Read Nyishi DANIYEL 2 Bible Online

DANIYEL 2 - Nyishi bible

DANIYEL 2

¹Nebukadnejjar vnyw nywnyi gob pvvb bwwl dooi yikho, Nebukadnejjar yuma ata maanum; mwwg yalv vs-alonum, hoo mwam yumy haak maanum.

²‍Ho lvpw atv gwwn-nyiqry kaanbo tulungam, nyiqry kaanbo tulungam, nyoky nyub tulungam, hoo Kaldiya nyi tulungam lvpw at mwwg yuma ata betam mvdwb gaml jitwl goqkumnum. Hoqgab bulv haanum hoo lvpw atwg agaho daqnum.

³‍Hoo lvpw atv bulam benum, “Ngo yuma ak maanum, hoo yuma hoqg niqtuqkam cengdwb ngoqg yalv vs-alo gob nyido.”

⁴‍Ho Kaldiya nyi tulungv lvpw atam Aramaik agam ho benum, “Lvpw ata nwrba gob swwn ka! Noqg nyera tulungam noqg yumangam swwtam kaato, hoo ngulv hoqg niqtuqkam belin kvka tayin.”

⁵‍Ho lvpw atv Kaldiya nyi tulungam benum, “Ngoqg gomcwr si kvxaqram la: nulv ngoqg yuma niqtuqkam ngam cengm dvb belinl jima baloqkam, nulam vmwq-vmwq dvb twqmwq tayin, hoo nulug dvparam ocu-aiya tvl doodwb mvtayin.

⁶‍Hvbmabde nulv yuma niqtuqkam belin baloqkam, nulv ngoqg galoqkv aky tulungam la bujongam hoo koi jaqb xinam mam nulam jitayin. Hoqgab ngoqg yuma hoqg niqtuqkam belin kaato.”

⁷‍Bulv lwnyi dvb birwqnv benum, “Lvpw at noqg nyera tulungam noqg yumangam swwtam kaato, hoo ngulv hoqg niqtuqkam belin kvka tayin.”

⁸‍Lvpw atv birwqnv benum, “Ngo jvqtw jaqb cengdo nulv mood naadwb nywkwq-nywqdo, hoggab nulv kaapa do ngoqg gomcwr si kvxaqram—

⁹‍nulv ngoqg yuma niqtuqkam belin nyoma baloqkam, nulug laqm-baqm sanamv goqkin gotwq. Nulug pengko ho vm-xaalyo bvla biwq-betol agam goodwb loor mins layil ngoqg agalo mood wpwq mwtwq dvb bedo. Hoqgab ngam yuma niqtuqkam betam to, hoo nulv belin nyodnyi hvl ngo cengtayin.”

¹⁰‍Kaldiya nyi tulungv birwqnv lvpw atam benum, “Swcw nvg aoso nyi akkam dooma hiyv lvpw atwg guml konam sam bekin deenbo, hoggab koi bvla atorbo lvpw atv hiyvkam soq sib nyitbvk hvl gwwn-nyiqry tulungam ho nyiqry kaanbo tulungam ho Kaldiya nyi tulungam kol benam tapa kaaka ma.

¹¹‍Lvpw atwg pagoq konam si vs-axaq looda, hoo nyi akkam lvpw atam betam nyoram pwnbo tulu ngvsmoloq, hiyv vdin-ui baqma tvl doodwn.”

¹²‍Hoqgab lvpw atv haaxaql hoo hang lengtwrnum, hoo Bebilonwg nyijwq-nyegam bo nyi mwlwngam twryum dvb gaml jinum.

¹³‍Ho pvvb mvtkul pui jilin kunum, nyijwq-nyegam nyi mwlwngam mengrab dukub; hoo bulv Daniyel nvla mwwg ajin tulungam kam bulug lvgab mengtaq dvb meegaqnum.

¹⁴‍Ho Daniyel mwwlaq lvgab hengab jaqb agam goonv lvpw atam roal daqg bo kepten Arioknvn benum, hiyam Bebilonwg nyijwq-nyegam bo nyi mwlwngam mengm dvb nyigbo nyi akam.

¹⁵‍Mwv lvpw atwg kepten Arioknvn toxnum, “Hoggab lvpw atwg pvvb mvl gaml jilinam si vnwq jaqdvn?” Ho Ariok Daniyelnvn bvrwqkam dardar jaqb betamnum.

¹⁶‍Hoo Daniyel lvpw atwg dookub wbnv mwam mood jit bvk hvl mvnyi-moiyul konum, ho mwv lvpw atwg yuma niqtuqkam belin nyodwb.

¹⁷‍Ho Daniyel mwwg nammwb wknv hoq pagoqkam Hanania, Misayel, hoo Ajariya mwwg ajin tulungam bekinnum,

¹⁸‍hoo mwv bulam ao lvpwg Pwnbog aya mwwpanam mam soq swrjaqb yuma maanam sam swgw tvk hvl benum, ho Daniyel la mwwg ajin tulungam Bebilonwg nyijwq-nyegam nyi tulug lvgab mengtaq mvma dvb.

