Read Nyishi DANIYEL 7 Bible Online

DANIYEL 7 - Nyishi bible

DANIYEL 7

¹Bebilonwg lvpw at Belsajjarg otuq vnywho Daniyel mwwg kartamho mwv yubdul dooi yikho yuma maal nyiqry tulungam kaanum. Ho mwv yumangam xiqtu layil hoo hoqg komsum pagoqkam betamnum.

²‍Daniyel bibwqnum, “Aiho ngo nyiqry kaanum, hoo kaato, ao lvpwg dooi vpiv koibo sa-svlongam vcjaqb hwqrab dvb yidinum.

³‍Hoo akwn-akwn asaq-asaqtvl koibo sa-svlo hoqgv svdin dorpy go daqlinum.

⁴‍Otuq ak hv sony nyot ak hvb nyitwl xookum hvb alap gvnum. Ho ngo hoqhvb koodul dooi yikho hoqg alapv yoqpaqnum, hoo hoqhv ked hoqgv daqrabnum hoo loqd vnyi gob aoho nyi daqnam hvb daqdwb mvnum, hoo nyia ko mwwjam ham jinum.

⁵‍Hoo kaato, ho vnyi deen svdin akta lengnum, hv sutum hvb nyinum. Hoqhv taqc gonho daqrabnum. Hoqhv oxub soum go hoqg agam exy pengko ho habgabnum; hoo hoqham benum, ‘Gorabto, naleqgo vdinam dvto.’

⁶‍Soq kokw so ngo kaanum, hoo kaato, asaq ata hogga takar hvb nyinbo ak lengnum, ho hoqg langk ho pvta alap lvpy go gvnum. Hoo svdin hv dumpo pwpy go doonum, hoo hoqham pvvb bwwl doog mvdwb ator jinum.

⁷‍Soq kokw so ngo ai nyiqry tulungam kaanum, hoo kaato, svdin dorpy deenhv bos kaapa looda dvb la kor-karaq dvb la vc loodab ator ak kaanum. Hoqhv vc loodab yoqdwr exiv gvnum; hoqhv hognvkam cexnam ham vmwq-akaq dvb cimwqnum hoo hoggv apaqnum ham hoqg lvpia lvgab caajabnum. Hoq akhv svdin mwlwg pengko ho kvvnyir gob nyinum, hoo hoqhv vrrw rwwyw go gvnum.

⁸‍Ngo vrrwngam koodul dooi yikho, hoo kaato, otuqg vrrw rwum gon buucuq maatab, bulug pengko hoqgv vrrw rwwnyo bo ata caalinum. Hoo kaato, hoqg vrrw ho nyia ko vnyiq hvb nyitwl doonum, hoo agamv koibo pagoqkam goodul doonam.

⁹‍Hwdlo ngo kaanum, pvlw tulungam tvl apnum, hoo Kolwg aalho pvvb bwwl doogbov mwwg dootam mam naanum; mwwg vjv tapam hvb puulunum, hoo mwwg dumpo hoqg dumv svcaq hvb puulunum; mwwg pvlw dootamv wm moily bioql doonum; hoqg ceka tulungv wmmwb gudul doonum.

¹⁰Wmv iss pobub tonum hoo mwwg aga hoqgv lvvgwb lengnum; lwwyw-lwwyw gob mwam bon nyijnum, hoo camg lwwyw lwwyw gob mwwg agaho daqnum; pw-hwwdwb nyel doorabnum, hoo kitap tulungam lwqkonum.

¹¹‍Vrrw hoqgv koibo agam mam doodul doonam yalam ngo kaanum. Hoo ngo hvb koodul dooi yikho, svdinam mengnum, hoo hoqg gv apongam twryumnum hoo ham wm xaam dvb joolwqnum.

¹²‍Ho asaq svdin tulug gon ham bulug pvvb bwwl doog mvdwb atoram naapaq kunum, hvbmabde bulug swwgam anyo mood gob la vnyw gob swwmnum.

¹³‍Ngo aiho nyiqry tulungam kaanum, hoo kaato, doag doomwq lvgab nyia ko tuup hvb nyinbo ak haanum, hoo mwv Kolwg Aal tulug pvvb bwwl doogbo dookho haanum hoo mwwg agaho daqanum.

