Read Nyishi DANIYEL 6 Bible Online

DANIYEL 6 - Nyishi bible

DANIYEL 6

¹Hoqhv Dariusnvn hinglwq jaq dvb nyinum lvpw-haty ho lwwg la camnyi gob nyiit rad tulungam xuqlin tvl lvpw-haty mwlwngam kvvyw-tada mvnum;

²‍hoo oum go gvt radam bulug aoho kviyw tada mvdwb mvpnum, ho Daniyel hoq hoqg akwn, ho nyiit rad tulungv bulv bulug nyinam wnam mam bulam jidwb nyinum, ho lvpw atam hog akam yuupaq mvma dvb.

³‍Ho Daniyel gvt rad gvla nyiit rad tulug pengko hoqgv mwlwngam alyab xinam gob nyinum, hoggab mwam dengky bo yalv mwam doobanum. Hoo lvpw atv lvpw-haty mwlwho mwam kviyw tada mvdwb xuqdwb mwwnum.

⁴‍Ho gvt rad tulungv la nyiit rad tulungv lvpw-hatig bvrwq gab Daniyelwg aoho timb dvb pagoq meegaqnum, hvbmabde bulv timb dvb pagoq akam meepal ho nyixiaqnam kaapa maanum, hoggab mwv dengky jaqb haagabl nyinum ho nyixiaqnam ho nyimurnam mwwg lvgho kaapa maanum.

⁵‍Ho hoqg nyi tuluhv benum, “Hwdlo ngulv mwwg Pwnbog pvvb pagoq hoqgv mwam timb dvb nootu mabnyiloqkam, ngulv soq Daniyel sam nootu dvb pagoq meepa ram.”

⁶‍Ho soq gvt rad tulungv la nyiit rad tulungv lvkin gob pvvb ak mvl loomin sulayil lvpw at dookub haanv hoo mwam benum, “Lvpw at Darius nga, nwrba gob swwl doon ka!

⁷‍Lvpw-hatig hoqg gvt rad tulungv, pwbw bo tulungv hoo saab tulungv, tomswr-hony bo tulungv hoo nyiit rad tulungv mwlwngv lootv mins layil hoo ham nyi mwlwg aoho nyim dvb nyinum, ho lvpw ata, hiyv lajaqkam, nam apaq peel, aal cammum gob asaq pwnbo la nyi asaqkam xumn boam sony nyot tulug turub joolwq mvto.

⁸‍Sija, lvpw ata, soq pvvb sam nyirab mvdwb no morxtubto, ho hvb mvb nyiloqkam, Medes gvla Parsiya nyi tulug pvvblo hoqham kwly dvb la nookur dukub dookram.”

⁹‍Hoqgab Lvpw at Darius ham morxtubt kul ham nyim dukub gaml jinum.

¹⁰‍Hwdlo Daniyel pvvbam morxtubg nvba hvl cengpa yukho, mwwg nammwb mwv wnum hogloq nam ao hoqg pupumv Jerusalem daiyab kuqko tvl dookub caonum. Mwwg otuqho nyiknam hvb, mwv aalam luum go lwbw kumbwl xumnum hoo mwwg Pwnbog agaho paqyalinco paqnum.

¹¹‍Ho soq nyi tulu si lvkin gob haanv hoo Daniyelnvn mwwg Pwnbog agaho xumdwb kaapanum.

¹²‍Ho bulv ogumb hvvnwqnv hoo lvpw atwg agaho pvvb nyim dvb hvl benam bvrwqkam benum! “Lvpw ata, no pvvb ak nyi mwlwngam nyim dvb morxtumanam yv, ho hiyv lajaqkam, Lvpw ata, nam apaq peel asaq pwnbo la nyi asaqkam xumn boam, sony nyot tulug turub joolwq dvb hvl bemanam yv?” Lvpw atv birwqnv hoo benum, “Pvvb bepnamv hvraqb dootayin, Medes gvla Parsiya nyi tulug nyicwngv hvb doodwn, lok pvvb mvknam mam kwly dvb hoo hookur dvb nyik maadwn.”

¹³‍Ho bulv birwqnv hoo lvpw atwg agaho benum, “Daniyel, hiyam Juda hoqgv nyumwb boanam akhv nam tvmw-taiyo do, Lvpw ata, noqg morxtubl pvvb jinam hamkam tvjw ma, hvbmabde mwv aalam luum go asaq pwnboam xuml doodo.”

