Read Nyishi DANIYEL 4 Bible Online

DANIYEL 4 - Nyishi bible

DANIYEL 4

¹Lvpw at Nebukadnejjar nyiilu mwlwngam, nyob luuxiam, hoo agam luuxy goonbo swcw so doonbo nulam swrsomalongv nat-baleq nvka!

²‍Xitor Koibo Pwnbov lomdwb swrdorxeq ngam nyij kunamv ngoqgab al kaapanum.

³Hwdjaq go koido mwwg swrjaqb kaakinam si, hwdjaq go mwwg swrdorxeqkv koido! Mwwg lvpw-hativ kuiyum xaqb dootayin. hoo mwwg pvvb bwwl doognamv hotam-hotamb dootayin.

⁴‍Ngo, Nebukadnejjar, ngoqg swwk-geek lvpwg doongam bo namho doominl doonum.

⁵‍Ngo yuma ak maanumv ngam bos mvnum. Ngo kartamho yubyikho hoo ngoqg nyiqry kaadwn hvb yuma maanamv ngam bos mvnum.

⁶‍Hoqgab ngo pvvb ak mvtwl Bebilonwg nyijwq-nyegam bo nyi mwlwngam ngoqg agaho boa mvdwb gaml jinum, ho bulam ngoqg yuma niqtuqkam betaml bekin mvdwb goqanum.

⁷‍Ho gwwn-nyiqry tulungv, nyoky nyub tulungv, Kaldiya nyi tulungv, hoo doonyi pool takaram xil cengn bo tulungv urab haanum, hoo ngo bulam yumangam betamnum, hvbmabde bulv ngam hoqg niqtuqkam betam nyomanam.

⁸‍Hvbmabde vtwr-anya ho Daniyel ngoqg agaho haanum— hiyam (mwam) ngoqg pwnbo eminam mingyw-mingcil Beltesajjar hvl eminum akv, hoo hiyvg aoho dvrwq pwnbog tulug yalv dooba boam—hoo ngo mwam yumangam betamnum,

⁹“Beltesajjar nga, gwwn-nyiqry tulug peelo bo akv, ngo cengdo dvrwq pwnbog tulug yalv noqg aoho doodwn hoo noqgab swrdorxeqb nyinamv hog nyipw sv maadwn, hoqgab ngoqg nyiqry kaal yuma maanam niqtuq sam no ngam betam tvb.

¹⁰‍Ngoqg kartamho ngo yubtwl nyiqriam kaanum: Ngo kaanum, hoo kaato, swcw nvg ra lvpaho svvn nwwg daqnum, hoo hoqhv vc loodab aonum.

¹¹‍Svvnv swwrab kunv hoo hwngkwnum, hoo hoqg niqtuqkv doangam cvvcnum, hoo ham swcw nvg ywwtwr mwlw hoqgv kaapanum.

¹²‍Hoqg nana tulungv kangam jaqnum hoo hoqg aaxiv naleqgo doonum, hoo hoqhv mwlwg dvs gob nyinum. Nyorog svdin tulungv hoqg doonyium niikumho doonum, hoo doag pvta tulungv hoqg haqb tuluho doogwnum, hoo saql doonbo mwlwngam hoqgv dvs jinum.

¹³“Ngo ngoqg kartamho yubyikho nyiqry kaanum, hoo kaato, rvkil doogbo gumtw dvrwqbo akv doa toloqkv ipoqnum.

¹⁴‍Mwv mwlwngam tapa dvb puiyam benv hoo betamnum: ‘Svvn ham kwrtab to hoo hoqg haqb tulu ham pvjwrto, nana tulu ham xaqxinl hoo hoqg aaxiam cwrsaq twqb mvto. Svdin tulungam hoqg doonyium niikum hoqgv hoo pvta tulungam hoqg haqb tulu hoqgv kelin mvto.

