Read Nyishi DANIYEL 3 Bible Online

DANIYEL 3 - Nyishi bible

DANIYEL 3

¹Lvpw at Nebukadnejjar hun guss ak mvnum, hoqg aongv camx kiubitnum hoo hoqg poopv ax kiubitnum. Mwv ham Bebilonwg gvdag Dura haapa ho mvl apnum.

²‍Ho Lvpw at Nebukadnejjar gaml jilinl kanamnum lvpw atwg ko tuup tulungam, pwbw bo tulungam, nyiit rad tulungam, tomswr-hony bo tulungam, gumn bwwnbo tulungam, hvvky-pootam tulungam, pvvb bwwl doog bo mwlwngam, hoo nyook ho saab mwlwngam Nebukadnejjarg guss sam darxaqko moodho lvkin gob hookum mvdwb goqnum.

³‍Ho lvpw atwg ko tuup tulungv, pwbw bo tulungv, nyiit rad tulungv, tomswr-hony bo tulungv, gumn bwwnbo tulungv, hvvky-pootam tulungv, pvvb bwwl doog bo tulungv, hoo nyook ho saab tulungv Nebukadnejjarg guss sam mvl aptvl darxaqko ho hookumnum. Hoo Nebukadnejjarg guss mvpnam agaho bulv daqlinum.

⁴‍Hoo mwlwngv tapa dvb puiyam baqnum, “Nul mwlwngam, nyiilu mwlwg, nyob luuxiam, hoo agam luuxiam goonbov,

⁵‍hwdlo nulv tuuly, piul, rwwxw, gungga, gitar, piul tabnam mam, hoo deed luuxy dum-dum taal dunam mam tapa yinlo, nulv Lvpw at Nebukadnejjarg hun guss mvpnam mam dumpo pvxwl xumtayin.

⁶‍Hoo hiyv lajaqkam ham dumpo pvxwl xuma boam nyebia jaqb wm xvwr jwr-jwrnam mvram urab joolwq tayin.”

⁷‍Hoqgab nyiilungv tuuly, piul, rwwxw, gungga, gitar, piul tabnam mam, hoo deed luuxy dum-dum taal dunam mam tapa yin, nyi mwlwngv, nyob luuxiv, agam luuxiv goonbov Lvpw at Nebukadnejjarg hun guss dvb mvpnam mam dumpo pvxwl xumtayin.

⁸‍Hoqgab hoq moodho Kaldiya nyi tuugin Juhudi nyiam aya mwwpa maab timb bukumnum.

⁹‍Bulv Lvpw at Nebukadnejjarnvn bibwqnum, “Lvpw ata, nwrba gob swwn ka!

¹⁰‍No, Lvpw ata, nyiicwr cwrxiv, tuuly, piul, rwwxw, gungga, gitar, piul tabnam mam, hoo deed luuxy dum-dum taal dunam yalam tapa yin, noqg hun guss akam dumpo pvxwl xum dvb, no pvvb ak mvl jilin paku.

¹¹‍Hoo hiyv lajaqkam ham dumpo pvxwl xuma boam wm xvwr jwr-jwrnam mvram urab joolwq dukub.

¹²‍Bebilon gvdangam pvvb bwwl doog mvdwb no hiyam xuqlin kunum Juhudi nyi ata go: Sadrak, Mesak, hoo Abednego, Lvpw ata soq nyi tulu si nam tvmw-kaaiyo; bulv noqg pwnbo tulungam, ho noqg hun guss akam kam dumpo pvxwl xuma.”

¹³‍Ho Nebukadnejjar vc loodab hang lingtwr twrya nv Sadrak, Mesak, hoo Abednegonvn gaml jitwl boa tvk hvl benum. Ho bulv soq nyi tulu sam lvpw atwg agaho boa jinum.

¹⁴‍Nebukadnejjar birwqnv bulam benum, “Sadrak, Mesak, hoo Abednego soq si jvqtw jaqkv yv, nulv ngoqg pwnbo gab bon nyima dvn ho ngoqg hun guss sam xuma dvn i?

¹⁵‍Sija nulv mwx-mvaqto hwdlo nulv tuuly, piul, rwwxw, gungga, gitar, piul tabnam mam, hoo deed luuxy dum-dum taal dunam yalam nulv tapa yin, ngoqg hun guss mvpnam mam dumpo pvxwl xumb nyiloqkam, nulv swrsol hoo altayin. Hvbmabde nulv xuma baloqkam, nulam nyebia jaqb xvwr jwr-jwrnam mvram urab joolwq tayin. Hoo hiyvg pwnbov nulam ngoqg alaq soqgv ywwlin tayin?”

