Read Nyishi HOSIYA 13 Bible Online

HOSIYA 13 - Nyishi bible

HOSIYA 13

¹Hwdlo Iprayim agam gooi yin, ho tvmdwrnum; mwv Israel uraho yuunam, hvbmabde mwv Baal lvgab nyixaqkam mwp nyokmab hoo sinkun.

²Hoo sija bulv vi-vi yab nyic nyido, hoo bul atgab dvvcw guss tulungam mvnum, bulug rup hoqgv murty tulungam mvlaq jaqb mvnum, hoq mwlw hv jem mvnbo tulug jem mvnamv. Soq tulu sam hvl benum, “Hiyv nyi pwr jidwn svv ko tulungam moopup to.”

³Hoqgab ar komcig gums hvb bulv nyitayin ho gums hvb nyebia jaqb nyipaq dvn, jurpy daqyam omsuqkam xabxaqnam hvb nyidwn ho mwwlo hoqg mwk juunam hvb nyidwn.

⁴Hvbmabde Ijipt gvda hoqgv ngo nulug Pwnbo At Swv; nulv asaq Pwnbo cengmanam hvbmabde ngam twq, hoo ngoqg lvvg alo ywwlin bo dooma dvn.

⁵Ngo su nulam deexa-raralo, jwwxa xaak gvda lo ceegnum;

⁶hvbmabde hwdlo bulv nwmw dvl, bulv bwwr yikho, bulv dvdeq kunum, hoo bulug hangam joorab kunum; hoqgab bulv ngam mwwpa kuma.

⁷Hoqgab ngo bulgab sony nyot ak hvb nyipa ku; hogga takar ak hvb ngo lamta bviyoqho toos tayin.

⁸Sutum akwg kongam naareq yukam mwnwg humbaq namhvb ngo bulug aoho humbaq tayin; ngo bulug swqbwngam pucil puxo tayin, hoo nyoro svdinv hoggub bulam puc-puinam hvb, hoqho ngo bulam sony nyot ak hvb mvcaq-mviyaq tayin.

⁹Israela, mwv nam twrm do, hoggab nulv ngam ceeko do, svka boam nulv ceeko do.

¹⁰Nulug bopam mwlwngam ywwlin dvb, nulug lvpw atv hogloqho sija? Hogloqho nulug pvvb bvvl doogbo tulungv- hiyam nulv hvl benum, “Ngam lvpw at lo ak lvpw atwg nyega ko lo jitwb hvnam.”?

¹¹Ngoqg haaxaq yikho ngo nulam lvpw at ak jinum; hoo ngoqg hang lingtwr yukho ngo mwam naaxanum.

¹²Iprayim nyixaqkv buqporl buqca do; mwwg nyicam noosu lo ap pa.

¹³Ko cinc cinam vcv mwam haadwn, hvbmabde mwv mwwlaq maanbo ko tuupv, hoggab kvtaq bo moodho hwdlo nvmmam-nvpv puko yikho mwv atv lengma sunum.

¹⁴Ngo bulam Sux-ywlw ator hoqgv rvlin tai nvi yv? Ngo bulam sig hoqgv ywwlin tai nvi yv? Sinam ma, hoglo nulug swlin-momin namv? Sux-ywlw nga, hoglo nulug cumdwqkv? Ngoqg vnyiq soqgv aya kaapanam mam kvs pakun.

¹⁵Mwwg vbw-bor tulug pengko ho mwv swws-gees jaqkam, deexa-rara hoqgv ywrab layil dou-cagag dooiyv, At Swg dooiyv, haatayin, hoo mwwg sokumv xabtayin; mwwg iss subuq buqlin kov cwwgoq-deegoq goqtayin; hoqhv mwwg xinam gumn mwlwngv yuupaq mvtayin.

¹⁶Samariyangv mwnwg nyixaq gorgiam baqtayin, hoggab mwnwg Pwnboam mwn ceekol tvjw maanum; bulv lyoqr orioq gombub haatayin; bulug ko anyongam cwr-cwrwb twqmin tayin, hoo bulug ko gvnbo dvn tulungv gampaq tayin.