¹⁴‍Ho lvpw atv, hwdlo mwv hoq gomcwr tulu ham tapa yukho vcjaqb mwwrnum hoo mwv Daniyelnvn ywwlin dvb mwwnum. Hoo mwam ywwlin dvb mwv ariyum doonyiv haanam gob nyikanum.

¹⁵‍Ho nyi tulungv lvkin gob pvvbam loomin sulayil lvpw atam benum, “Cengto, Lvpw ata, Medes gvla Parsiya nyi tulug nyicwngv lok lvpw atv pvvb mvl nyim dvb mvknam mam ham kwly kuma dvn.”

¹⁶‍Ho lvpw atv gaml jitkul, hoo Daniyelnvn boal hoo sony nyot tulu turub pvqlwq kunum. Lvpw atv Daniyelnvn benum, “Nywywngam toxa maab noqg mwwjwnam Pwnbov, nam ywwlin gvnka!”

¹⁷‍Hoo wlwngam joanum hoo paat turug gambam ngurtumnum, hoo lvpw atv la mwwg xinam saab tulungv lvkin gob mwwg alaq hoqgv morxtub tvl ngurtuml apnum, Daniyelnvn turuho pvqlwq dvb birnam mam akkam kwly nyok maanum.

¹⁸‍Ho lvpw atv mwwg xinam namlob wknum hoo ai yupw dery reenum; ho mwv soomin nyirmin kumanum, hoo mwv ai yumy dook maanum.

¹⁹‍Ho ar huur-mumur kalam, lvpw atv gorab layil hoo nyebia jaqb sony nyot tulu turub wnum.

²⁰‍Daniyelnvn hogloq ho pvqlwq ko paat turu ogumho hwdlo mwv hvvnwq yin, mwv mwwdwql nabgam tvl vcjaqb goqnum. Lvpw at Daniyelnvn benum, “Daniyel la, swwnbo Pwnbog nyeranga, no hiyam nywywngam toxa maab noqg mwwjwnum Pwnbov, nam sony nyot tulu turu hoqgv ywwlin pak yv?”

²¹‍Ho Daniyel lvpw atam benum, “Lvpw ata, nwrba gob swwn ka!

²²‍Ngoqg Pwnbov mwwg gumtwngam kanam tvl sony nyot tulug agam mam kuqtumnum, hoo bulv ngam hog un-tar mvg jima, hoggab ngo mwwg agaho timb dvb kaapa maanum; hoo Lvpw ata, noqg agaho hookam, ngo hog nyixiaq dooma.”

²³‍Ho lvpw atv vc loodab hemp poknum, hoo Daniyelnvn paat turu hoqgv naalin mvdkub gaml jinum. Hoqgab Daniyelnvn paat turu hoqgv naalin kunum, hoo mwam hog akkam un-tar mvgnam kaapa maanum, hoggab mwv mwwg Pwnboam mwwjw swswnum.

²⁴‍Hoo Daniyelnvn aya mwwpa maab hang baqnbo tulungam nootul boal bul mwlwngam, bulug ko tulungam, hoo bulug nywxw tulungam sony nyot tulu turub pvqlwq mvdwb lvpw atv gaml jinum. Hoo bulv sony nyot tulug turuho hooc-hodaq maatab sony nyot tulungv bulam gvmrwqnum hoo bulug alongam dwrtu-dwryu dvb mwlwngam kotwr kunum.

²⁵‍Ho Lvpw at Darius nyiilu mwlwngam, nyob luuxiam, hoo agam luuxy goonbov swcw nvg aoso doonbo tulungam xeql benum: Swrsomalongv nulug aoho koi yaiyab doonka.

²⁶‍Ngo pvvb ak mvl jigyin, ngoqg xinam lvpwlo ngoqg pvvb bwwl doognam nyi mwlwngv Daniyelwg Pwnbo aga lo tvmdwrl hoo bos nvka, hoggab mwv swwl doonbo Pwnbov, nwrba gob swwl doodwn; mwwg lvpw-hatiam nywywngam twrnyi ram, hoo mwwg pvvb bwwl doognamv swcw nvg ywwtwr namgob dootayin.

²⁷Mwv ywwlin dvn hoo naalin dvn; mwv koox dvbla swrdorxeq dvb nyis tulungam nyidwn ao lvpw tolo la swcw nvg aoso, sony nyot tulu turug gombu hoqgv hiyv Daniyelnvn ywwlin pakun.”

²⁸‍Hoqgab Parsiya nyi tulug lvpw at Darius gvla Sairuswg pvvb bwwl doog yikho soq Daniyel si nyet tvl swwl-geel dooknum.