Read Nyishi DANIYEL 11 Bible Online

DANIYEL 11 - Nyishi bible

DANIYEL 11

¹Hoo ngoqgab nyiloqkam, Medeg Darius, otuq vnywg ho ngo mwam pwbw mvd bvla ator mvdwb daqrabnum.

²“Hoo sija ngo nam jvqtwngam kaakin tayin. Kaato, Parsiya ho oum gota lvpw atv swwrab tayin, hoo vpy deen hv bul mwlwngam nyet tvbin yaatayin. Hoo hwdlo mwwg nyetnamv koiyib mwv nyet yin, mwv Gwriswg lvpw-hatiam ceekol nyirab-wrab tayin.

³‍Ho atorbo lvpw at ak daqlin tayin, ho mwlwngam munyiubl pvvb bwwl doog tayin hoo mwwg mwwlwqkam nyitayin.

⁴‍Hoo mwv hoqhvb swwrab kalam, mwwg lvpw-hativ dubtayin hoo lvpw-hativ vpy gob mvpin-mvra tayin, hvbmabde mwwg swwnam-geenam ham ma, ho mwwg mwwlwqkob pvvb bwwl doognam ham kama, hvbmab mwwg lvpw-hatiam mvpaqtayin hoo hoq tuluhv asaqgab wtayin.

⁵“Ho nyookog lvpw atv ator tayin, hvbmabde mwwg lvpw atwg ko tuup akwn mwlwngam ator yaatayin hoo mwv pvvb bwwl doog tayin, hoo mwwg gaml jinamv mwlwngam koi yaanbo gaml gob nyitayin.

⁶‍Ho vnyw meeg kokwngam bulv lvkin swwbam dvb hwwbam tayin, hoo nyookog lvpw atwg nyem kov nyoodumg lvpw at dookub pvvb mvl birmins taab haatayin. Hvbmabde mwn mwnwg laqpongam ator dvb kaapa kuram, hoo mwv la mwwg laqpongv ator toryu ram, hvbmabde mwnwg paqn tulungv, ho hiyv mwnwn sorabo ab tulungv, hoo hiyv mwnwn mood mwlwho svka bo tulungv mwnwn apaq taikun.

⁷“Hoo mwwg kwlib mwnwg rwb hoqgv haqb ak swwrab tayin. Mwv sipai tulungam ceeko layil nyoodumg lvpw at gurum nwqtum kob haatayin, hoo mwv bulam ceekol hoo mviya tayin.

⁸‍Mwv bulug pwnbo tulungam dvvcw guss tulungam bvla bulug rup hun xinam Ijipt dupum-dvrab pam Ijipt baqpaq tayin, hoo vnyw meegob mwv nyoodumg lvpw atam nyob padwb doonu tayin.

⁹‍Ho kokwngam nyookog lvpw atam nyob pvlwq tayin hvbmabde mwwg atwg gvdab mwv wkur tayin.

¹⁰“Mwwg ko tuup tulungv nyob padwb naleqgo sipai tulungam goqkum layil diidwr iss tonam hvb tol wtayin hoo lokta nyobam parab layil mwwg ceebio tulug gurum namgub pvlwq tayin.

¹¹‍Ho nyookog lvpw atv vc looda nyob padwb nyirabnv, nyoodumg lvpw atam nyob patayin. Hoo mwv mvqlwgo daqrab mvdwb mvtayin hvbmabde hoqham nyoodumg lvpw atwg alaqho jitayin.

¹²‍Hoo hwdlo koi mvqlwngam naareq yukun, mwwg hangv paql lartayin, hoo mwv lwwyw camgwb sipai tulungam mengtayin, hvbmabde mwv mvtur nyokram.

¹³‍Hoggab otuqg ham mvqlw yaadwb nyoodumg lvpw atv daqrab mvdwb mvtayin. Hoo vnyw meeg kokwngam mwv naleqgo sipai lvgab nyob panan dupum-dvrab pam haam tayin.

¹⁴“Hoq moodam naleqgo nyookog lvpw atam ceeko dvb lengtayin, hoo noqg atwg nyiilungv nyiqry kaanam mam niqtuq nyilin dvb hvl bulv atv yolu-swcin dutayin, hvbmabde bulv niqtuq nyilin ram.

¹⁵‍Ho nyoodumg lvpw atv haatayin hoo naareq dvb bon nyinam mam nyirab tayin hoo dengky jaqb gurum nwqyeqnam bopam mam naareq taikun. Hoo nyookog sipai tulug atorv dagnyok ram, ho mwwg mwlwngam pwbwl alyanbo sipai ngvkam hog kuram, hoggab bulug lvgab ator akkam dookram.