¹⁹‍Ho Daniyelnvn soqg swrjaqb yuma soqg niqtuqkam ai nyiqry kaatamnum. Ho Daniyel ao lvpwg Pwnboam paqyalinco paqnum.

²⁰‍Daniyel birwq hoo benum: “Xinam jaqkv Pwnbog eminv nwrba cwtam hoqgv nwrba gob, pumb rwnam mvla atorv mwwg gvku.

²¹Mwv moodam la dwr-dvrangam kwly dvn; lvpw at tulungam mvpaq dvbla swwm dvb mwv mvdwn; mwv mwwlaq boam pumb rwlwq dvn hoo cenglaqbo tulungam mwwlaqkam jidwn;

²²mwv ura bvrwqkam la kvsnam mam bepor dvn; kan twdwq ho hoggv doodwn ham mwv cengdwn, hoo hutongv mwwg lvgab doodwn.

²³Ngoqg ab tulug Pwnboa, nam ku, ngo paqyalinco hvl paqdwn, hoggab no ngam pumb rwnam mamla atoram jilwq paku, hoo ngulv hoggv nam konum ham no ngam cengm dvb jipa ku, hoggab no ngulam lvpw atwg bvrwqkam cengm dvb jipa ku.”

²⁴‍Hoqgab hiyam lvpw atv Bebilonwg nyijwq-nyegam nyi mwlwngam twryum dvb xuqlinum, Ariok dookub Daniyel haanum. Mwv haanum hoo mwam soq sib benum, “Bebilonwg nyijwq-nyegam nyi tulungam twryum maabv: ngam lvpw atwg agaho boa tvb, hoo ngo lvpw atwg yumangam belin jitayin.”

²⁵‍Ho Ariok Daniyelnvn lvpw atwg agaho nyebia jaqb boanum hoo soq sib mwam benum: “Lvpw atwg yumangam belin deenbo Juda hoqgv nyumwb boon nyi ak ngo kaapa paku.”

²⁶‍Lvpw atv Daniyelnvn benum, hiyvg eminv Beltesajjar, “Ngoqg yuma maal kaanam niqtuqkam ngam cengm dvb no bekin nyotayin i?”

²⁷‍Daniyel lvpw atam birwqnv benum, “Nyijwq-nyegam nyi tulu ngvkam, nyiqry kaanbo tulu ngvkam, gwwn-nyiqry bo tulu ngvkam, ho doonyi-pool takar-tasaram xil cengnbo tulu ngvkam lvpw atwg swrjaqb yuma maanam niqtuqkam belin tvbwk hvl benam sam belinbo nyi akkam nyoram,

²⁸‍hvbmabde ao lvpw tv Pwnbo ak doodwn swrjaqb yuma maanam mam niqtuqkam belin dvn, hoo mwv lvpw at Nebukadnejjarnvn kokwngam hoggv nyita dvn ham betam tvba nyi. No noqg kartamho yubyikho noqg yuma maanam mvla nyiqry kaanamv soq tulu sam:

²⁹‍No ku, Lvpw ata, noqg kartamho no yubdul dooyikho kokwngam hoggv haata dvn ham no kaapanum, hoo mwv nam swrjaqb yuma maamwl hoggv kokwngam nyita dvn ham cengm dvb jitbanyi.

³⁰‍Hvbmabde ngoqgab nyiloqkam, soq swrjaqb yuma maanam soqg niqtuqkam ngam bekinam si, ngo swwl doonbo nyijwq-nyegam mwlw pengko ho cengbin yaagam gabma, hvbmabde yuma niqtuqkam lvpw atam cengm dvb belinl betam mvdwb, hoo noqg atwg mwwnam mam no cengm dvb.

³¹“Lvpw ata, hoo kaato, no xitorbo guss ak kaapa tvbnyi. Soq guss si koi bvla vc loodab kwlwq-kvlaq yibnyi, hoqhv noqg agaho daqyi banyi, hoo hoqg daqlinamv bos kaapa yibnyi.

³²‍Hoq guss hoqg dumpongv nyikatala hun hvb yibnyi, hoqg swqbwngv la laqpongv rup yibnyi, lvpangv la xarpongv tama yibnyi,

³³‍hoqg lvpiangv yoqdwr yibnyi, hoqg lupup tuugin yoqdwr hoo tuugin deekam ked yibnyi.

³⁴‍No hvb koodul dooi yikho, nyi mvdin maab wlw pwg duql layil, hoo hoqhv yoqdwr bvla deekam lvgab mvnam guss hoqg lupupam duqtwrnv vmwq yumgub mviyi banyi.