¹⁵‍Hvbmabde hoqg swtu hoqg rwbam yoqdwr la tama lvgab leetwl nyorog nwmw swwca bo pengko ho doomto. Ho mwam doag gums lvgab bomyaq mvto. Ho mwam svdin gvla nwmw lvgab swwl doomto.

¹⁶‍Vnyw kvn go mwv nyia kog mwwcwb mwwram; hvbmabde mwv svding mwwcwb mwwtayin.

¹⁷‍Soq agam pvvb sam rvkil bo tulungam mvnum, agam sam dvrwqbo tulungv pvvb sam jinum, ho vtwr anya moodam swwnbo nyia ko lvpw-haty lo mwlwngam Xitor Koibo Pwnbog pvvb bwwl doognam mam cengtayin hoo hoqham hiyam mwv mwwlwq dvn ham jitayin hoo hoqham laanyi maanbo nyi tulungam mvp jitayin.’

¹⁸‍Soq yuma sam, ngo Lvpw at Nebukadnejjar kaanum. Hoo no, Beltesajjar nga, ngam niqtuqkam bekin to, hoggab ngoqg lvpw soqg nyijwq-nyegam bo nyiilungv ngam niqtuqkam betam nyokma, hvbmabde no betam nyotayin, hoggab dvrwqbo pwnbo tulug yalv noqg aoho doodwn.”

¹⁹‍Ho Daniyel, hiyvg eminv Beltesajjar hvnam hv mwv meeg lomnum, hoo mwv lomduq mwwpanum. Lvpw atv birwqnv hoo benum, “Beltesajjar, yuma niqtuq sam bekin dvb no mwwdwq maabv.” Beltesajjar birwqnv hoo benum, “Ngoqg bir at, yuma sam hiyv nam oyum bo tulu gab hoo hoqg niqtuq sam bekinamv noqg ceebio tulu gab!

²⁰‍Noqg kaanam svvn, hogloq hv swwrab kunv hoo hwngkwnum, hoo hoqg niqtuqkv doangam cvvcnum, hoo ham swcw nvg ywwtwr mwlwngv kaapanum.

²¹‍hoqg nana tulungv kangam jaqnum hoo hoqho aaxiv naleqgo doonum, hoo hoqhv mwlwg dvs gob nyinum, hoq niikumho nyorog svdin tulungv doonyium hengnum, hoo doag pvta tulungv hoqg haqb tuluho doogwnum—

²²‍hoqhv no lak, lvpw ata, hiyv swwrabnum hoo hwngkw dvn. Noqg koinamv doonyi poolam swwc paku, hoo noqg pvvb bwwl doognamv swcw nvg ywwtwrnam gob doon kuba.

²³‍Hoo lvpw atv dvrwqbo ak rvkil doogbo ak, doa toloqkv ipoq dvb kaapanum, hoo begamv, ‘Svvnam kwrtab to hoo ham twryum to, hvbmabde swtu hoqgv rwbam yoqdwr la tama lvgab leetwl, nyorog nwmw pengko ho doom to, hoo mwam doag gums hoqgv bomyaq mvto, hoo vnyw kvn gob mwam nyorog svdin lvgab doom to,’

²⁴‍soq si yumag niqtuqkv, Lvpw ata: Soq si Xitor Koibo Pwnbog pvvb bwwl ngoqg bir at lvpw atam jinamv,

²⁵‍ho nam nyia ko pengko hoqgv ruqlin tayin, hoo no nyorog svdin tulu lvgab dootayin. Svv hvvbv nwmw dvnam hvb nam nwmw dvm dvb mvtayin, hoo nam doag gumsiv bomyaq tayin, hoo hoqhv nam vnyw kvn gob nyitayin, hwdlo no nyia ko lvpw-haty lo mwlwngam Xitor Koibo Pwnbog pvvb bwwl doognam mam cengma deedib hoo hoqham hiyam mwv mwwlwq dvn ham jitayin.

