Read Nyishi DANIYEL 5 Bible Online

DANIYEL 5 - Nyishi bible

DANIYEL 5

¹Lvpw at Belsajjar mwwg xinam saab tulu gab koibo durum ak dvgnum hoo nyi lwwyw agaho opo twwnum.

²‍Belsajjar, hwdlo opongam twwka yukho, mwwg ab Nebukadnejjar Jerusalem hoqgv hun hoo rup baqanum dupum-dvrabho, lvpw atv la hoo mwwg xinam saab tulungv, mwwg nywxw tulungv, hoo mwwg nywxw xwwbaq tulungv hoq dupum-dvrab ho twwn dvb mwwnum.

³‍Ho bulv Pwnbog dvrwq namlo Jerusalem hoqgv hun dupum-dvrab baqanam mam naalinv dvrwq namlo hoqgv bwanum, hoo lvpw atv hoo mwwg xinam saab tulungv, mwwg nywxw tulungv, hoo mwwg xwwbaq nywxw tulungv hoq hoqgv twwn kunum.

⁴‍Bulv opongam twwtwl hoo hun hoo rup, tama, yoqdwr, svvda, hoo wlwg pwnbo tulungam paqnum.

⁵‍Ho dara nyi alaq lvqcw ak ilinum hoo lvpw atwg xinam namlo, lemp tvpko taqc gonwg cwqc ho lvr xeqnum. Hoo lvpw atv alaqho lvr xeqnam mam kaapanum.

⁶‍Ho lvpw atwg nyuqmv mooka-saqb kwlynum, hoo mwwg mwwnamv mwam mwwdwq mvnum; mwwg all alaqkv yusum-yaqgamnum, hoo mwwg lwbw pwnyiv tvmdwrnum.

⁷‍Lvpw atv vcjaqb sogoqnv nyiqry kaanbo tulungam, Kadliya nyi tulungam, nyoky nyub tulungam, hoo doonyi pool takaram xikal cengn bo tulungam boa tvk hvl goqnum. Lvpw atv Bebilonwg nyijwq-nyegam bo mwlwngam benum, “Hiyv lajaqkam soq xeqnam sam pooril, hoo hoqg niqtuqkam ngam bekin boam, lwwsa-lwwma bo vjam koom tayin hoo hun gviyam mwwg lwwpo ho tulwqtayin hoo ham lvpw-haty soqg oum deen lvpw at gob mvtayin.”

⁸‍Ho lvpw atwg nyijwq-nyegam bo mwlwngv haanum, hvbmabde bulv ham rilaq maanum ho lvpw atam hoqg niqtuqngam kam bekin nyomanum.

⁹‍Ho Lvpw at Belsajjar vc loodab mwwdwqnum, hoo mwwg nyuqmv mooka-saqal kwlynum, hoo mwwg xinam saab tulungv hendar hempar kumanum.

¹⁰‍Vi-kooriv, lvpw at gvla mwwg xinam saab tulug gomcwram tapa tvl, durum dvk cwwrwb haanum, hoo vi-kooriv benum, “Lvpw ata, nwrba gob swwn ka! Noqg mwwnam mam nam mwwdwq maabv ho noqg nyuqmv mooka-saqmabv.

¹¹‍Noqg lvpw-haty si dvrwq pwnbo tulug yalv doobanam nyi ak doodwn. Noqg abwg swwd moodho huto bvla cenglaqnamv hoo mwwlaqnamv pwnbog mwwlaqnam hvb mwwg aoho kaapanum, hoo Lvpw at Nebukadnejjar, noqg ab—lvpw at noqg ab—mwam gwwn-nyiqry tulug, nyiqry kaanbo tulug, nyoky nyub tulug, Kadliya nyi tulug hoo doonyi pool takaram xil cengn bo tulug pengko ho peelo bo akwb mvpnum,

¹²‍hoggab mwv dengky looda bo yalv, cenglaqkv, hoo mwwlaqkv doogam gab, yuma tulungam, niitin-puqtungam, hoo vs-axaqboam pvvb mvnnan atorv soq Daniyel uraso, hiyam Beltesajjar hvl eminam ho kaapanum. Sija Daniyelnvn goqm to, hoo mwv soq niqtuqkam kaatam tayin.”

¹³‍Ho Daniyelnvn lvpw atwg agaho boanum. Lvpw atv birwqnv hoo Daniyelnvn benum, “No Juda hoqgv nyumwb boanam Daniyel yv, hiyam ngoqg lvpw ab Juda hoqgv boanum.

¹⁴‍Noqg aoho pwnbo tulug yalv doodwk hvl ngo tapa paku, hoo hutongv la cenglaqkv hoo dengky jaqb mwwlaqkv noqg lvgab doodwk hvdo.

