Read Nyishi HOSIYA 1 Bible Online

HOSIYA 1 - Nyishi bible

HOSIYA 1

¹At Swg gomcwrv Beeri gv ko tuup Hosiya haanum, Ujjiya, Jotam, Ahaj, hoo Hejekiya Judag lvpw atwb swwiyik aalho, hoo Joas gv ko tuup Jeroboam Israelwg lvpw atwb swwiyik aalho.

²‍Otuqcob hwdlo At Sw Hosiyanvn agam gooyikho, At Sw Hosiyanvn benum, “Wn nam atam bwwxinbo nywxwngam la ko tulungam boota, hoggab nyookv vc-loodab yos-dvpeq nyikv At Swn haqpaq paku.”

³‍Hoqgab mwv wnum hoo Diblaim gv nyem ko Gomarnvn naanum, hoo mwn ko gvnv mwam nyega ko ak bwwjnum.

⁴‍Hoo At Sw mwam benum, “Mwwg eminam Jejreel hvl goqto, hoggab Jejreelnvn meng gam gab oyu yoomab ngo Jehu nammam laqm-baqm tayin, hoo ngo Israelwg nombu lvpw hatiam twryum tayin.

⁵‍Hoo hoq aalam Jejreelwg Lywpa ho ngo Israelwg illiam twrtu tayin.”

⁶‍Mwn akta ko gvnum hoo nyem ko ak bwwnum hoo At Sw mwam benum, “Mwnwg eminam Aya maan hvl goqto, hoqgab ngo Israelwg nombungam lokam aya mwwpa kuram, ho bul mwlwg nyicam apaq jikram.

⁷‍Hvbmabde ngo Judag nombungam aya mwwpa tayin, hoo ngo bulug Pwnbo At Sw gob nyitwl bulam ywwtayin. Ngo bulam illy-uppuq lvgab, ho lyoqr orioq lvgab ho nyob panam lvgab ho svpur lvgab ho svpuram wgbo tulu lvgab ywwlin ram.”

⁸‍Hwdlo Aya Mwwpa maak ho mwnwg gwwi twwxiq yikho, mwn akta ko gvnv hoo nyega ko ak bwwnum.

⁹‍Hoo At Sw benum, “Mwwg eminam Ngoqg Nyi ma hvl goqto, hoggab nulv ngoqg nyi ma, hoo ngo nulug Pwnbo ma.”

¹⁰‍Hvbsujaqkam Israelwg ko tulungv sa-svlog xuqx hvb mvqlw tayin, hogloq ham xila maadwn. Hoo hoq nyook ho bulam hvl benum, “Nulv ngoqg nyi ma,” hoqho bulam benum, “Swwl doonbo Pwnbog ko tulu.”

¹¹‍Hoo Judag la Israelwg ko tulungv lvkin gob hookum tayin, hoo bulv bulug pengko hoqgv koibo ak xuqlin tayin. Hoo bulv hoq nyook hoqgv wrab tayin, hoggab Jejreelwg aalv xinam gob nyitayin.