¹⁶‍Hvbmabde mwam ceekol haan boam mwwg mwwlwqb mwv mvtayin, hoo nyi akkam mwwg agaho daqnyi kuram. Hoo mwwg alaqho twrnan ator lvgab, mwv anya yuunam gvdaho dvgw tayin.

¹⁷‍Mwwg nyuqm mam mwv tuugabl mwwg lvpw-hatig mwlwg ator lvgab haadwb mwwr paku, hoo mwv birnam pvvb tulu lvgab haagwl hoq tulu ham nyimtayin. Mwv dvn tulug nyem koam lvpw-hatiam twrm dvb jitayin, hvbmabde hoqhv daqnyi ram ho mwwg nyigw kob kam nyiram.

¹⁸‍Kokwngam mwv soiyoq daiyag gvdangam tuugab tayin hoo naleqgo bulam naareq tayin, hvbmabde sipai saab ak mwwg kwr-kornam mam munyiub tayin. Jvqtw jaqb mwwg kwr-kornamv mwwg aoho hookur tayin.

¹⁹‍Ho mwv mwwg nyuqm mam mwwg atwg gurum nwqtum ko gvdab pwrtayin, hvbmabde mwv dwqtubl hoo geql tayin hoo kaapa kuram.

²⁰“Ho mwwg kwlib nyi ak sorab tayin ho mwwg lvpw-hatiam yuum dvb hoq nyi akham gvda nyoogangam kokum mvdwb kanam tayin. Hvbmabde oyu mood kamab, haaxaq kama ho nyob pakam maab mwam paiyaq tayin.

²¹‍Mwwg kwlib lvpw at swwka maanbo pwbw bo nyi ak swwm dvb jitayin. Mwv lomduq dvb haatayin hoo lvpw-hatiam surjaqb nyil naatayin.

²²‍Sipai mwlwngv mwwg aga hoqgv twrkub ketayin hoo mvpia tayin, lvpw atwg birnam ko tuupam kam.

²³‍Hoo lvkin gob swwbam dvb pvvb mviyik mood hoqgv jaq mwv surjaqb nyitayin, hoo mwv anyo go nyiilungam pvvb bwwl doog sujaqkam mwv vi go ator bob nyitayin.

²⁴‍Mwv cema lvpab mwlwngam nyet tvbin yaak gvda ho haatayin, hoo mwv mwwg ab tulug la mwwg abwg ab tulug nyika maanam mam kam nyitayin, ho nyob pal naalil naareqnam dupum-dvrab pam bulug pengko lo horpin-horanam. Mwv ator cwwgw doonbo tulungam ceeko dvb ceebio baqtayin, hvbmabde hoqhv anyo mood gob nyitwq tayin.

²⁵‍Hoo mwv mwwg huqlw lvgab raarab tayin hoo mwwg hangv nyookog lvpw atam naleqgo sipai lvgab ceekol nyob padwb mwwtayin. Hoo nyookog lvpw atv vc loodab naleqgo sipai boolayil nyob patayin, hvbmabde mwv dvqrwq nyoram, hoggab mwam xaalyo lyopaq tukul mviya tayin.

²⁶‍Mwwg dvtv gvnam mvkam wleq tayin. Mwwg sipai tulungam nyebia jaqb mvpaqtayin, hoo naleqgo mengpaq lotayin.

²⁷‍Hoo lvpw at vnyi gab nyiloqkam, bunyiv hangv almab nyidwb nyiipuq-lyol pwkin gob nyitayin. Bulv tebol pwkin ho dootwl vm mvvtayin, hvbmabde hvb nyinyi ram, hoggab twrm dvb mood xipnamv hvvc maatanum.

²⁸‍Hoo mwv mwwg gvdab koijaqb gumn-ranam lvgab wkur taikun, hvbmabde mwwg hangv dvrwq pvvb birwl apnam mam ceeko dvb tuugab tayin. Hoo mwv mwwg mwwlwq kob bon nyitayin hoo mwwg atwg gvdab wkur tayin.

²⁹“Mood xipko jaqb mwv nyookob wkur hoo haatayin, hvbmabde hoq moodv otuqg mood hvb nyikram.

³⁰‍Hoggab Kittimwg iss jaajv mwam ceeko taab haatayin, hoo mwv bos layil hoo wkur tayin, hoo wkur layil vcjaqb hang lengl dvrwqb pvvb birwl apnam mam ceeko tayin. Mwv wkur laiyil hoo dvrwqb pvvb birnam mam haqpaqbo tulungam tuugab tayin.

