg gomcwr tulug yalam tapanum, hoo hwdlo ngo mwwg gomcwr tulug yalam tapa yin, ngo yubngaq dvn hvb ngoqg nyuqmv kedho paatin kunum.

¹⁰‍Hoo kaato, alaq ak ngam idaqnum hoo ngoqg alaq lvqnyiam la lwbw pwnyiam ngam tvmdwr dvb mvnum.

¹¹‍Hoo mwv ngam benum, “Daniyel la, koijaqb abynam nyi, nam ngo agam goonam tulu ham cenglaqto, hoo dengdab daqto, hoggab sija nam ngo kanam pakun.” Hoo hwdlo mwv ngam soq gomcwr sam gooyikho, ngo tvmdwr dwrl daqrabnum.

¹²‍Ho mwv benum, “Bos maabv, Daniyel, hoggab otuq aal jaq hoqgv noqg hangv cenglaq mwwxy-saqnum hoo noqg Pwnbog agaho no atv yannum, noqg gomcwr tulungam tapa paku, hoo noqg gomcwr tulu gab ngo haapa kun.

¹³‍Parsiya lvpw-hatig lvpw atv ngoqg lvgab camnyi leq lookin go ceetornum, hvbmabde Maikel, lvpw atwg ko tuup pengko hoqgv akwn, ngam svka taab haanum, hoggab Parsiyag lvpw at tulug lvgab ngam hoqho apaq kunum,

¹⁴‍hoo kokw aalam noqg nyiilungv hoggv nyita dvn ham nam cenglaq mvdwb mvtab haanum. Hoggab nyiqry kaanam si kokwngam haata bo aal tulu gab.”

¹⁵‍Hwdlo mwv ngam soq gomcwr tulu sib gooyikho, ngo ngoqg nyuqm mam kedwb pvxw kunv gambiaq maab dooknum.

¹⁶‍Hoo kaato, nyia ko hvb nyinbo ak ngoqg nvbcwram idaqnum. Ho ngoqg agam mam gamkoqnv hoo ngo agam gooknum. Ngoqg agaho daqn boam ngo mwam benum, “Ngoqg bir ata, nyiqry kaanam hoqgv vcv ngoqg ao si haapa ku, hoo ngo ator dookma.

¹⁷‍Hoggub yu ngoqg bir atwg nyerangv ngoqg bir at lvgab agam goonyi tayin? Hoggab sija ngoqg lvgab ator vcwr gokam dookma, hoo ngam saqs gokam dook maadwb apaq paku.”

¹⁸‍Lokta nyia ko hvb nyinbo akv ngam idaqnum hoo ngam atoram jiknum.

¹⁹‍Hoo mwv benum, “Koijaqb abynam, nyi nga, bos maabv, swrsongv nam dooba nvka; ator to hoo aljaqb haakam to.” Hoo mwv ngam hvb agam gooikam, ngo ator kunum hoo benum, “Ngoqg bir atwn agam goomto, hoggab no ngam ator jipa ku.”

²⁰‍Ho mwv benum, “Hog-gab noqg dookub ngo haapa kun no ham cengd nvi yv? Hvbmabde sija ngo Parsiyag lvpw atwg ko tuupam ceekol nyob pvrwq taikun; hoo hwdlo ngo lvvgwb lengyikho, kaato, Gwriswg lvpw atwg ko tuupv haatayin.

²¹‍Hvbmabde jvqtw kitap ho hoggv xeqp pan ham ngo betam tayin: noqg lvpw atwg ko tuup Maikelnvn apaq twqtwl, ngam ceeko boam akjijaqkam ngoqg lvgab nyemaq daqmin gvmanum.