¹⁵‍Sija nyijwq-nyegam bo nyi tulungam, nyiqry kaanbo tulungam soq xeqnam sam pooril hoq niqtuqkam ngam bekin mvdwb ngoqg agaho boanum, hvbmabde bulv hoq pagoqkam bekin nyokma.

¹⁶‍Hvbmabde no soq niqtuqkam bekin dvb la vs-axaqkam pvvb pagdvb cenglaq dvn hvl ngo tapa paku. Sija no soq xeqnam sam pooril niqtuqkam ngam bekin baloqkam, nam lwwsa-lwwma bo vjam koom tayin hoo noqg lwwpo ho hun gviyam tulwq jitayin hoo nam oum deen lvpw at gob mvtayin.”

¹⁷‍Ho Daniyel birwqnv hoo lvpw atwg agaho benum, “Noqg akiam noqgab doom suto, hoo noqg vi lvqcam nyi asaqkam jito. Hvbmabde, ngo soq xeqnam sam pooril hoo lvpw atam hoqg niqtuqkam mwam bekin jitayin.

¹⁸‍Lvpw ata, Xitor Koibo Pwnbov noqg ab Nebukadnejjarnvn lvpw atwb la koidvb la yuudub hoo xinam paqnam mam jinum.

¹⁹‍Hoo mwam koijaq dvb mwv jigam gab, nyiilu mwlwngv, nyob luuxiv, hoo agam luuxy goonbov mwwg agaho bosil tvmdwrnum. Hiyam mwv mengdwb mwwnum ham mengnum, hoo hiyam mwv swwb dvb mwwnum, ham mwv swwmnum; hiyam mwv mvca dvb mwwnum, ham mvcanum, hoo hiyam mwv yan dvb mvdwb mwwnum, ham yan mvnum.

²⁰‍Hvbmabde hwdlo mwwg hangv koi gob mwwnum hoo mwwg yalv tamynum ho mwv larl-xal yvnum, mwwg lvpw pwqlw hoqgv mwam mvgeqnum, hoo mwwg yuunam mam mwwg hoqgv naareqnum.

²¹‍Mwam nyia ko tulug pengko hoqgv ruqlinum, hoo mwwg mwwnamv svdin mwwnam hvb mwwnum, hoo mwv nyorog svdam tulu lvgab doonum. Mwam svv hvvbv nwmw dvnam hvb dvmnum, hoo mwwg gv apongam doag gumsiv bomyaq mvnum, hwdlo nyia ko lvpw-hatiam Xitor Koibo Pwnbo pvvb bwwl doognam mam cengnam xaqb hoo hiyam mwv mwwlwq dvn ham mvp jidwn.

²²‍Hoo Belsajjar, no mwwg kob nyitwl, ho soq mwlw sam no cengtwl, noqg hangv yan maai yv,

²³‍hvbmabde no atv atam koi gob jooiyin joorab sunv ao lvpw At Swn ceebio dvb mvpa ku. Hoo mwwg dvrwq namlog dupum-dvrab pam noqg agaho joolin mvpa ku, hoo no la noqg xinam saab tulungv, noqg nywxw tulungv, noqg xwwbaq nywxw tulungv hoq hoqgv opo twwn paku. Hoo no rup gvla hunwg, tamag, yoqdwrg, svvdag, hoo wlwg pwnboam xumn paqnum, hogloq hv kaapa maadwn, tapa maadwn, cengma dvn, hvbmabde noqg saqnamv Pwnbog alaqtv doodwn, hoo hiyvg ho noqg nyinam wnam mwlwngv doon boam, no xikmanum.

²⁴“Ho mwwg dook hoqgv alaqkam kaanum tvl soq sam xeqm dvb jinum.

²⁵‍Hoo soq xeqnam si soq sam xeqlinum: MENE, MENE, TEKEL, hoo PARSIN hvl xeqnum.

²⁶‍Soq pagoq soqg niqtuqkv soq si: MENE hvgdvn si Pwnbov noqg lvpw-hatig aalam xikal ap paku hoo ham twrd moodam haam paku.

²⁷‍TEKEL hvgdvn si, nam jaakanan ho jaakanamv hvrab jabjab dvb kaapanum;

²⁸‍PERES, hvgdvn si noqg lvpw-hatiam mvpin mvra hoo Medesam la Parsi nyiilungam jipa kun.”

²⁹‍Ho Belsajjar Daniyelnvn lwwsa-lwwma bo vjam koom dvb, ho mwwg lwwpo ho hun gviyam tulwq tvk hvl gaml jinum, hoo mwwg bvrwqkam pui dupi mvdwb jinam, ho mwam lvpw hoqg oum deenbo pvvb bwwl doogbo gob mvknum.

³⁰‍Ho hoq ai daraho Kaldiya nyi lvpw at Belsajjarnvn mengknum.

³¹‍Hoo Medeg Darius hwdlo mwv vnyw camx leq nywnyi gob akam yukho lvpw-hatiam naaknum.