Read Nyishi DANIYEL 9 Bible Online

DANIYEL 9 - Nyishi bible

DANIYEL 9

¹Otuqjaq vnywg Ahasueruswg ko tuup Darius, Mede hosiqkv, Kaldiya tulug lvpw-haty ho lvpw at gob mvknum—

²‍mwwg otuq jaqb lvpw pwl doog yik vnyw ho, Daniyel, ngo kitap tulug uraho xikanam vnywg tulungam kaapanum, At Swg gomcwrv nyiqry benbo Jerimiyanvn nyiqry kaamnum, vnyw cam kvn go Jerusalemv ocu-aiya tvl doodynam mam pagoqkam.

³‍Ho mwam swgwnam lvgab aya mwwpa tvbwk hvl dery reel xabl-riil tuila vjam kootwl mub torlu tvl, ngoqg nyuqm mam ngo Pwnbo At Sw dookub pwrnv konum.

⁴‍Ngo Pwnbo At Swn xumnum hoo nyixiaqkam xaqlinum, ho benum, “At Swa, koi bvla swrdorxeqbo Pwnbo, hiyv pvvb birnam mam pvvdwn hoo mwam aby boam mwwg tumab abynam lvgab aby dvn hoo mwwg gaml tulungam pvvn boam,

⁵‍ngulv nyic nyipa ku hoo nyixiaq paku hoo tvjw maab nyiknv nyic-nyiangam nyipa ku, hoo noqg gaml tulu hoqgv la pvvb tulu hoqgv wiyeq paku.

⁶‍Hiyv noqg eminlo ngulug lvpw at tulungam, ngulug lvpw atwg ko tuup tulungam, hoo ngulug ab tulungam, hoo gvdag nyi mwlwngam agam gooyikho, ngulv noqg nyera nyiqry benbo tulungam tama tukbanyi.

⁷‍At Swa, lootw nyedarnamv noq gvknyi, hvbmabde Judag nyiilungam, Jerusalemho doonbo nyiilungam, hoo Israel nyi mwlwngam, ogumho doon boam hoo aado ho doon boam, gvda mwlwho noqg ruqpaq kunam mam, soq aal so ngulug hvnywngam bepor paku, hoggab bulv noqg aoho ximab surjaqb nyit kubanyi.

⁸‍Ngulam, At Swa, ngulug lvpw at tulug, ngulug lvpw atwg ko tuup tulug, hoo ngulug ab tulug noqg aoho nyic nyinam hvnywngam bepor paku.

⁹‍Aya mwwpanamv la paqnyi kunamv ngulug Pwnbo At Sw gvknyi, hoggab ngulv mwam tvjwmab ceeko tukbanyi

¹⁰‍hoo mwwg nyera tulu nyiqry benbo tulug lvgab mwwg pvvb tulungam ngulug agaho mvpjikwb wkmab ngulv Pwnbo At Swg yalam tvjw maanum.

¹¹‍Israel nyi mwlwngv noqg pvvbam mvpia paku hoo ham wiyeq paku, noqg yalam taramk hvl haqpaq poqdu do. Hoo Pwnbog nyera Mojesg Pvvblo xeqpnam beenam mvla dingrnamv ngulug ao si toopup paku, hoggab ngulv mwwg aoho nyic nyipa ku.

¹²‍Hogloq ham mwv ngulam la ngulam pvvb bwwl doogbo tulungam ceeko dvb gooknum, ngulug ao lo laqm-baqm dvb haam tainvk hvnam mam, mwwg goonam mam mwv dardarjaqb goonum. Hoggab nyodo nvg niikumso Jerusalem mam ceekonam hvb hog akkam dookram.

¹³‍Mojes Pvvblo xeqpnam hvb soq laqm-baqmnamv ngulug ao si haapa ku; hvbsujaqkam ngulv ngulug Pwnbo At Swg mwwsw dvb nyima ta, ngulug nyimurnam tulu hoqgv apaql hoo noqg jvqtwngam ngulug urab haam mvma.

¹⁴‍Hoqgab At Sw laqm-baqm deenam mam mwx-mvaql ap paku hoo ngulug aoso ham haam paku, hoggab ngulug Pwnbo At Sw mwwg bonam nyinam mwlwngv jvqtw dvn, hoo ngulv mwwg yalam tamanum.

¹⁵‍Hoo sija, ngulug Pwnbo At Swa, hiyv noqg nyiilungam Ijipt gvda hoqgv atorbo alaqkv boolin kunum, hoo soq aal namgub no atv noqg eminam mvpkunum, ngulv nyic nyipa ku, ngulv nyic-nyia loodab nyipa ku.