²⁶‍Hoo svvn swtu hoqg rwbam aptvk hvl gaml jinam hvb, hwdlo no Ao lvpwg pvvb tulungam bepa baloqkam, noqg lvpw-haty doonam mam no pwbwb cengtayin.

²⁷‍Hoqgab, Lvpw ata, no ngoqg soq tomswr-honynam sam loorwq to: jvqtwb nyigdvl noqg nyicam mviya to, hoo nyijab-nyiyiqnam tulungam aya mwwpal kaakin gvdwl noqg nyimuram mviya to, ho lokam noqg svvnam geenamv dooyu kamyi nvpv.”

²⁸‍Soq mwlw si Lvpw at Nebukadnejjarg aoho haanum.

²⁹‍Pool bvryw leq bvrnyiv wnya yuk moodho mwv Bebilonwg xinam lvpw namlo aoho wgaql yvnum,

³⁰‍hoo lvpw atv atam besnv hoo benum, “Soq koi dvb Bebilon sam ngoqg ator huqlw hoqgv ngo xinam lvpw namlo doogw gob hoo ngoqg yuunam mam koi mvdwb ngo mvmanam yv?”

³¹‍Lvpw atwg agamho gomcwrv raab doodu yukho, doa hoqgv yal ak dulnum, “Lvpw at Nebukadnejjar nga, nam soq sam goopa kun: Lvpw-hativ nam apaq paku,

³²‍hoo nam nyia ko pengko hoqgv ruqlin tayin, hoo no nyorog svdin tulu lvgab dootayin. Hoo svv hvvbv nwmw dvnam hvb no nwmwngam dvtayin, hoo no vnyw kvn gob hvb nyitayin, hwdlo no nyia ko lvpw-hatiam Xitor Koibo Pwnbo pvvb bwwl doognam mam no cengma deedib hoo hiyam mwwlwq dvn ham mwv jidwn.”

³³‍Ho dara gomcwr hoqg niqtuqkv Nebukadnejjarg aoho haanum. Mwam nyia ko pengko hoqgv ruqlin kunum hoo svv hvvbv nwmw dvnam hvb dvnum, hoo mwwg gv apongam doag gumsiv bomyaqnum mwwg dumv xookum vm aasonam hvb hwrlinum, hoo mwwg lvqsinv pvtag kiil hvb hwrlinum.

³⁴‍Vtwr anya aalho, ngo Nebukadnejjar, ngoqg vnyiqkv doa aob koodunum, hoo ngoqg mwwlaqkv ngam hookur kunum, hoo ngo Xitor Koibo Pwnboam paqnum, hoo hiyv kuiyum xaqb doon boam paqyalinco paql hoo mwam xiknum, hoggab mwwg pvvb bwwl doognamv kuiyum xaqb dooyu dvn, hoo mwwg lvpw-hativ hotam-hotam gob doodwn;

³⁵swcw soqg doonbo mwlw hv hog hvvtw kuma, hoo mwv mwwg mwwlwq kob gumtw tulug pengko ho nyidwn hoo swcw so doonbo tulug pengko hookam; hoo mwwg alaq hoqgv akjijaqkam aadob doonyi ram ho mwam benyi ram, “No hoggv nyit kun?”

³⁶‍Hoq mood jaqho ngoqg mwwlaqkv ngam hookur kunum, hoo hoqhv ngoqg lvpw-hatiam yuum dvb, ho ngoqg yuunam paqnam hoo xinamv ngam hookur kunum. Ngoqg tomswr-hony bo tulungv hoo ngoqg bir atv ngam meegaqnum, hoo ngoqg lvpw-hatiam ngo pwknum, hoo ngam koi yaiya dvb vbw jiknum.

³⁷‍Sija ngo, Nebukadnejjar ao Lvpw atam paqdwn hoo yuum dvn hoo xidwn, hoggab mwwg bonam nyinam mwlwngv lootw do hoo mwwg nyinam wnamv jvqtw do; hoo hiyv lardwn ham mwv yan dvb mvpa ku.