³⁵‍Ho yoqdwram, deekam mam, tamangam, rupam, hoo hunam, mwlw jaqkam lvkin gob vmwq yumgub mvi kubnyi, hoo jurpy mvko ho omsuq xabxanam hvb mviyi kubnyi; hoo ham vcwr gokam kaapa maadwb dooiyv baqxia yibnyi. Hvbmabde guss duqpia bo wlw hv xitor puutub nyikub yukbanyi hoo swcw mwlwngam doqlub yibnyi.

³⁶“Soq sib yumangv. Sija ngulv lvpw atam hog niqtuqkam bekin tayin.

³⁷‍Lvpw ata, no, lvpw at mwlwg lvpw atv, hiyam ao lvpwg Pwnbov lvpw-hatiam, huqlwngam, hoo atoram, hoo yuunam mam jipa kun,

³⁸‍hoo hoglo xeq nyia ko tulungv doodwn, nyorog svdin tulungv doodwn, hoo doag pvta tulungv doodwn, bulam nam pvvb bwwl doog mvdwb noqg alaqho jipa kun—no dumpo hoqg hun ak hv.

³⁹‍Noqg kokwb nam anyo yaanbo lvpw-haty ak swwlin tayin, hoo hoqg oum deen lvpw-hativ tama lvpw-hatib nyitayin, hoqhv swcw mwlwngam pvvb bwwl doog tayin.

⁴⁰‍Hoo vpy deen lvpw-hativ dootayin, hoqhv yoqdwr hvb alar tayin, hoggab yoqdwrv hog mwlwngam vmwq yumgub mvdwn. Hoo yoqdwrv hoggub hog mwlwngam vmwq yumgub mvdwn hvbkalam hoqg hog mwlwngam vmwq yumgub mvtayin.

⁴¹‍Hoo pwcw mvnbog deekam meeg la yoqdwr meeg la no mviyo-mvco tvl lvpiangam la lwcw tulu mvnam mam kaapanum, hoqhv lvpw-hativ vnyi gob mvpin deenamv, hvbmabde no yoqdwr lvgab deekam mam mviyo-mvco dvb kaanum, hoq mviyonam yoqdwr tuugin ator tvl dootayin.

⁴²‍Hoo lvpiag lwcwngam gargwn deekam hoo gargwn yoqdwr, hoq hvbkalam lvpw-haty ho atorbo la ator maanv dooiyo-dooco tayin.

⁴³‍No yoqdwram la nyinyiaqbo deekam mam mviyo-mvco dvb kaapa hv, hvbnyiloqkam bulv akwn-akwn nyem-nyega naako-naapeq tayin, hvbmabde yoqdwram hoggub deekam lvgab mviyo-mvco lama namhvb, bulv lvkin gob kaqgab tvl doola ram.

⁴⁴‍Hoo lvpw at tulug pvvb mwd aalam ao lvpwg Pwnbov lvpw-haty ak mvtayin ham nywywngam twrnyi ram, ho nyiilu asaqkam kam hoq lvpw-hatiam jisiq nyoram. Hoqhv asaq lvpw-haty mwlwngam vmwq yumgub mvtayin hoo bulam twryum tayin, hoo hoqhv nwrba gob daqtayin,

⁴⁵‍nyi mvdin maab wlwngv puutu hoqgv duql layil yoqdwram, tamangam, deekam mam, rupam, hoo hunam vmwq yumgub mvdwb no kaanum. Xitor Pwnbo akv lvpw atam soq kokwb hoggv nyita dvn ham cengm dvb mvpa kun. Yuma si kvxaqram, hoo hoggub nyilakam niqtuq lengtayin.”

⁴⁶‍Ho Lvpw at Nebukadnejjar mwwg nyuqmv pvxw banv Daniyelnvn xumnum, hoo aky loqla sulum loq mwam aky jitwl hvl gaml jinum.

⁴⁷‍Lvpw atv birwqnv hoo Daniyelnvn benum, “Jvqtw jaqb noqg Pwnbo si, pwnbog aoho Pwnbo goknyi hoo lvpw at tulug At Sw goknyi, hoo swrjaqb yuma maanam mam belinbo goknyi, hoggab no soq swrjaqb yuma maanam sam belin paku.”

⁴⁸‍Ho lvpw atv Daniyelnvn koijaqb xik-paqnum hoo naleqgo koibo-koibo akiv jinum, hoo mwam Bebilonwg gvda bumpwho pvvb bwwl doog mvnum hoo Bebilonwg nyijwq-nyegam nyi mwlwg pengko ho mwlwngam pwbw yaanbo peelo akwb mvknum.

⁴⁹‍Daniyelwg mvnyi-moiyul kogam gab, lvpw atv Sadrak, Mesak, hoo Abednegonvn Bebilon gvdag pagoqkam kvvyw-tada mvdwb mvknum. Hvbmabde Daniyel lvpw atwg dookho doonum.