¹⁶“At Swa, noqg jvqtw bon nyinam mwlwngv noqg haaxaqnam mam la noqg hang lingtwrnamv noqg bopam Jerusalem mam la noqg dvrwqbo yorn hoqgv aadob mvpaq mvtku, hoggab hoqhv ngulug nyic nyigam gab, hoo ngulug ab tulug nyimur nyigam gab, Jerusalem mam la noqg nyiilungam ngulug diis-paap nyi tulug pengko ho benyi-bviya namgub nyipa ku.

¹⁷‍Sija hoqgab, ngulug Pwnboa, noqg nyerag swgwnam sam la mwwg aya mwwpa tvbwk hvl konam sam tatbv, noqg atwg emin gab, At Swa, mucu-mviyanam noqg dvrwq namlo aoho noqg nyuqm mam huum tvbv.

¹⁸‍Ngoqg Pwnboa, noqg nyurungam pwrgal hoo tatbv. Ngul gvla noqg eminam goqnbo bopamg ocu-aiya deenam mam noqg vnyiqkv piorab kaatbv. Hoggab ngulug vs-axaqkam noqg agaho ngulv betamnam si ngulug dvrwql lootw ko-gab ma, hvbmabde noqg vcjaqb aya mwwpanam gab.

¹⁹‍At Swa, tatbv; At Swa, paqnyi tvbv. At Swa, ruucw kwrgab tvbv hoo bon nyito. Oyu maabv, hoggab noqg atwg emin gab, ngoqg Pwnboa, hoggab noqg bopam mvla noqg nyiilungv noqg eminam goqdwn.”

²⁰‍Hwdlo ngo agam goodul hoo xumdu yikho, ngoqg nyicam la ngoqg Israel nyiilu nyicam xaqlinum, hoo ngoqg Pwnbog dvrwqbo yorn ho ngoqg konam mam ngoqg Pwnbo At Swg agaho betamnum,

²¹‍hwdlo ngo agam goodul swgw gwwdu yikho, otuqho hiyam ngoqg nyiqry kaanam ho ngo kaapa kunam, Gabriel ngoqg dookub ariyumg pwr jid moodho nyebia jaqb jaranum.

²²‍Mwv ngam agam goonam lvgab ngam cenglaq dvb mvnum, hoo begamv, “Daniyel la, ngo nam cenglaqkam la mwwlaqkam jitab haaiyin.

²³‍Noqg aya mwwpa tvbwk hvl konam mam berab yukho gomcwrv lengknum, hoo ngo nam betam taab haapa kun, hoggab nam vc loodab abynum. Hoqgab gomcwram mwwka to hoo nyiqry kaanam mam cenglaqto.

²⁴“Cam kvn hapta tulu gob noqg nyiilungv hoo noqg dvrwqbo bopamv, nyimur nyinam mam nyiyum deesam bir paku, nyic nyinam mam twrm tuku, hoo nyixiaqnam gab pwr jito, kuiyum namgub dvrwq lootwngam haamto, nyiqry kaanam mam la nyiqry benboam vnyi-vnyiam morxtumto, hoo dvrwq kwrwqbo nyookam darxaqto.

²⁵‍Hoqgab cengto hoo mwwlaqto gomcwr lengn bov nookur dvn hoo Jerusalem mam mvdar dvb lvpw atwg ko tuup ak, xuqnam akv lengtayin, hoqhv cam kvn hapta tuluho nyitayin. Ho camx leq vnyi hapta tuluho lokta cuukiq- bvvrwngam la lamtangam mvdar tayin, hvbmabde hoqhv vs-axaq moodam nyitayin.

²⁶‍Camx leq vnyi hapta tulu kokwngam xuqlinam akam mvpaq tayin hoo hog akkam dookram. Hoo nyiilug lvpw atwg ko tuupv haalayil bopam mam la dvrwq namlongam twrtayin. Hoqg twrdynamv diidwr iss ak hoqgv haatayin, hoo twrnamv nyob panam hoqgv haatayin. Twrdynam tulungam bibwq paku.

²⁷‍Hoo mwv hapta akgob atorbo pvvb birnam mam naleqgo mvtayin, hoo hapta taapo go pwr jinam mam la akiam mutum tayin. Hoo hwdlo mucu-mviya boam twrm dvb pvvb mvnamv nyinya maady deedib, bulum-kac dvb nyinam mam mucu-mviya bo akwg aoho toopup tayin.”