¹⁶‍Sadrak, Mesak, hoo Abednego birwql hoo lvpw atam benum, “Nebukadnejjar nga, ngulv nam soq pagoq gab hog birwqsv dooma.

¹⁷‍Lvpw ata, soq si hvb nyik baloqkam, ngulug Pwnbo, hiyam ngulv mwwjwdvn hv ngulam xvwr jwr-jwrnam mvram hoqgv ywwlin dvb atorv doodwn, hoo mwv ngulam noqg alaq hoqgv naalin tayin.

¹⁸‍Hvbmabde hoqhvb nyima sujaqkam, Lvpw ata, no cengto ngulv noqg pwnbo tulu gab bon nyiram ho noqg hun guss akam ngulv xumram.”

¹⁹‍Ho Nebukadnejjar vc loodab hang lengnv mwwg nyuqmv bioqda kvla nv Sadrak, Mesak, hoo Abednegonvn ceebio baqnum. Ho mwv xvwr jwr-jwrnam mvram ham kvn yaiya go og xvwr tvk hvl gaml jinum.

²⁰‍Hoo mwv mwwg sipai atorbo tuugin Sadrak, Mesak, hoo Abednegonvn raqm dvb, hoo bulam xvwr jwr-jwrnam mvram urab joolwq mvdwb gaml jinum.

²¹‍Ho soq nyi tulu sam bulug vjam koodwb, bulug pusam gvdwb, bulug bopyangam bengdwb, hoo bulug asaq vj tulungam koodwb bulv bulam xvwr jwr-jwrnam mvram urab joolwq kunum.

²²‍Lvpw atv wm mvram mam vc loodab xvwr jwr-jwr mvdwb gaml jigam gab, wm mvram mam vc loodab og dvb xvwr jwr-jwrnum, hoqgab hiyv Sadrak, Mesak, hoo Abednegonvn mvramho joolwq bo nyiilungam wm moily taax kunum.

²³‍Hoo soq nyi oum si, Sadrak, Mesak, hoo Abednegonvn raqk tvl xvwr jwr-jwrnam mvram ura yaiyab haanum.

²⁴‍Ho Lvpw at Nebukadnejjar swrdorxeq dvb kaapanum hoo mwv nyebia jaqb daqrabnum. Mwwg tomswr-hony bo tulungam mwv bibwqnum, “Ngulv nyi oum go raqtwl wmho joolwq maan mvi yv?” Bulv birwqnv lvpw atam benum, “Jvqtwngv, Lvpw ata.”

²⁵‍Ho mwv birwqnv benum, “Hvbmabde ngo nyi vpy go roqtu maab wm mvram uraho gaql yvdwb kaapa do, hoo bulam hog akkam un mvgma; hoo vpy deen nyi akhv pwnbo tulug ko tuup ak hvb nyido.”

²⁶‍Ho Nebukadnejjar xvwr jwr-jwrko mvramg viyap bviywr ogumho haanum; ho mwv goqnum, “Sadrak, Mesak, hoo Abednego, Xitor Koibo Pwnbog nyera tulu, lvvgwb lengt ku, hoo soqb haato!” Ho Sadrak, Mesak, hoo Abednego wm hoqgv lvvgwb lengknum.

²⁷‍Hoo lvpw atwg ko tuup tulungv, pwbw bo tulungv, nyiit rad tulungv, hoo lvpw atwg tomswr-hony bo tulungv lvkin gob hookumnv nyi oumg gv ho wm yaqgab maanam mam kaanum. Bulug dumpo dum sookin jijaq gokam gumanum, bulug vj koonam mamkam hog akkam gumanum, hoo bulug gv ho wm rww gokam suumanum.

²⁸‍Nebukadnejjar birwqnv benum, “Sadrak, Mesak, hoo Abednegog Pwnbov xinam jaqkv, hiyv mwwg gumtwngam kanam tvl mwwg nyera tulungam ywwlin mvnum, hiyv mwam mwwjw swswl, hoo lvpw atwg gaml jinam mam haqpaqnum, hoo asaq pwnbo gab bon nyima bvla xum maab nyinv atwg gvvngam bulug atwg Pwnbo gab jipaqnum.

²⁹‍Hoqgab ngo pvvb ak mvgyukun: Nyi mwlwngv, nyob luuxiv, ho agam luuxiam goonbov Sadrak, Mesak, hoo Abednegog Pwnboam ceekol agam goob nyiloqkam hoqham vmwq yumgub twqtayin, hoo bulug nam tulungam kvl-jeem tayin, hoggab soq sib hiyvg pwnbov kam ywwlin dvb ator dooma dvn.”

³⁰‍Ho lvpw atv Sadrak, Mesak, hoo Abednegonvn Bebilon gvdaho saab koi yaiya dvb mvca kunum.