¹⁴Hoo mwam pvvb bwwl doog mvdwb atoram jipa kun hoo yuunam mam la lvpw-hatiam, nyiilu mwlwngv, nyob luuxiv, hoo agam luuxy goonbov; mwam bon nyij dvb nyipa; mwwg pvvb bwwl doognamv kuiyum namgub pvvb bwwl doogdvn, hoqhv niita ma, hoo mwwg lvpw-hativ nywywngam twrram.

¹⁵“Daniyel, ngo, ngoqg ura soq yalv ngam mwwdwq mvnum, hoo ngoqg nyiqry kaanamv ngam mwwdwq mvnum.

¹⁶‍Hoqho daqnbo akwg dookub ngo hvvnwqnv mwam soq hog mwlwg jvqtwngam toxnum. Ho mwv ngam hoq pagoqg niqtuqkam betamnum hoo ngam cengm dvb jinum.

¹⁷‘Soq koiywb dorpy go svdin tulu si hvbnyiloqkam swcw soqgv lvpw at vpy go daqrab mvtayin.

¹⁸‍Hvbmabde Xitor Koibo Pwnbog nyera tulungv lvpw-hatiam nvvrwq tayin hoo lvpw-hatiam nwrba cwtam hoqgv nwrba cwtam gob gumn bwwtayin.’

¹⁹“Ho svdin dorpy deenwg jvqtwngam ngo cengtws mwwnum, hogloq akhv svdin mwlwngam kvvnyir yaanum, vc loodab bos dvb yoqdwr exiam gvnum, hoo hoqg kiilv tamangam gvnum, hoo hoqhv mengnum hoo vmwq yumgub cimwqnum hoo hoggv mingyum-mingpinam mam lvpia lvgab caajabnum,

²⁰‍hoo hoqg dumpo hoqg vrrw rwwyw pagoqkam, hoo vrrw rwum gon otuqb yoql maatab asaq vrrw rwwg lengnum, vrrw ho vnyiq gvnam boam la koibo pagoqkam agam goonam mam, hoo hoqhv kaadwb ajin tulungam koi yaanum.

²¹‍Hwdlo ngo kaanum, hoq vrrwngv Pwnbog nyera tulu lvgab nyob panum hoo bulam nyob paiyanum,

²²‍Kolwg Aal tuluho pvvb bwwl doogbov haanum gob, hoo Xitor Koibo Pwnbog nyera tulungam pw-hwwdwb jinum, hoo moodv haaknum hwdlo Pwnbog nyera tulungv lvpw-hatiam gumnwb doog kunum.

²³“Soq sib mwv benum: ‘Dorpy deen svdin, lvpw-haty vpy deenbov swcw nvg aoso dootayin, hoqhv mwlwg lvpw-haty hoqgv luusaq tayin, hoo hoqhv swcw mwlwngam dvmeqtayin, hoo hoqham caajab tayin, hoo hoqham vmwq yumgub mvtayin.

²⁴Vrrw rwwyw si hvbnyiloqkam, soq lvpw-haty soqgv lvpw at wyw go daqlin tayin, hoo asaq ak bulug kokwb daqlin tayin; mwv otuq ak hoqgv luusaq tayin, hoo lvpw at oum gon ham mviya tayin.

²⁵Mwv Xitor Koibo Pwnboam ceekol agam gootayin, hoo Xitor Koibo Pwnbog nyera tulungam hentwr hemtayin, hoo moodam la pvvbam kwly dvb mwwtayin; hoo mood ak, mood vnyi go, hoo mood papo bo ak, bulam mwwg alaq uraho jitayin.

²⁶Hvbmabde pw-hwwk nyel ak mvptayin, mwwg pvvb bwwl doognam atoram naapaq tayin, ham dvmeql hoo twrkiq twrmal twryum tayin.

²⁷Hoo lvpw-hatiam la atoram doa nvg niikum lo koibo lvpw-hatiam Xitor Koibo Pwnbog nyera tulungam jitayin; bulug lvpw-hativ kuiyum xaqb lvpw-haty gob dootayin, hoo pvvb bwwl doogbo mwlwngv bulv bon nyil hoo tvjw tayin.’

²⁸“Soq si pagoqg vtwr-anyangv. Daniyel ngoqgab nyiloqkam, ngoqg mwwnamv ngam vc loodab mwwdwq mvnum, hoo ngo mooka-saqnum, hvbmabde ngo soq pagoq sam ngoqg hang uraho pvvknum.”