³¹‍Mwwg hoqgv sipai tulungv lenglayil hoo dvrwq namlongam la gurum mam kacdvb mvtayin, hoo lwxiam boyuq aky jinam mam naapaq tayin. Hoo bulv bulum-kac dvb mvl ham dooxa dvb mvtayin.

³²‍Dvrwqb pvvb birwl apnam mam mvpiabo tulungam mwv surub benyioq tayin, hvbmabde hiyv nyiv bulug Pwnboam cengn bov hwngkwb daqtayin hoo nyirwq tayin.

³³‍Hoo nyijwq-nyegam pengko hoqgv nyiilug naleqgo cenglaq mvdwb mvtayin, hvbmabde meeg aal gob bulam mengnam-puqnamv, leenam-parnamv hoo naalil naareqnamv dwqtub dvb haatayin.

³⁴‍Hwdlo bulv dwqtub yin, bulv anyo go svkangam svgagvrwq tayin. Hoo naleqgo bul atv atam bulug lvgab vm mvvmin gvtayin,

³⁵‍hoo nyijwq-nyegam bo tuugin dwqtub tayin, ho bulam raxor dvb, paxy xeexaq dvb, hoo hwdlo moodv wnya maady deedib, puulu dvb mvdwb mvi nvpv, hoggab hoqhv mood xipwl ap namgub kaaya tayin.

³⁶“Hoo lvpw atv mwwg mwwlwqkob nyitayin. Mwv atv atam larl paqtayin hoo mwlwg pwnboam mwv atam koi yaadwb jooiyin-joorab tayin, hoo pwnbo tulug pengko ho Pwnboam ceekol bej-beparnam betayin. Laqm baqma deedib mwv swwl-geel dootayin; hoggab hoggv birpan hv nyiyi nvkpv.

³⁷‍Mwv mwwg ab tulug pwnboam, ho nyem tulug abynam mam vnyiq-hang jiram. Mwv asaq pwnbo akkam vnyiq-hang jiram, hoggab mwv atv atam mwlwngam koi yaadwb jooiyin-joorab tayin.

³⁸‍Soq tulug kwlib mwv gurumg pwnboam ya xitayin. Hogloq pwnbo akam mwwg ab tulungv cengka maanam ham mwv xinam hun la rup, hoo xinam wlw tulug lvgab xinam akiam jitayin.

³⁹‍Mwv nyoodo pwnbo svka hoqgv mwlwngam ator yaadwb gurum mam mvtayin. Mwam loon boam mwv ham xinam lvgab paqtayin. Mwv bulam nyi vigo pvvb bwwl doog mvdwb jitayin hoo gvdangam aky keel horpin-hora tayin.

⁴⁰“Twrd moodam, nyookog lvpw atv mwam nyob patayin, hvbmabde nyoodumg lvpw atv cwkeq-lvmeq dooi yinam hvb, ceriot tulungv hoo svpur xarnbo nyiilungv, hoo naleqgo iss jaajv mwwg aoho haatayin. Hoo mwv gvda tulug urab haatayin hoo diidwr iss tonam hvb toiyiq tayin.

⁴¹‍Mwv yuunam gvdaho haatayin. Hoo lwwyw-lwwyw wyw laleq gob yoql tayin, hvbmabde hoq tulu ham mwwg alaqho jilin tayin: Idom mam la Moabam hoo Ammon nyi tulug gvda aljaqn boam jitayin.

⁴²‍Mwwg alaqkv gvda tulungam ceeko dvb mwv ijin tayin, hoo Ijipt gvdangv keleq nyoram.

⁴³‍Mwv hun gvla rupwg gumn noosungam pvvb mvnbob tayin, hoo Ijipt hoqg la Libyan tulungam hoo Kus tulu hoqg xinam dupum-dvrab tulungv mwwg teren lvgab wmin gvtayin.

⁴⁴‍Hvbmabde dou-caga gvla nyoodum hoqgv puiyv mwam bos dvb mvtayin, hoo vc loodab hang lenglayil koijaqb mvtab lvvgwb lengl tayin hoo naleqgo mucu-mviyal twryum tayin.

⁴⁵‍Hoo mwv mwwg xinam tombungam sa-svlo gvla yuunam dvrwq puutu pengko ho mvptayin. Hvbsujaqkam mwam akjijaqkam svka bo dooma dvb, mwam twrdynamv mwwg aoho haatayin.