Read Nyishi DANIYEL 8 Bible Online

DANIYEL 8 - Nyishi bible

DANIYEL 8

¹Lvpw at Belsajjarg vnyw nywum gob pvvb bwwl doog yikho, Daniyel ngo nyiqry ak kaanum, hoq kokw so otuqcob ngam kaakinum.

²‍Hoo ngoqg nyiqry kaanamho, ngo kaapanum; Elam gvdag Susag rvviyw uraho doonum. Hoo ngoqg nyiqry kaanamho, ngo Ulaig silamho doonum.

³‍Ngoqg vnyiqkv piorabl ngo kaanum, hoo kaato, silamg sugurho yaap tvmwr dorg doqdunam. Hoqhv vrrw rwwnyi go gvnum, hoo vrrw rwwnyi-rwwnyiv aonum, hvbmabde vrrw rwwgwn hv rwwgwnam ao yaanum, hoo ao yaanbo rww hv kokw so caalinum.

⁴‍Yaap tvmwrhv dou-haagab hoo nyoodum bvla nyooko xeqreq reqkwrnum. Svdin akkam mwwg agaho daqnyi maanum, hoo mwwg ator hoqgv nyi akjijaqkam ywwlin bo doomanum. Mwwg mwwlwq kob mwv nyinum hoo koibo gob nyiknum.

⁵‍Ho ngo ham mwwdul dooi yikho, kaato, sibin bimp dorg haabnv ked aoho dadaqmab dou-haagag swcw nvg aob wpeqnum. Hoo sibin dorhv mwwg vnyiq pengko ho vrrw rwwkin go gvnum.

⁶‍Mwv yaap tvmwr vrrw rwwnyi bo dookub haanum, hogloq ham ngo silam sugurho doqdu dvb kaapa kunum, hoo mwv mwwg ator huqlw hoqgv mwwg dookub xaranum.

⁷‍Ngo mwam yaap tvmwr ogumb hvvnwq dvb kaapanum, hoo mwv mwam vc loodab ceekol haaxaqnum hoo yaap tvmwram panum hoo mwwg vrrw rwwnyiam pvtwrnum. Hoo yaap tvmwrv mwwg agaho daqdwb ator dook maanum, hvbmabde mwv mwam ked deela ho patab kunum hoo mwam caajabnum. Hoo hoqho yaap tvmwram mwwg ator hoqgv ywwlin dvb nyi akjijaqkam dook maanum.

⁸‍Ho sibin hv vcjaqb koinum, hvbmabde hwdlo mwv ator yikho, koibo vrrwngv dwrtu kunum, hoo hoqg kwlib kaadar cekar dvb vrrw rwwpy go dou-caga-haagab hoo poop-daayarb tuugab tvl hwrlinum.

⁹‍Hoq pengko hoqgv vrrw rwwnyo bo ak hwrlinum, hoqhv vc loodab koi dvb swwknv nyooko daiyab, dou-caga daiyab, hoo yuunam gvda daiyab yvmpw kunum.

¹⁰‍Hoqhv vc loodab koiywb swwnum, hv doonyi-pool takaram kam swwcnum. Hoo ao toloq gumtw tulu gon la takar tulu gon deela akob hurgeqnum hoo bulam caajabnum.

¹¹‍Hoqhv vc loodab koinum, ao gumtwg Lvpw at hvbkalam koinum. Hoo lwxiam mw galoqkv boyuqnam akiam naapaq pakun, hoo mwwg dvrwq namlongam mvpaq kunum.

¹²‍Hoo nyimur ko-gab ao gumtw akam la boyuqnam akiam lvkin gob jitayin, hoo hoqhv deela lo jvqtwngam jitayin, hoo hoqhv bon nyil swwta-geetayin.

¹³‍Ho ngo dvrwqbo akv agam goodu dvb tapanum, hoo dvrwqbo asaq ak agam goodu boam goonum, “Hoggab hog hwd oyu go lwxiam boyuqnam aky pagoq gab nyiqry koodu tayin, nyimur nyinamv dooxa dvb mvdwn, hoo dvrwq namlo gab jidul dootayin hoo ao gumtwngam lvpia uraho caajab tai kun yv?”

