Read Nyishi HOSIYA 11 Bible Online

HOSIYA 11 - Nyishi bible

HOSIYA 11

¹Hwdlo Israelv ko anyo yukho, ngo mwam abynum, hoo ngoqg ko tuupam ngo Ijipt hoqgv goqlinum.

²Bulam hwdgo goqya yaiya hwdkalam bulv aadob wleqnum, bulv Baal tulungam pwr jikil doonum hoo murty tulungam boyuqnam aky jinum.

³Hvsjaqkam hoqham ngo su hiyv Iprayimnvn wm dvb tomswrnum; ngo bulug laqpongam gvbwl bulam purabnum; hvbmabde ngoqg bulam mwpnam mam bulv cengmanam.

⁴Ngo tumanam anya lvgab, hoo jimbw aby lvgab bulam wgnum, hoo bulug lwwpo ho ngo bulam vs-axaqbo luukam tulwqbo ak hvb nyinum, hoo ngo bulam guba mvnum hoo bulam dvmnum.

⁵Bulv Ijipt gvdab wkur kuram, hvbmabde Assiriyangv bulug lvpw at gob nyitayin, hoqgab bulv ngoqgab wkur dvb haqpaq paku.

⁶Bulug bopam tulungam lyoqr-orioqkv ceekol hang lengrab tayin, bulug toggoq tulug dvvcw tulungam twrmwq tayin, hoo bulug atv tomswr-honynam gab bulam mvcaq-mviyaq tayin.

⁷Ngoqg soqgv ngoqg nyiilungv tobkurl wleq dvb mwwr paku, hoo bulv Pwnbon goqs jaqkam, mwv bulam hoggub nyijaqkam purabram.

⁸Iprayima, hoggub ngo nam jipaq nyotayin? Israela, hoggub ngo nam laqpaq nyotayin? Hoggub ngo nam Adma hvb mvnyi tayin? Hoggub ngo nam Jeboiim hvb svgagvrwq nyotayin? Ngoqg hang urangv ngam mwwxy-mwwril mwwdu dvn; ngoqg aya mwwpanamv og bvla apa paal swwrab yuku.

⁹Wm gudwn hvb ngoqg haaxaqnam mam ngo xaqlin ram; ngo Iprayim mam lokta twrram; hoggab ngo nyi ak ma, hvbmabde Pwnbov. nulug pengko ho Dvrwqbo Akv, hoo ngo hang lengtwr tvl haakram.

¹⁰Bulv At Swg kokwb wtayin; mwv sony nyot ak hvb dugum gumtayin; hwdlo mwv dugum yukam, mwwg ko tulungv dou-haaga hoqgv tvmdwr dwrl haatayin;

¹¹bulv pvta tulu hvb Ijipt hoqgv tvmdwr dwrl haatayin, Assiriya gvda hoqgv pwk-yobur hvb, hoo bulug nammwb ngo bulam rookur tayin hvl, At Sw bibwqdo.

¹²Vm mvvl Iprayimv hoo sur-rul Israel nombungv ngam hwwiyum dvn, hvbmabde Judangv sija godab Pwnbo lvgab wmin gvdwn hoo Dvrwqbo Akam dengky dvn.