Read Nyishi HOSIYA 12 Bible Online

HOSIYA 12 - Nyishi bible

HOSIYA 12

¹Iprayim dooiyam saqdwn hoo aal looxiam dou-cagag dooiyam ruqmin gvdwn; bulv xaalyongam la bamy-taiyam buqmw mvdwn; bulv Assiriya lvgab birnam pvvbam akam mvdvn, hoo kutiam Ijipt baqdwn.

²At Sw Judag nyimuram ceekol beepa kun hoo mwwg lamta jaqb Jakubnvn laqm-baqm tayin; mwwg bon nyinam hvbjaq mwv mwam hiqtayin.

³Ann kepo uraho mwv mwwg borwg ludam gagabnum, hoo mwwg nyega gaatwb swwca yikho mwv Pwnbo lvgab gwbw humin sunum.

⁴Mwv gumtw lvgab vcjaqb gwbw tumin sunum hoo tubyanum; mwwg mwwswnam mam mwv xabnv konum. Mwv Betel ho Pwnbon kvvrwqnum, hoo alo Pwnbo ngulug lvgab agam goonum-

⁵Mwlwg Pwnbo At Sw, At Swg eminv mwwgab keedwb nyinbov:

⁶“Hoqgab no, noqg Pwnbo svka ko-gab wkur to, abiam la jvqtwngam gvbwtvl dooto, hoo noqg Pwnbo gab kaaya yaal dooky do.”

⁷Kwm-kor mvnbo akwg alaqlo xaalyob jaakanannv doodwn, mwv nyijab-nyiyab dvb abydvn.

⁸Iprayimv benum, “Vv, hvbmabde ngo nyet dvn; ngoqgab ngo atv gumn kaapa pakun; ngoqg bon nyitaq mwlwho bulv ngoqg nyixaqkam la nyicam kaaparam.”

⁹Ijipt gvda hoqgv ngo nulug Pwnbo At Swv, ngo nulam doogw uraho doom dvb mvtayin, dvminl soomin dvb xuqlinam aal hvb.

¹⁰Ngo nyiqry benbo tulungam agam goonum; ngo su nyiqry kaanam mam naleq mvnam, hoo nyiqry benbo tulug lvgab dooiyw-doocnam mam jinum.

¹¹Gilead uraho nyixaqnamv doop nyiloqkam, hoq tuluhv jvqtw jaqb niqtuq haaram; Gilgal ho bulv hvvb tulungam pwr jidwn; rongog paap tuluho bulug yugwngv wlw paaca namhvb nyido.

¹²Aram gvdab Jakub kenum; alo Israelv nywxw ak bon nyijonum, hoo nywxw ak naadwb mwv sviya rvky kijonum.

¹³Nyiqry kaanbo ak hoggv At Sw Israelnvn Ijipt gvda hoqgv boolinum, hoo nyiqry kaanbo akv mwam rvkil yvgnum.

¹⁴Iprayimv kacaq-bviyaq dvb biluq paku; hoqgab mwwg At Sw mwwg ywlw-swtw twwnam mam mwwg aolo gorgy tulwqtayin hoo mwwg xima dvb nyinam tulungam mwam jikur tayin.