Read Nyishi HOSIYA 10 Bible Online

HOSIYA 10 - Nyishi bible

HOSIYA 10

¹Israelv aljaqnbo roo annv hoqhv aaxy xeedwn. Mwwg aaxiv hog hwdgo vigo xeenum, hwd kalam go mwv yugw tulungam mvnum; mwwg nyookv swwrab-geerab yin, mwwg poogwngam mwv vigo diinum.

²Bulug hangv xaalyo do, sija bulug nyixaqkam bulv hiqdwb nyipa. At Sw bulug yugw tulungam mvpia lotayin hoo bulug poogwngam twrm tayin.

³Hoggab sija bulv betayin: “Ngulv lvpw at dookma, hoggab ngulv At Swn bos sokma hoo lvpw at ak hoggv ngul gab mwv nyinyi tayin?”

⁴Bulv gomcwr arongam goolin do; bulv dingsaml pvvb mvdwn; hoqgab pw-hwwnamv pos-poi nwmw tulu hvb rongog paap tuluho buqlin dvn.

⁵Samariyag doonbo mwlwngv Beta — benwg svv ko gab tvmdwr dvn. Hoq nyiilungv hoqgab nyix-riidwn, hoo hvb kalam murty xumn bo nyub tulungv nyidwn- hiyv hoq aoho la hoo hoqg yuunam aoho hwnyir-hvmar dvn — hoggab hoqhv bulug hoqgv wleq paku.

⁶Dupum-dvrab pam kam Assiriyab baqa tayin koibo lvpw atam modul aky jinam hvb. Iprayim mam hvnyw-moolw mvtayin, hoo Israelam mwwg murty gab hvnyw mvtayin.

⁷Samariyag lvpw atv iss aoho tako-taram nyiinam hvb yuupaq tayin.

⁸Israelwg nyicv Abenwg ui mukumko nyook tulungv twrtayin. Bulug yugw tuluho taa-ngvla ter-tanv tamca tayin, hoo “Ngulam tomlup tvbwk hvl,” bulv puutu tulungam betayin, hoo “Ngulug aoso gamtin tvbwk hvl,” yorn tulungam betayin.

⁹Gibeag aal hoqgv, Israela, nulv nyic nyiknum; ho bulv hoqgv nyidu dood kun. Jvqtw maab ceekol nyob panv bulam Gibea uraho paiya maad nvi yv?

¹⁰Hwdlo ngo hemp yin, ngo bulam gwrnyiaq tayin, hoo nyob nyiv bulam ceekol hookum tayin, hwdlo bulug laaleq dvb nyixaq ko-gab bulam roqtul ap yin.

¹¹Iprayimv honynum svv ko akv am swqdwb abynum, hoo ngo mwnwg kangam bo lwwpongam hvvminl apnum; hvbmabde Iprayim mam ngo lwwpaq baqm tayin; Judangv hoggub nyijaqkam rongongam tuqtayin; Jakub mw atgab hoggub nyijaqkam tuqtayin.

¹²Jvqtwngam nul atgab vly liito; tumanam abiam vly naato; nulug palol apnam nyiobiam mvko to, hoggab soq si At Swn meegaq dv mood go, ho mwv lokwn haakam yin pv hoo nulug aoho jvqtwngam nyodob hoa mvi nvpv.

¹³Nulv nyixaqkam tuql ap paku; nulv jvqtw maanam mam noocuml ap paku; nulv vm mvnam aaxiam dvpa ku. Hoqgab nulug atwg lamtangam hoo nulug nyob palaq bo mvqlwho nulv mwwgw paku,

¹⁴hoqgab nulug nyi tulug pengko ho nyob padwb hur-matab nyirab tayin, hoo nulug gurum nwqtumnam mwlwngam mvpia tayin, Salmanv nyob padwb aalho Betar-belam twrmnam hvb; ann tulu lvgab ko tulungam vmwq-yumgub mvknum.

¹⁵Hoqgab, Betela, soq sib kalam nulam mvtayin, hoggab nulug vcjaq almab nyigam gab. Huwr-huumar kalam Israelwg lvpw atam mingtwr xaatayin.