¹⁴‍Hoo mwv ngam benum, “Hoqhv 2,300 ariyum gobla ar gob nyitayin. Hoqhvb nyixo kokwngam dvrwq namlongv otuqb hvb kvtaqb nyikur taikun.”

¹⁵‍Hwdlo Daniyel, ngo nyiqry kaal kaapa yukho, ngo hoqham cengdwb meegaqnum. Hoo kaato, ngoqg agaho nyi hvb nyinbo ak daqlinum.

¹⁶‍Hoo ngo Ulaig sugur pengko ho nyi akwg yalam tapanum, hoo hoqhv goqnum, “Gabriel, soq nyi sam nyiqry kaanam mam cenglaq mvdvb mvdo.”

¹⁷‍Ho mwv ngoqg daqk ogumho hvvnwqnum. Hoo hwdlo mwv haanum, ngo vcjaqb bosnum hoo ngoqg nyuqmv akob nywbabnum. Hvbmabde mwv ngam benum, “Cengto, nyia ko tuupa, nyiqry kaanam si twrdy moodam kaakinum.”

¹⁸‍Hoo hwdlo mwv ngam agam goonum, ngoqg nyuqmv ked yaab nywbab tukul yubngaq kunum. Hvbmabde mwv ngam muu nv hoo ngam daqrab mvnum.

¹⁹‍Mwv benum, “Kaato, hoggv haaxaq xvqtwr alo nyitayin, ham ngo nam cengm dvb mvtayin, hoggab hoqhv twrdy moodam betam pan.

²⁰‍Vrrw rwwnyi bo noqg yaap tvmwr kaanum hv, Mediya gvla Parsiya lvpw at tulungam kaapan.

²¹‍Hoo sibin hv hvbnyiloqkam Gwriswg lvpw atv. Hoo mwwg vnyiq pengko ho koi jaqb vrrw doonbo hv otuq jaqg lvpw atv.

²²‍Vrrw hoqg dwrtunamv hvbnyiloqkam, hoqg kwlib rwwpy go hwrlinum, mwwg lvpw hoqgv lvpw-haty vpy go swwrab tayin, hvbmabde mwwg huqlw lvg bvma.

²³‍Hoo bulug lvpw-haty vtwr-anya moodam, hwdlo bulug nyimur nyinbov nyitwr yukam, haakam bo lvpw at ak, hiyv niitin-puqtungam cengnbo ak daqlin tayin.

²⁴‍Mwwg huqlwngv vc loodab koi tayin—hvbmabde mwwg atwg huqlw hoqgv ma; hoo mwv bos looda dvb mucu-mviya tayin hoo mwv hoggv nyidwn ham niqtuq lengm tayin, hoo atorbo nyiilungam la dvrwqbo nyiilungam twrtayin.

²⁵‍Mwwg gwwlyw jaqb gwnam-purnamv mwwg alaqkam swwd-geedwb mvtayin, hoo mwwg atwg mwwnamv mwam koi dvb mvtayin. Hog beo coomab naleqgo nyiam twrtayin. Hoo Lvpw atwg ko tuup tulungam kam ceeko dvb daqrab tayin, hoo mwam vmwq gob mvtayin—hvbmabde nyia ko alaq hoqgv ma.

²⁶‍Ariyum mam la arho nyiqry kaanam hv jvqtwngam betam pakun, hvbmabde nyiqry kaanam mam mutuml apnum, hoggab hoqhv sija galoqkv naleqgo aal haady bo tulungam begdvn.”

²⁷‍Hoo Daniyel, ngo, mviya kunum hoo vc cil aalv naleqgo doonum. Ho ngo gorabnum hoo lvpw atwg bon nyita-betanam bvrwqkam nyidwb mwwnum, hvbmabde ngam nyiqry kaanamv mwwdar mvmanum hoo hoqham cengk maanum.